Սերբիա

Սերբիան պետություն է Եվրոպայի հարավում՝ Դանուբի ավազանում։ Առանձնացել է 1991-1992 թվականների պատմական իրադարձությունների արդյունքում, երբ Հարավսլավիան տրոհվեց ինքնիշխան պետությունների։

2006 թվականի հունիսի 3-ին Սերբիայում եւ Չեռնոգորիայում անցկացված հանրաքվեով Չեռնոգորիան անջատվեց Սերբիայից, եւ Սերբիան մնաց բուն Սերբիայի եւ 2 ինքնավար մարզերի՝ Վոեվոդինայի ու Կոսովոյի հետ։ Սակայն գնալով խորացավ դեռեւս 1999 թվականին Կոսովոյում սկսված հակամարտությունը ալբանացիների (92 %) եւ սերբերի (6 %) միջեւ, եւ 2008 թվականի փետրվարի 17-ին Կոսովոն հայտարարեց իր անկախությունը, որը Սերբիան չի ճանաչել։

Սերբիայում բողոքի ցույցերի ֆոնին հաստատվել է նոր կառավարության կազմը |azatutyun.am|

azatutyun.am: Սերբիայի խորհրդարանը չորեքշաբթի հաստատել է նոր կառավարության կազմը՝ Ջուրո Մաքուտի գլխավորությամբ՝ երկրում ամիսներ շարունակվող բողոքի ցույցերի ֆոնին։ Նոր կաբինետում նախարարների երկու երրորդը՝ 30-ից 20-ը, եղել են իշխող Սերբական առաջադիմական կուսակցության առաջնորդ Միլոշ Վուչևիչի նախորդ կառավարության կազմում, ով հրաժարական է տվել հունվարին բողոքի ցույցերի գագաթնակետին։ Իր երդմնակալության խոսքում Մաքուտն ասել է, որ Սերբիան «հոգնել է բաժանումից և շրջափակումներից» և կոչ է արել «ներդաշնակեցնել հասարակությանը» երկխոսության, հանդուրժողականության և ընդհանուր արժեքային համակարգի միջոցով: Նա հայտարարել է, որ իր անմիջական առաջնահերթությունը կլինի դպրոցների և բուհերի բնականոն գործունեության ապահովումը։ Սերբիայում բողոքի ցույցերը սկսվել էին այն բանից հետո, երբ Նովի Սադում երկաթուղային կայարանում բետոնե ծածկի փլուզման հետևանքով զոհվեց 16 մարդ։ Մահացու փլուզումը Սերբիայում համազգային ցույցեր առաջացրեց այն մարդկանց կողմից, ովքեր մեղադրում էին կառավարությանը կոռուպցիայի և վատ վերահսկողության մեջ:

09:59 - 17 ապրիլի, 2025

Բելգրադում զանգվածային ցույցից հետո Վուչիչը վստահեցնում է՝ կառավարությունն ընկալեց ուղերձը |azatutyun.am|

azatutyun.am: Մայրաքաղաք Բելգրադում երեկվա բողոքի զանգվածային ցույցից հետո Սերբիայի նախագահ Ալեքսանդր Վուչիչն ընդունել է, որ իշխանությունների դեմ երկրում առկա է «հսկայական բացասական էներգիա ու վրդովմունք», և վստահեցրել՝ «մեզ հարկ կլինի փոխվել»։ «Բոլորը կառավարությունում պետք է ընկալեն ուղերձը, երբ այսքան շատ մարդ է հավաքվում։ Մենք պետք է փոխվենք», - հայտարարել է Վուչիչը շաբաթ օրը ասուլիսի ժամանակ։ Սերբիայի նախագահի խոսքով՝ իշխանությունները բողոքի մասնակիցների թիվը գնահատել են 88 հազարից մինչև 107 հազար։ Այդուհանդերձ, բողոքի ակցիաների մասնակիցների քանակը գնահատող ոչ ֆորմալ մի կազմակերպության տվյալներով՝ ցուցարարների թիվը եղել է 275 հազարից 325 հազար։ Երեկվա ցույցն ամենամարդաշատն էր անցած տարվա նոյեմբերին Նովի Սադի երկաթուղային կայարանում ծածկի փլուզման համար Վուչիչի կառավարությանը պատասխանատվության ենթարկելու պահանջով ուսանողների գլխավորած ակցիաներից։ Նովի Սադի պատահարի հետևանքով վերջին տվյալներով 15 մարդ է զոհվել, գործով մեղադրանք է առաջադրվել 13 հոգու, այդ թվում՝ տրանսպորտի նախկին նախարարին։Լուսանկարում՝ ցուցարարներն են Բելգրադում/15․03․2025/Անդրեյ Չուկիչ/EPA-EFE

