Ժոզեպ Բորել

Բորելը գնահատել է Ուկրաինայում ռուսական և ԵՄ զորքերի միջև բախման հավանականությունը |armenpress.am|

armenpress.am: ԵՄ դիվանագիտության ղեկավար Ժոզեպ Բորելը վստահություն է հայտնել, որ Ուկրաինայում Ռուսաստանի և եվրոպական զորքերի միջև բախում նախատեսված չէ։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։ «Մենք պատերազմող կողմ չենք, մենք պատերազմի մաս չենք, Ուկրաինայի տարածքում եվրոպական զորքեր չկան, ռազմի դաշտում բախում Ռուսաստանի և եվրոպական զորքերի միջև չի սպասվում», - ասել է Բորելը՝ Բրյուսելում Եվրամիության պաշտպանության նախարարների հանդիպմանը հաջորդած ասուլիսում։ Բորելը ևս մեկ անգամ ընդգծել է, որ ԵՄ-ն միայն ռազմական օգնություն է տրամադրում Կիևին։

22:29 - 19 նոյեմբերի, 2024

Բորելը հաստատել է, որ ԱՄՆ-ն Ուկրաինային թույլատրել է մինչև 300 կմ հեռահարությամբ հարվածներ հասցնել Ռուսաստանին |armenpress.am|

armenpress.am: ԵՄ դիվանագիտության ղեկավար Ժոզեպ Բորելը հաստատել է, որ Սպիտակ տունը հանել է Ուկրաինայի կողմից ամերիկյան զենքերով Ռուսաստանի տարածքի խորքերը հարվածելու սահմանափակումները։ Այս մասին նա հայտնել է նոյեմբերի 18-ին ԵՄ արտաքին հարաբերությունների խորհրդի նիստից հետո կայացած մամուլի ասուլիսում։ «Նախագահ Բայդենի վարչակազմը թույլատրել է ամերիկյան զենքերի կիրառումը Ռուսաստանի տարածքում՝ մինչև 300 կմ հեռավորության վրա», - ասել է Բորելը։ Խոսքը ամերիկյան ATACMS հրթիռների մասին է, որոնց հեռահարությունը 306 կմ է։ «Դա շատ մեծ հեռավորություն չէ, դա չի գնում երկրի խորքերը, բայց սա Բայդենի վարչակազմի որոշումն է։ Ինչո՞ւ է այս որոշումն ընդունվել հիմա և ոչ թե ընտրություններից առաջ՝ չգիտեմ»,- հավելել է նա։ ԵՄ արտաքին գործերի և անվտանգության քաղաքականության հարցերով բարձր ներկայացուցիչը չի բացահայտել իր աղբյուրները. ԱՄՆ պաշտոնյաները դեռ չեն հաստատել, որ Ուկրաինային թույլատրվել է ամերիկյան հեռահար զենք օգտագործել Ռուսաստանի դեմ։ Ամերիկյան բազմաթիվ լրատվամիջոցներ, վկայակոչելով իրենց աղբյուրներին, հայտնել են, որ ԱՄՆ նախագահ Ջո Բայդենն արտոնել է ուկրաինացի զինվորականների կողմից ATACMS հրթիռների կիրառումը Ռուսաստանի տարածքին հարվածներ հասցնելու համար: ՌԴ նախագահի մամուլի քարտուղար Դմիտրի Պեսկովը հայտարարել է, որ ամերիկյան զենքով Ռուսաստանի խորքերը հարվածելու թույլտվությունը Կիևին, եթե նման բան իրոք եղել է, կնշանավորի լարվածության որակապես նոր շրջափուլ և Վաշինգտոնի ներգրավվածության նոր մակարդակ Ուկրաինայում ընթացող հակամարտության մեջ։

