Ճապոնիա

Կղզեխմբային ինքնիշխան միապետություն է, որը գտնվում է Արեւելյան Ասիա տարածաշրջանում։ Այն Խաղաղ օվկիանոսի արեւմտյան ափին է՝ զբաղեցնելով Ասիա աշխարհամասի արեւելյան ծովափը, տարածվելով Օխոտի ծովից մինչեւ Արեւելաչինական ծով, Չինաստանի Ժողովրդական Հանրապետության հարավը։

Ըստ չինական եւ ճապոնական գաղափարագրերի` Ճապոնիա անունը նշանակում է «արեւի ծագում» կամ «ծագող արեւի երկիր»։ Ճապոնիան կազմված է մոտ 6,852 հրաբխային ծագման կղզիներից։ Առավել խոշոր չորս կղզիներն են Հոնսյուն, Հոկայդոն, Սիկուկուն եւ Կյուսուն, որոնք զբաղեցնում են Ճապոնիայի ցամաքային տարածքի մոտ իննսունյոթ տոկոսը։

Բնակչության թվաքանակով աշխարհում տասներորդն է՝ մոտ 127 մլն մարդ։ Բնակչության կազմը միատարր է․ ճապոնացիները կազմում են Ճապոնիայի ամբողջ բնակչության 98.5 %-ը։ Մայրաքաղաքի՝ Տոկիոյի բնակչությունը կազմում է մոտ 9,1 մլն մարդ։

ՄԱԿ-ում Ճապոնիայի ներկայացուցիչը կոչ է արել Ադրբեջանին դադարեցնել իր ռազմական գործողությունները

Արցախում իրավիճակի հարցով ՄԱԿ ԱԽ նիստին Ճապոնիան խոր մտահոգություն է հայտնել իրավիճակի վատթարացման կապակցությամբ եւ կոչ արել անհապաղ դադարեցնել մարտական գործողությունները։ ՄԱԿ-ում Ճապոնիայի ներկայացուցիչը կոչ է արել Ադրբեջանին դադարեցնել իր ռազմական գործողությունները։ «Իրավիճակի ցանկացած միակողմ փոփոխության փորձ անընդունելի է։ Սեպտեմբերի 20-ին համաձայնություն է ձեռք բերվել մարտական գործողությունները դադարեցնելու վերաբերյալ, թեպետ ռազմական առճակատումը դադարեցվեց, իրավիճակը շարունակում է անորոշ մնալ։ ԱԽ-ն պետք է շարունակի հետեւել տեղի իրավիճակին՝ իրադարձությունների վրա դրական ազդեցություն ունենալու նպատակով», - նշել է նա։ Ներկայացուցչի խոսքով՝ ԱԽ-ն պետք է մասնավորապես շարունակի զբաղվել ԼՂ-ում մարդասիրական իրավիճակով. «Պետք է ապահովել ամենախոցելի բնակիչների, այդ թվում հիվանդների, քրոնիկ հիվանդություններ ունեցողների, տարեցների, կանանց եւ երեխաների կյանքի եւ անվտանգության պաշտպանությունը։ Մարդասիրական հասանելիությունը միջազգային կազմակերպությունների համար պետք է առանց խոչընդոտների ապահովված լինի, որպեսզի պաշտպանվեն տեղի բնակիչների անվտանգությունը եւ ապահովվեն կարիքները։ Հակամարտության լուծումը Ադրբեջանի եւ այլ կողմերի միջեւ շատ կարեւոր է Կովկաս տարածաշրջանում խաղաղության եւ անվտանգության համար։ Նրանց միջեւ երկխոսությունը հույժ կարեւոր է», - ասել է ՄԱԿ-ում Ճապոնիայի ներկայացուցիչը՝ նշելով, որ Ճապոնիան բոլոր կողմերին կոչ է անում խնդիրները լուծել խաղաղ ճանապարհով։