16:56 - 16 մարտի, 2025

Ցույցեր Բելգրադում․ ոստիկանությունը հավելյալ ուժեր է տեղակայել |azatutyun.am|

azatutyun.am: Տասնյակ հազարավոր մարդիկ Բելգրադում ցույցի են դուրս եկել՝ պահանջելով նախագահ Ալեքսանդր Վուչիչի կառավարությունից՝ պատասխանատվության ենթարկել նոյեմբերին Նովի Սադի երկաթուղային կայարանում տեղի ունեցած փլուզման համար, որի հետևանքով 15 մարդ էր զոհվել: Մայրաքաղաքի կենտրոնում են ոչ միայն հակակառավարական ակտիվիստները, այլև Վուչիչի աջակիցները։ Ոստիկանությունը հավելյալ ուժեր է տեղակայել՝ շրջափակելով նաև Խորհրդարանի շենքը՝ երեկ երեկոյան տեղի ունեցած անկանոն բախումներից հետո։ Այսօրվա ցույցը, ըստ «Ազատության» բալկանական ծառայության, ամենամեծն է երկրում անցած տասնամյակների մեջ։ Ցուցարարները մայրաքաղաք են եկել ողջ երկրից, շատերը՝ ոտքով կամ հեծանիվներով։Լուսանկարը՝ Արմին Դուրգուտ/AP photo

19:23 - 15 մարտի, 2025

Հայաստանի և Սերբիայի ԱԳՆ գլխավոր քարտուղարները քննարկել են երկու գերատեսչությունների միջև համագործակցության հեռանկարները

Փետրվարի 5-ին Երևանում տեղի է ունեցել Հայաստանի և Սերբիայի ԱԳՆ գլխավոր քարտուղարների գլխավորած պատվիրակությունների հանդիպումը: Ինչպես հայտնում են ՀՀ ԱԳՆ-ից, երկուստեք կարևորվել է Հայաստան - Սերբիա քաղաքական երկխոսության բարձր մակարդակը: Այս կապակցությամբ առանձնահատուկ նշվել է Երևանում Սերբիայի դեսպանության և Պրահայում ՀՀ դեսպանության Բելգրադի գրասենյակի գործունեությունը։ Զրուցակիցներն անդրադարձ են կատարել նաև միջազգային կազմակերպությունների, Եվրոպական Միության հետ համագործակցության շրջանակներում փոխադարձ աջակցության հնարավորություններին և տարածաշրջանային օրակարգին վերաբերող մի շարք հարցերի: Առանձնահատուկ նշվել է, որ նման հանդիպումներն ու անցկացվող խորհրդակցությունները, ինչպես նաև ընթացիկ տարում նախատեսվող մի շարք այցերը նոր խթան կհանդիսանան երկկողմ հարաբերությունների ամրապնդման և հետագա զարգացման համար։ Հանդիպման ընթացքում զրուցակիցները քննարկել են երկու գերատեսչությունների միջև համագործակցության նոր հեռանկարները, այդ թվում հետազոտական, վերլուծական և երիտասարդ դիվանագետների փոխանակման ծրագրերի ոլորտներում: Սերբական կողմին ներկայացվել է «Խաղաղության խաչմերուկ» ծրագիրը։ Հանդիպման ավարտին Հայաստանի և Սերբիայի ԱԳՆ գլխավոր քարտուղարներ Դավիթ Կարապետյանն ու Դուշան Կոզարևը ստորագրել են «Հայաստանի Հանրապետության ԱԳՆ դիվանագիտական դպրոցի և Սերբիայի Հանրապետության ԱԳՆ դիվանագիտական ակադեմիայի միջև համագործակցության մասին» հուշագիրը։