12:33 - 19 նոյեմբերի, 2024

Բորելը հայտարարել է, որ եվրոպացիներին պետք է բացատրել Ուկրաինային 122 միլիարդ եվրո տրամադրելու անհրաժեշտությունը |armenpress.am|

armenpress.am: Եվրոպացիներին պետք է բացատրել Ուկրաինային աջակցելու անհրաժեշտությունը, քանի որ ոչ բոլորն են հասկանում, թե ինչ նպատակով պետք է այդ երկրի համար ծախսել 122 միլիարդ եվրո: Այդ մասին «Եվրոպեյսկայա պրավդա» պարբերականին տված հարցազրույցում հայտնել է Կիևում գտնվող ԵՄ դիվանագիտական ծառայության ղեկավար Ժոզեպ Բորելը։ «Եվրոպայում ոչ բոլորն են հասկանում, թե ինչու մենք պետք է ծախսենք 122 միլիարդ եվրոն Ուկրաինայի վրա: Գիտեք, 122 միլիարդ եվրոն շատ մեծ գումար է: Դա հասկանում են ոչ բոլոր եվրոպացիները, որոնք նույնպես ունեն իրենց սեփական կարիքները», - ասել է Բորելը։ Նա նշել է, որ ԵՄ-ն, գուցե, պետք է ավելին անի, որպեսզի Եվրոպայի քաղաքացիները հասկանան, թե ինչի համար է ուղղվում իրենց գումարը, այն է՝ «մեր հավաքական ազատության և մեր նպատակի աջակցության», քանի որ, ի վերջո, «այդ 122 միլիոն եվրոն դուրս է եկել այդ մարդկանց՝ հարկատուների գրպաններից»։ «Եթե մենք պարտվենք Ռուսաստանի քարոզչության դեմ պայքարում, եթե չկարողանանք համոզել նրանց, ապա անհնար կլինի շարունակել Ուկրաինային աջակցությունը», - հավելել է նա։ Կիև կատարած այցի ընթացքում Բորելը խոստացել է շարունակել ԵՄ-ի կողմից Ուկրաինային տրամադրվող օգնությունը, մինչև տարեվերջ ԵՄ-ի կողմից պատրաստված զինվորների թիվը 60 000-ից հասցնել 75 000-ի։ Բորելը պաշտոնաթող է լինում դեկտեմբերի 1-ին, որից հետո ԵՄ արտաքին գործերի և անվտանգության քաղաքականության հարցերով բարձր ներկայացուցչի պաշտոնում նրան կփոխարինի Էստոնիայի նախկին վարչապետ Կայա Կալլասը։

17:39 - 11 նոյեմբերի, 2024

Բորելը հայտարարել է, որ օրը Կիևում սկսել է ռմբապաստարանում |armenpress.am|

armenpress.am: ԵՄ արտաքին քաղաքական ծառայության ղեկավար Ժոզեպ Բորելը Կիև այցի ժամանակ կոչ է արել շարունակել ռազմական օգնություն ցուցաբերել Ուկրաինային։ Նա նաև հայտնել է, որ նոյեմբերի 11-ի առավոտն անցկացրել է ռմբապաստարանում։ «Օրս Կիևում սկսում եմ ապաստարանում, քանի որ Ռուսաստանը հերթական հրթիռային հարված է հասցնում։ Սա է ուկրաինացի ժողովրդի առօրյա իրականությունը Ռուսաստանի լայնածավալ ներխուժումից ի վեր», - գրել է Բորելը X սոցիալական հարթակում: Գրառմանը Բորելը կցել է լուսանկար՝ մարզահագուստով և «ապաստարան» ցուցանակով միջանցքում։ Ավելի վաղ իր այցի ընթացքում Բորելը խոստացել է շարունակել Եվրամիությունից Ուկրաինային օգնության տրամադրումը, ԵՄ-ի կողմից պատրաստված զինվորների թիվը մինչև տարեվերջ հասցնել 75 000-ի։ Բորելը պաշտոնաթող է լինում դեկտեմբերի 1-ին, որից հետո ԵՄ արտաքին գործերի և անվտանգության քաղաքականության հարցերով բարձր ներկայացուցչի պաշտոնում նրան կփոխարինի Էստոնիայի նախկին վարչապետ Կայա Կալլասը։

16:03 - 11 նոյեմբերի, 2024

Բորելը ժամանել է Կիև |1lurer.am|

1lurer.am: ԵՄ արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը ժամանել է Կիև: Դա Բորելի հինգերորդ այցն է Ուկրաինա պատերազմի սկսվելուց ի վեր և վերջինն է Եվրամիության դիվանագիտության ղեկավարի պաշտոնում։ «Ուկրաինայի համար Եվրամիության աջակցությունն իմ անձնական առաջնահերթությունն էր իմ մանդատի ընթացքում և կմնա ԵՄ օրակարգի առաջին տեղում»,- X-ի իր միկրոբլոգում գրել է Բորելը:

14:03 - 09 նոյեմբերի, 2024

Ժոզեպ Բորելը շնորհավորել է Դոնալդ Թրամփին և հայտարարել ուժեղ Եվրոպա ստեղծելու մասին |armenpress.am|

armenpress.am: Եվրամիության դիվանագիտության ղեկավար Ժոզեպ Բորելը ԱՄՆ-ի նորընտիր նախագահ Դոնալդ Թրամփին ուղղված շնորհավորական ուղերձում շարունակական համագործակցության հույս է հայտնել՝ միաժամանակ տեղեկացնելով ուժեղ և ինքնիշխան Եվրոպա կառուցելու ծրագրերի մասին։ «Արմենպրես»-ի հաղորդմամբ՝ Բորելը համապատասխան գրառում է կատարել X ցանցում։ «Արտաքին գործերի և անվտանգության ընդհանուր քաղաքականության շրջանակներում Եվրամիությունը ջանք չի խնայի ԱՄՆ-ի հետ ակտիվ հարաբերություններ պահպանելու համար: Միևնույն ժամանակ, ԵՄ-ն կշարունակի կատարել իր պարտավորությունները տարբեր ոլորտներում՝ սկսած պաշտպանությունից և անվտանգությունից մինչև կլիմայական խնդիրներ, որպեսզի կառուցի ուժեղ և ինքնիշխան Եվրոպա»,- գրել է Բորելը։ Նա նշել է նաև, որ Թրամփի ընտրությունը հետևանքներ կունենա գլոբալ անվտանգության տեսանկյունից մտահոգություն առաջացնող բոլոր տարածաշրջանների համար, ներառյալ Մերձավոր Արևելքը և Ուկրաինան:

21:41 - 06 նոյեմբերի, 2024

Վրաստանը, որպես ԵՄ-ին անդամակցելու թեկնածու, պետք է ցույց տա իր հավատարմությունը եվրոպական արժեքներին. Բորել |1lurer.am|

1lurer.am: Վրաստանում խորհրդարանի ընտրությունից հետո տեղի ունեցած զարգացումները շատ մտահոգիչ են՝ նշված է ԵՄ արտաքին գործերի և անվտանգության քաղաքականության հարցերով բարձր ներկայացուցչի հայտարարության մեջ։ «Միջազգային դիտորդները հայտնել են ընտրարշավի ընթացքում, ինչպես նաև ընտրության օրը տեղի ունեցած խախտումների մասին: Նրանք ընտրությունները չեն համարել ազատ և արդար։ Խնդրում եմ թափանցիկ հետաքննություն անցկացնել։ Վրաստանի կենտրոնական ընտրական հանձնաժողովը և իշխանության համապատասխան մարմինները պետք է հետաքննեն ընտրական գործընթացի նկատմամբ հանրային վստահության վրա ազդող խախտումները, ճնշումներն ու ահաբեկումները, որոնց մասին հայտնում են դիտորդները: Այս խախտումները պետք է վերացվեն արագ, թափանցիկ և ինքնուրույն»,- նշել է Ժոզեպ Բորելը: Նրա խոսքով՝ Վրաստանը ԵՄ-ին անդամակցելու թեկնածու երկիր է, և պետք է ցույց տա իր հավատարմությունը եվրոպական արժեքներին՝ սկսելով ընտրական գործընթացի լիակատար թափանցիկությունից: Նա տեղեկացրել է, որ քաղաքականության և անվտանգության հարցերի հանձնաժողովը հրատապ քննարկում կանցկացնի Վրաստանում իրավիճակի վերաբերյալ։ «Վրաստանի ժողովուրդն արդեն մի քանի ամիս է, ինչ ցույց է տալիս իր հավատարմությունը ժողովրդավարական արժեքներին, ինչպես նաև երկիրը ԵՄ ճանապարհով առաջ տանելու հարցում: Նրանք արժանի են հստակության ընտրական գործընթացի վերաբերյալ, որպեսզի վստահություն ունենան հաջորդ կառավարության լեգիտիմության նկատմամբ: Կարևոր է, որ բողոքի ցույցերն ու դրանց նկատմամբ կառավարության արձագանքը խաղաղ լինեն»,- նշել է Բորելը: Նա հավելել է, որ անհրաժեշտ է հակադարձել երկրում ժողովրդավարացման հետընթացին և երաշխավորել բարենպաստ միջավայր ԶԼՄ-ների, քաղաքացիական հասարակության և ընդդիմության համար:

18:58 - 29 հոկտեմբերի, 2024

ԵՄ-ն երկու տարով կերկարաձգի Ուկրաինայում իր ռազմական առաքելության մանդատը |armenpress.am|

armenpress.am: ԵՄ-ն որոշել է Ուկրաինայում իր ռազմական առաքելության մանդատը երկարաձգել երկու տարով։ Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը Լյուքսեմբուրգում ԵՄ արտգործնախարարների հանդիպումից հետո կազմակերպված մամուլի ասուլիսում։ «Մենք որոշել ենք, որ Ուկրաինայում մեր առաքելության մանդատը կերկարաձգենք երկու տարով»,- ասել է նա։

21:17 - 14 հոկտեմբերի, 2024

Բորելը հայտնել է Իսրայելին զենքի մատակարարումների հարցում ԵՄ-ում առկա տարաձայնությունների մասին |armenpress.am|

armenpress.am: Եվրամիությունում սուր տարաձայնություններ են ծագել Իսրայելին զենքի մատակարարումների դադարեցման հարցի շուրջ. ԵՄ մի շարք երկրներ, հակառակը, հանդես են գալիս մատակարարումների ավելացման օգտին։ Այս մասին հայտարարել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը Լյուքսեմբուրգում ԵՄ արտգործնախարարների հանդիպմանը ժամանելուն պես։ «Այդ (խմբ.՝ Իսրայելին զենքի մատակարարումների) խնդիրը մնում է ազգային իրավասությունների շրջանակում։ Անդամ երկրներն այս հարցում լուրջ տարաձայնություններ ունեն: Եվրամիության մի շարք երկրներ, ընդհակառակը, հանդես են գալիս մատակարարումների ավելացման օգտին: Մենք դա կքննարկենք, բայց ես արդյունք չեմ ակնկալում», - ասել է նա: Բորելը նաև քննադատել է Իսրայելի կողմից ՄԱԿ-ի խաղաղապահների դիրքերի գնդակոծումը՝ դա անվանելով «լիովին անընդունելի»։ Լյուքսեմբուրգում հոկտեմբերի 14-ին անցկացվում է ԵՄ խորհրդի արտաքին գործերի նախարարների նիստը, որի ընթացքում նախատեսվում է քննարկել Ուկրաինային Եվրամիության և նրա անդամ երկրների ռազմական աջակցությունը, ինչպես նաև Մերձավոր Արևելքում տիրող իրադրությունը։

13:00 - 14 հոկտեմբերի, 2024

Ֆրանսիայի Ազգային ժողովում ձախողվել է Բարնիեի կառավարությանն անվստահություն հայտնելու քվեարկությունը |1lurer.am|

1lurer.am: Ֆրանսիայի Ազգային ժողովի պատգամավորների մեծամասնությունը դեմ է քվեարկել վարչապետ Միշել Բարնիեին և նրա կառավարությանն անվստահություն հայտնելուն, Բարնիեի կաբինետը շարունակում է կառավարել, հայտարարել է խորհրդարանի ստորին պալատի նախագահ Յաել Բրոն-Պիվեն։ «Նոր ժողովրդական ճակատ» (NFP) ձախ կոալիցիայի նախաձեռնությամբ ձեռնարկված քվեարկությունը, որը ստորագրել էր 192 պատգամավոր, նպատակ ուներ չճանաչել նախագահ Էմանուել Մակրոնի կողմից Բարնիեի և նրա կառավարության նշանակումը, որը ձախերը գնահատում են «օրենսդիր ընտրության արդյունքի ժխտում»: Նրանց համոզմամբ, նախագահը պետք է վարչապետ նշանակեր «Նոր Ժողովրդական ճակատի» ներկայացրած թեկնածուին, քանի որ Ազգային ժողովում կոալիցիան ամենաշատ տեղերն էր ստացել: Միաժամանակ նշվում է, որ անվստահության քվեն չէր կարող իրականացվել առանց ծայրահեղ աջակողմյան «Ազգային միավորման» ձայների աջակցության։ Կուսակցության խորհրդարանական խմբակցությունը նախապես հայտարարել էր, որ այս փուլում կողմ չի քվեարկելու կառավարությանն անվստահություն հայտնելու նախագծին։ Անվստահության քվեն հաստատելու համար անհրաժեշտ է հավաքել 289 ձայն, մինչդեռ կողմ էր քվեարկել 197 պատգամավոր։ Ավելի վաղ Ազգային ժողովի խմբակցությունների ղեկավարների համաժողովը մերժել էր ձախերի մեկ այլ նախագիծ՝ Մակրոնին իշխանությունից հեռացնելու բանաձևը։