00:42 - 22 սեպտեմբերի, 2023

Ճապոնիայի ԱԳ նախարարը ԼՂ-ում ռազմական գործողությունները դադարեցնելու կոչ է արել Ադրբեջանին |armenpress.am|

armenpress.am: Ճապոնիայի արտաքին գործերի նախարար Յոկո Կամիկավան կոչ է արել Ադրբեջանին անհապաղ դադարեցնել ռազմական գործողությունները Լեռնային Ղարաբաղում, որի հետևանքով կան տասնյակ զոհեր ու վիրավորներ՝ այդ թվում և քաղաքացիական բնակչության շրջանում։ Ճապոնիայի ԱԳ նախարարի հայտարարության մեջ մասնավորապես ասվում է․ «Ճապոնիան իր խորը մտահոգությունն է հայտնում Լեռնային Ղարաբաղում իրադրության վերջին վատթարացման առնչությամբ և խստորեն հորդորում է անհապաղ կասեցնել ագրեսիան, կոչ է անում Ադրբեջանին դադարեցնել ռազմական գործողությունները։ Ճապոնիան հորդորում է բոլոր կողմերին տարածաշրջանային խնդիրները լուծել խաղաղ կերպով՝ երկխոսության միջոցով»։

09:36 - 20 սեպտեմբերի, 2023

Ճապոնիան հաջողությամբ առաքելություն է ուղարկել դեպի Լուսին՝ միանալով մրցավազքին |armenpress.am|

armenpress.am: Ճապոնիան սեպտեմբերի 7-ին հաջողությամբ հրթիռ է արձակել, որը պետք է լուսնագնացը հասցնի Լուսին։ Սա երկրի՝ այս տարվա արդեն չորրորդ նման փորձն էր․ նախկին փորձերը տապալվել էին վատ եղանակի պատճառով։ Այս մասին հաղորդում է BBC-ի հրապարակումը։ Եթե ամեն ինչ հարթ ընթանա, ապա լուսնագնացը, որը ստացել է «լուսնային դիպուկահար» անվանումը, պետք է հասնի Լուսնի մակերևույթին 2024 թ․ փետրվարին։ Ճապոնիան նախատեսում է իր տիեզերական սարքն իջեցնել Շիոլի խառնարանի մոտակայքում։ Ճապոնիան ցանկանում է դառնալ 5-րդ երկիրը, որը վայրէջք կկատարի Լուսնի վրա՝ հաջորդելով ԱՄՆ-ին, Ռուսաստանին, Չինաստանին և Հնդկաստանին։ Երկու շաբաթ առաջ Հնդկաստանը դարձավ առաջին երկիրը, որը հաջողությամբ տիեզերանավ իջեցրեց Լուսնի հարավային բևեռում։

13:13 - 07 սեպտեմբերի, 2023

Ճապոնիան սկսել է «Ֆուկուսիմա-1» ատոմակայանից մաքրված ջրի արտանետումը օվկիանոս |1lurer.am|

1lurer.am: Ճապոնիայում սկսվել է «Ֆուկուսիմա-1» վթարաված ատոմակայանից մաքրված ջրի բացթողումը։ Նշվում է, որ 2023 ֆինանսական տարում ատոմակայանից բաց կթողնվի մոտ 31,2 հազար տոննա հեղուկ: TEPCO օպերատոր ընկերությունը հայտարարել է, որ մաքրված ջրի մեջ տրիտիումի խտությունը սահմանված նորմայից ցածր է: Եթե գործընթացում որևէ խախտում լինի, ջրի բացթողումն անմիջապես կդադարեցվի՝ ասել են կազմակերպությունում: Տոկիոյի որոշումը դժգոհություն է առաջացրել հարևան երկրներում։ Չինաստանի ԱԳՆ-ն կտրականապես դեմ է արտահայտվել Ճապոնիայի որոշմանը։ Նախարարության խոսնակ Վան Վենբինը Տոկիոյի քայլը անվանել է «չափազանց եսասիրական և անպատասխանատու»։ «Ռոսսելխոզնադզորն» էլ ուժեղացրել է հսկողությունը ՌԴ տարածքային ջրերի այն շրջանում որսված կենսառեսուրսների նկատմամբ, որը համեմատաբար մոտ է «Ֆուկուսիմա-1»-ից ջրի բացթողման պլանավորված վայրին։ Ճապոնական կողմի որոշումը դժգոհություն է առաջացրել նաև Հարավային Կորեայում, որտեղ արդեն մի շարք բողոքի ակցիաներ են անցկացվել: Կայանը նախատեսվում է ամբողջությամբ ապամոնտաժել մինչև 2050 թվականը:

13:58 - 24 օգոստոսի, 2023

Լաչինի միջանցքով մարդասիրական հասանելիությունը միջազգային կազմակերպությունների համար պետք է անխոչընդոտ լինի. ՄԱԿ-ում Ճապոնիայի ներկայացուցիչ |armenpress.am|

armenpress.am: Թեև Լաչինի միջացքի խնդրով պայմանավորված հայկական ու ադրբեջանական կողմերի փաստարկները տարբեր բացատրություններ են պարունակում, այնուամենայնիվ, տեղում մարդկանց ապրուստի երաշխավորումը պետք է առաջնային լինի, հատկապես՝ ամենախոցելի խմբերի՝ հիվանդների և քրոնիկ հիվանդների, տարեցների, կանանց և երեխաների համար: Նրանց կյանքը չպետք է սպառնալիքի ներքո լինի: Լեռնային Ղարաբաղում հումանիտար ճգնաժամի հարցով ՄԱԿ-ի Անվտանգության խորհրդի նիստում այս մասին հայտարարեց Ճապոնիայի ներկայացուցիչը: «Մենք ի գիտություն ենք ընդունում, որ ՄԱԿ-ի անվտանգության խորհրդի գլխավոր քարտուղարը կոչ է արել վերականգնել տեղաշարժը Լաչինի միջանցքով և հաշվի առնել, որ պետք է շտկել մարդասիրական իրավիճակը տեղում: ԿԽՄԿ-ն ներկայումս դժվարություններ ունի մարդասիրական օգնությունը քաղաքացիական բնակչությանը Լաչինի միջանցքով հասցնելու գործում: Նա կոչ է անում որոշում կայացնողներին թույլ տալ, որպեսզի վերսկսվի մարդասիրական գործունեությունը տարածքում: Մարդասիրական հասանելիությունը միջազգային կազմակերպությունների համար պետք է անխոչընդոտ լինի: Կողմերին կոչ ենք անում հնարավորինս շուտ ապահովել հասանելիությունը»,- ասաց ՄԱԿ-ի ԱԽ-ում Ճապոնիայի ներկայացուցիչը: Նա հիշեցրեց նաև, որ Արդարադատության միջազգային դատարանը 2023 թվականի փետրվարի 22-ին պայմանական միջոցներ է կարգադրել, այդ թվում՝ ապահովելու անձանց, տրանսպորտային միջոցների և բեռների անխոչընդոտ տեղաշարժը Լաչինի միջանցքի երկու ուղղություններով: Ճապոնիան վերահաստատում է, որ օրենքի գերիշխանությունը պետք է հաստատվի, և դա պաշտոնական Տոկիոյի մնայուն դիրքորոշումն է: Ցանկացած պետություն պարտավոր է հետևել միջազգային իրավունքի նորմերին, այդ թվում ՄԱԿ-ի կանոնադրությանը և մարդասիրական նորմերին: «Հակամարտության վերջնական հանգուցալուծումը Հայաստանի և Ադրբեջանի միջև շատ կարևոր է խաղաղության և կայունության համար Կովկասյան տարածաշրջանում: ՄԱԿ-ի ԱԽ-ի գերխնդիրը միջազգային խաղաղության պահպանումն է, ինչի համար բոլոր կողմերը պետք է հանձնառու լինեն առկա խնդրին, և այդ առումով երկխոսությունը Հայաստանի ու Ադրբեջանի միջև կարևոր է: Մենք հույս ունենք, որ այն թույլ կտա վեճը լուծել խաղաղ ճանապարհով՝ միջազգային իրավունքի նորմերին համապատասխան»,- եզրափակեց ՄԱԿ-ի ԱԽ-ում Ճապոնիայի ներկայացուցիչը:

00:25 - 17 օգոստոսի, 2023