21:02 - 05 փետրվարի, 2025

Սերբիայի վարչապետը ցույցերի ֆոնին հրաժարական է ներկայացրել |1lurer.am|

1lurer.am: Սերբիայի վարչապետ Միլոշ Վուչևիչը երկրում ընթացող բողոքի ցույցերի ֆոնին մամուլի ասուլիս է հրավիրել, որի ժամանակ հայտարարել է հրաժարականի մասին: Ակցիաները սկսվել են որպես ուսանողական ցույցեր, այնուհետև ընդգրկել են հասարակության ավելի լայն շերտեր: Ակցիաների մասնակիցները պահանջել են հետաքննել անցած տարի նոյեմբերին Նովի Սադ քաղաքում տեղի ունեցած ողբերգությունը, երբերկաթուղային կայարանի երեսկալի փլուզման հետևանքով 15 մարդ էր զոհվել: Ցուցարարները բողոքել են նաև նախագահ Ալեքսանդր Վուչիչի վարած քաղաքականության և երկրում կոռուպցիայի դեմ:

15:04 - 28 հունվարի, 2025

Արևմուտքը փորձում է Սերբիայում «գունավոր հեղափոխություն» կազմակերպել. նախագահ Վուչիչ |tert.am|

tert.am: Արևմտյան երկրների գործակալները փորձում են Սերբիայում «գունավոր հեղափոխություն» կազմակերպել ուսանողների և բողոքի այլ մասնակիցների օգնությամբ։ Այս մասին, rbc.ru-ի փոխանցմամբ, Happy հեռուստաալիքի եթերում հայտարարել է Սերբիայի նախագահ Ալեքսանդր Վուչիչը։ «Գունավոր հեղափոխության և սահմանադրական կարգի տապալման փորձը շարունակվում է արևմտյան հրահանգիչների օգնությամբ», - ասել է նա: Սերբիայի նախագահի խոսքով՝ իշխանություններն այս հարցում կասկածներ չունեն, սակայն մտադիր են սպասել «մինչև վերջին պահը» և հետո ստիպված կլինեն պատասխանել, եթե ցուցարարները սկսեն փակել մայրուղիները։ Նա հավելել է, որ տեղեկություններ ունի, որ «օտարերկրյա գործակալներն իրենց կապերի միջոցով արդեն հասցրել են որոշ ուսանողների կոչ անել գնալ խոշոր տրանսպորտային խաչմերուկներ և արգելափակել երթևեկությունը»։ Դա, ըստ Վուչիչի, տեղի է ունենում «օտարերկրյա հրահանգիչների» հսկողության ներքո։ «Մենք սա կհանդուրժենք մինչև որոշակի պահ, որից հետո կվարվենք այն կանոններով, որոնք պետք է հարգի պետությունը»,- եզրափակել է պետության ղեկավարը։ Նոյեմբերի 1-ին Նովի Սադ քաղաքի երկաթուղային կայարանում փլուզում է տեղի ունեցել, ինչի հետևանքով զոհվել է 14 մարդ։ Blic հրատարակությունը գրել էր, որ փլված կառույցն ավելի քան 60 տարվա էր և երկար ժամանակ չէր վերանորոգվել։ Դրանից հետո բողոքի ցույցեր են սկսվել ամբողջ Սերբիայում, այդ թվում՝ ուսանողական համայնքներում։ Ցուցարարները պահանջում են վարչապետ Միլոշ Վուչևիչի և Նովի Սադի քաղաքապետ Միլան Ջուրիչի հրաժարականը, ինչպես նաև ձերբակալել բոլոր այն անձանց, ովքեր, իրենց կարծիքով, մեղավոր են կատարվածի համար։

14:50 - 19 հունվարի, 2025

Հունգարիան և Սլովակիան արգելափակեցին Վրաստանի առաջնորդների դեմ ԵՄ պատժամիջոցների ընդունումը |azatutyun.am|

azatutyun.am: Հունգարիան և Սլովակիան դեկտեմբերի 16-ին արգելափակեցին վրացի պաշտոնյաների դեմ պատժամիցներ սահմանելու Եվրամիության առաջարկած փաթեթը։ Հունգարիայի և Սլովակիայի գործողությունները խոչընդոտում են նաև վրացի պաշտոնյաների դեմ մուտքի արտոնագրի արգելքի և ակտիվների սառեցման գործընթացին։ ԵՄ առաջնորդները ձգտում են պատժել Վրաստանի իշխանություններին այլախոհների նկատմամբ դաժան ճնշումների և ռուսամետ քաղաքականության համար: Եվրամիության դիվանագիտության ղեկավար Կայա Կալլասն նախքան Եվրոպական միության արտաքին հարաբերությունների խորհուրդի երեկվա նիստը հայտարարել էր, որ պատժամիջոցների ցանկն արդեն պատրաստ է։ «Իհարկե, բոլոր իրադարձությունները, որոնք տեղի են ունենում Վրաստանում, չեն գնում այն ուղղությամբ, որով պետք է շարժվի ԵՄ թեկնածու երկիրը։ Հետևաբար մենք պատրաստվում ենք քննարկել, թե ինչ հետևանքներ կլինեն վրացական կառավարության համար, որը բռնաճնշումներ է կիրառում ընդդիմության դեմ՝ օգտագործելով տարատեսակ գործիքներ», - ասել է ԵՄ բարձր ներկայացուցիչը: Հունգարիայի արտաքին գործերի նախարար Պետեր Սիյարտոն օրերս հայտարարել էր, որ Բուդապեշտը դեմ է վրացի պաշտոնյաների դեմ ցանկացած պատժամիջոց կիրառելու առաջարկին և վետո կկիրառի: Թբիլիսիում շարունակվում են իշխանությունների հրաժարականի պահանջով զանգվածային ցույցերը, որոնք սկսվեցին, երբ վարչապետ Իրակլի Կոբախիձեն հայտարարեց, որ ժամանակավորապես կասեցվում են Եվրոպական միության հետ անդամակցության բանակցությունները: Հազարավոր քաղաքացիներ Թբիլիսիի փողոցներում այս օրերին ցույցեր էին անում, որոնք ուղեկցվում են ուժայինների հետ բախումներով։

09:52 - 17 դեկտեմբերի, 2024

Վուչիչ․ «ԱՄՆ պատժամիջոցներ է սահմանելու Սերբիայի նավթային ոլորտի դեմ» |azatutyun.am|

azatutyun.am: «Միացյալ Նահանգները պատրաստվում է պատժամիջոցներ սահմանել Սերբիայի նավթային ոլորտի դեմ», - հայտարարել է այդ երկրի նախագահ Ալեքսանրդ Վուչիչը՝ նշելով, որ դրանք, ամենայն հավանականության, ուժի մեջ կմտնեն հունվարի 1-ից։ Վուչիչ պնդմամբ, պատժամիջոցների թիրախում է հայտնվելու «Սերբիայի նավթային արդյունաբերություն»(NIS) ընկերությունը, որի բաժնետոմսերի 56 տոկոսը պատկանում է «Գազպրոմնեֆտ» և «Գազպրոմ» ընկերություններին։ «Ամենայն հավանականությամբ, խոսքը շատ կոշտ պատժամիջոցների մասին է լինելու, որոնց ամերիկացիներից բացի կմիանա նաև Մեծ Բրիտանիան», - նշել է Վուչիչը՝ հավելելով․ - «Այս քայլը բոլորիս է վերաբերում, որովհետև երբ ընկերությունը հայտնվում է ամերիկյան պատժամիջոցների թիրախում, դրա հետ այլևս որևէ մեկն աշխատելու ցանկություն չի ունենում»։ Պաշտոնական Վաշինգտոնը Վուչիչի հայտարարությունները դեռ չի մեկնաբանել։

15:25 - 14 դեկտեմբերի, 2024

Կոսովոն ու Սերբիան միմյանց են մեղադրում ջրանցքում պայթյունի համար |azatutyun.am|

azatutyun.am: Կոսովոն ուժեղացրել է հսկողությունը «առանցքային» ենթակառուցվածքի շուրջ շաբաթ օրը իր երկու հիմնական էլեկտրակայանները սնուցող ջրանցքում տեղի ունեցած պայթյունից հետո։ Այդ ջրանցքը ապահովում է ածուխով աշխատող երկու էլեկտրակայանների հովացման համակարգերին անհրաժեշտ ջուրը, որ արտադրում են Կոսովոյի էլեկտրաէներգիայի մեծ մասը: Կոսովոյի վարչապետը անվտանգության խորհրդի նիստ է հրավիրել և հայտարարել, որ պայթյունի հետևում Սերբիան է՝ առանց ապացույցներ ներկայացնելու։ Սերբիան հերքել է մեղադրանքները, դատապարտել է պայթյունն ու իր հերթին Կոսովոյին մեղադրել պայթյունը կազմակերպելու մեջ՝ կոչ անելով միջազգային հետաքննություն անցկացնել։ Միացյալ Նահանգները խստորեն դատապարտել է «Կոսովոյի կարևոր ենթակառուցվածքների վրա հարձակումը», ասվում է Պրիշտինայում ԱՄՆ դեսպանատան ֆեյսբուքյան հաղորդագրության մեջ։ «Մենք ուշադիր հետևում ենք իրավիճակին և մեր աջակցությունն ենք առաջարկում Կոսովոյի կառավարությանը՝ այս հանցավոր հարձակման մեղավորներին բացահայտելու և պատասխանատվության ենթարկելու հարցում», - նշել է դեսպանատունը։

16:56 - 30 նոյեմբերի, 2024

Սերբիայում բողոքի ակցիայի մասնակից 14 մարդ է ձերբակալվել |azatutyun.am|

azatutyun.am: Սերբիայի Ներքին գործերի նախարարությունը նոյեմբերի 6-ին հայտարարել է, որ 14 անձինք բերման են ենթարկվել բողոքի ակցիայի ժամանակ և դրանից հետո։ Նրանցից մեկը հանրային հավաքի ժամանակ ենթադրյալ բռնի պահվածքի համար հանձնվել է անչափահասների գործերով դատավորին, երեք անձի մեղադրանք է առաջադրվել, իսկ մեկին ցուցմունք տալուց հետո ազատ են արձակել։ Նովի Սադի իշխանությունները ավելի վաղ հայտարարել էին, որ անկարգություններից հետո ընդհանուր առմամբ ինը մարդ է ձերբակալվել, իսկ մեկ անձի նկատմամբ հետախուզում է հայտարարվել։ Սերբիայում ցուցարարները նոյեմբերի 5-ին կարմիր ներկ և քարեր էին նետել Նովի Սադի քաղաքապետարանի վրա՝ պահանջելով պատասխանատվություն 14 մարդու մահվան համար։ Սերբիայի երկրորդ ամենամեծ քաղաքում երկաթուղային կայարանում բետոնե ծածկի փլուզմանհետևանքով զոհվել էր 14 մարդ, տասնյակ մարդիկ վնասվածքներ էին ստացել։

11:39 - 07 նոյեմբերի, 2024

Խորապես վշտացած ենք Սերբիայի երկաթուղային կայարանում տեղի ունեցած ողբերգական փլուզման կապակցությամբ. ՀՀ ԱԳՆ |1lurer.am|

1lurer.am: Հայաստանի արտգործնախարարությունը X-ի միկրոբլոգում հրապարակում է արել. «Խորապես վշտացած ենք Սերբիայի երկաթուղային կայարանում տեղի ունեցած ողբերգական փլուզման կապակցությամբ։ Ցավակցում ենք զոհվածների ընտանիքներին, տուժածներին մաղթում շուտափույթ ապաքինում։ Այս վշտալի պահին հայտնում ենք մեր համերաշխությունը»,- նշել է արտաքին քաղաքական գերատեսչությունը։

14:35 - 02 նոյեմբերի, 2024

Սերբիայի կայարանում բետոնե ծածկի փլուլզման հետևանքով 14 մարդ է զոհվել |azatutyun.am|

azatutyun.am: Առնվազն 14 մարդ է զոհվել երեկ Սերբիայի Նովի Սադ քաղաքի երկաթուղային կայարանի մուտքի բացօթյա բետոնե ծածկի փլուզման հետևանքով, հաղորդել է երկրի ներքին գործերի նախարարությունը: Դեպքի վայրում աշխատել են շուրջ ութ տասնյակ փրկարարներ և տեխնիկա, այդ թվում՝ վերամբարձ կռունկներ և էքսկավատորներ: Սերբիայի կառավարությունը նոյեմբերի 2-ը երկրում սգո օր է հայտարարել: Հաղորդագրությունների համաձայն՝ կայարանի շենքը վերջերս էր վերանորոգվել, սակայն այդ ծածկն աշխատանքներում չէր ընդգրկվել: Իշխանությունները վստահեցրել են, որ պատահարի քննություն կիրականացվի, մեղավորները կբացահայտվեն և պատասխանատվության կենթարկվեն:

11:10 - 02 նոյեմբերի, 2024

Սարգիս Խանդանյանը և Սերբիայի դեսպանն անդրադարձել են տարածաշրջանային անվտանգային հարցերի

Ազգային ժողովի արտաքին հարաբերությունների մշտական հանձնաժողովի նախագահ Սարգիս Խանդանյանը հունիսի 25-ին ընդունել է Հայաստանի Հանրապետությունում Սերբիայի արտակարգ և լիազոր դեսպան Տատյանա Պանայոտովիչ Ցվետկովիչին: Այդ մասին հայտնում են ՀՀ ԱԺ-ից: Ողջունելով հյուրին՝ Սարգիս Խանդանյանն ընդգծել է, որ առանձնահատուկ են Հայաստան-Սերբիա հարաբերությունները: Հանձնաժողովի նախագահի խոսքով՝ Սերբիան եվրոպական այն քիչ երկրներից է, ուր ՀՀ քաղաքացիները մեկնում են առանց մուտքի արտոնագրի պահանջի: Կողմերը խոսել են երկու երկրների օրենսդիր մարմինների միջև համագործակցության խորացման անհրաժեշտության մասին: Նշվել է, որ Սերբիայում տեղի ունեցած խորհրդարանական ընտրություններից հետո առաջիկայում Հայաստանի հետ կձևավորվի բարեկամական խումբ: Դեսպանը, շնորհակալություն հայտնելով ընդունելության համար, ընդգծել է, որ Սերբիան ու Հայաստանը բարեկամական երկրներ են և ունեն շատ նմանություններ: Տատյանա Պանայոտովիչ Ցվետկովիչը կարևորել է երկկողմ համագործակցությունը միջազգային տարբեր հարթակներում: Զրուցակիցներն արձանագրել են տնտեսական, անվտանգային, կրթական, մշակութային, զբոսաշրջության ոլորտներում փոխգործակցության զարգացման ուղղությամբ առկա ներուժի իրացման անհրաժեշտությունը: Հանդիպմանն անդրադարձ է եղել տարածաշրջանային անվտանգային հարցերի: Կողմերը կարևորել են Հարավային Կովկասում և Բալկաններում հարատև խաղաղության հաստատումը:

17:35 - 25 հունիսի, 2024

Սերբիան մտադիր չէ արդարանալ Ադրբեջանին, Կիպրոսին և ԱՄէ-ին սպառազինություն մատակարարելու համար․ Վուչիչ |1lurer.am|

1lurer.am: Սերբիան ռազմական նշանակության սարքավորումների արտադրությամբ և արտահանմամբ զբաղվում է գործող պայմանագրերին համապատասխան և մտադիր չէ արդարանալ իր գործողությունների համար: Այդ մասին հայտարարել է Սերբիայի նախագահ Ալեքսանդար Վուչիչը՝ ժողովրդին հղած ուղերձում: «Մենք սպառազինություն կամ զենք չենք արտահանում, մենք պայմանագիր ունենք միայն Ադրբեջանի, Կիպրոսի և մեկ արաբական երկրի՝ Արաբական Միացյալ Էմիրությունների հետ։ Մենք որևէ այլ երկրի հետ սպառազինություն և զենք մատակարարելու համաձայնագիր չունենք։ Դա արել ենք այն պատճառով, որ կարողանանք պաշտպանել մեզ, որպեսզի մեր եղբայրներից ոչ մեկը՝ ռուսները, ուկրաինացիները կամ ուրիշները, չսպանվեն սերբական զենքից։ Մենք այդ ամենը հաշվի ենք առնում»,- ընդգծել է Վուչիչը։ Նրա խոսքով՝ այդ հարցի շահարկումն ուղղված է ռուս-սերբական հարաբերությունների սրմանը։ Ավելի վաղ ՌԴ նախագահի մամուլի քարտուղար Դմիտրի Պեսկովը լրագրողներին հայտնել էր, որ Մոսկվան Բելգրադի հետ շփումներում կհստակեցնի այն տեղեկությունները, ըստ որոնց՝ Արևմուտքի երկրներին վաճառվող սերբական զինամթերքի մի մասը հասնում է Ուկրաինա:

12:29 - 25 հունիսի, 2024

Արարատ Միրզոյանը շնորհավորել է Սերբիայի նորանշանակ ԱԳ նախարարին |armenpress.am|

armenpress.am: Հայաստանի արտաքին գործերի նախարար Արարատ Միրզոյանը շնորհավորել է Մարկո Ջուրիչին Սերբիայի արտաքին գործերի նախարարի պաշտոնում նշանակվելու կապակցությամբ։ «Շնորհավորում եմ Մարկո Ջուրիչին Սերբիայի արտաքին գործերի նախարար նշանակվելու առիթով։ Միասնական ջանքերով մենք կարող ենք զարգացնել համագործակցությունը՝ հաշվի առնելով մեր առաջնահերթություններն ու առկա մարտահրավերները»,- X-ի իր միկրոբլոգում գրել է Միրզոյանը։ Ավելի ուշ Սերբիայի Հանրապետության արտաքին գործերի նորանշանակ նախարար Մարկո Ջուրիչն արձագանքել է Հայաստանի արտաքին գործերի նախարար Արարատ Միրզոյանին։ «Բարձր եմ գնահատում իմ գործընկերոջ՝ Արարատ Միրզոյանի ջերմ շնորհավորանքները։ Այս տարի, երբ մենք նշում ենք Սերբիա-Հայաստան դիվանագիտական հարաբերությունների 30-ամյակը, ես լավատես եմ մեր հետագա համագործակցության հեռանկարների առումով», - նշել է նորանշանակ նախարարը։

11:15 - 08 մայիսի, 2024

Արարատ Միրզոյանը հեռախոսազրույց է ունեցել Սերբիայի ԱԳ նախարարի հետ

Ապրիլի 25-ին ՀՀ արտաքին գործերի նախարար Արարատ Միրզոյանը հեռախոսազրույց է ունեցել Սերբիայի Հանրապետության առաջին փոխվարչապետ և արտաքին գործերի նախարար Իվիցա Դաչիչի հետ: Քննարկվել են երկկողմ օրակարգին առնչվող հարցեր՝ միտված քաղաքական երկխոսության ու փոխադարձ հետաքրքրություն ներկայացնող ոլորտներում համագործակցության զարգացմանը: Երկուստեք ընդգծվել է այդ նպատակով բարձրաստիճան փոխայցելությունների և պարբերական խորհրդակցությունների կարևորությունը: Զրուցակիցները մտքեր են փոխանակել բազմակողմ օրակարգին առնչվող հարցերի շուրջ։ Հայաստանի ու Սերբիայի ԱԳ նախարարներն անդրադարձել են տարածաշրջանային հարցերի։ Նախարար Միրզոյանն ընդգծել է Հարավային Կովկասում հարատև խաղաղության հասնելու, Հայաստանի ու Ադրբեջանի միջև հարաբերությունների կարգավորման հարցում, այդ թվում՝ սահմանազատման գործընթացում տարածքային ամբողջականության սկզբունքի անվերապահ հարգման և 1991թ. Ալմա-Աթայի հռչակագրին հանձնառության կարևորությունը:

19:10 - 25 ապրիլի, 2024