12:42 - 09 հոկտեմբերի, 2024

Բորելը Եվրախորհրդարանում հայտարարել է, որ Վրաստանը հեռանում է Եվրամիությունից |1lurer.am|

1lurer.am: Վրաստանի իշխանություններն ընդունում են օրենքներ, որոնք երկիրը հեռացնում են Եվրամիությանն անդամակցությունից, հայտարարել է ԵՄ դիվանագիտության ղեկավար Ժոզեպ Բորելը։ «Անցյալ տարի դեկտեմբերին, երբ Վրաստանը ստացավ ԵՄ թեկնածուի կարգավիճակ, մենք հույս ունեինք, որ դա մեծ խթան կհանդիսանա կառավարության համար՝ իրականացնելու զգալի բարեփոխումներ ԵՄ-ի հետ բանակցություններ սկսելու ուղղությամբ, փոխարենը՝ վերջին ամիսներին կառավարող մարմիններն առաջարկել են օրենքներ, որոնք երկիրը հեռացրել են այս նպատակից: Միևնույն ժամանակ, Եվրամիության դեմ ուղղված հռետորաբանությունն ավելի բարձր է դարձել»,- ասել է Բորելը երեքշաբթի Ստրասբուրգում` ելույթ ունենալով Եվրախորհրդարանի լիագումար նիստում: ԵՄ դիվանագիտության ղեկավարը նշել է, որ ԵՄ-ն «պատասխանել է համապատասխան միջոցներով. ընդհատվել է Եվրամիությանը Վրաստանի անդամակցության գործընթացը, նվազել են քաղաքական շփումները, կասեցվել է Խաղաղության եվրոպական հիմնադրամից 30 միլիոն եվրոյի աջակցությունը, քանի դեռ օգնության պորտֆելը վերանայվում է»: Նա ընդգծել է, որ «խորհրդարանի առաջիկա ընտրությունը լուրջ փորձություն է լինելու Վրաստանում ժողովրդավարության համար, և Եվրամիությունն ուշադիր հետևելու է այդ ընտրության անցկացմանը»։

12:36 - 09 հոկտեմբերի, 2024

Բորելը դատապարտել է փեյջերների պայթյունները Լիբանանում |factor.am|

factor.am: Եվրոպական դիվանագիտության ղեկավար Ժոզեպ Բորելը հեռախոսազրույց է ունեցել Լիբանանի արտաքին գործերի նախարար Աբդալլահ Բու Հաբիբի հետ երկրում փեյջերների զանգվածային պայթյունից հետո՝ դատապարտելով հարձակումը։ «Չնայած, ինչպես երևում է, հարձակումները նպատակային են եղել, դրանք հանգեցրել են խաղաղ բնակիչների շրջանում զոհերի, այդ թվում՝ երեխայի մահվան: Ես չափազանց մտահոգիչ եմ համարում այս իրավիճակը։ Ես կարող եմ միայն դատապարտել այդ հարձակումները, որոնք վտանգում են Լիբանանի անվտանգությունն ու կայունությունը»,- ասվում է եվրոպական դիվանագիտության ղեկավարի հայտարարության մեջ։ Նա հավելել է, որ տեղի ունեցածը միայն մեծացնում է տարածաշրջանում հակամարտության սրման վտանգը։ Բորելը նաև ասել է, որ ԵՄ-ն կոչ է անում բոլոր «շահագրգիռ կողմերին» կանխել լայնածավալ պատերազմը։ Սեպտեմբերի 17-ին Լիբանանում փեյջերների զանգվածային պայթյուններ են տեղի ունեցել։ Reuters-ը, վկայակոչելով իր աղբյուրներին, հայտնել է, որ իսրայելական «Մոսադը» պայթուցիկներ է տեղադրել 5 հազար փեյջերի մեջ, որոնք ներկրել է «Հըզբոլլահ»-ը։

20:31 - 18 սեպտեմբերի, 2024

Բորելը Վրաստանին կոչ է արել չեղարկել ԼԳԲՏ քարոզչության արգելքի մասին օրենքը |news.am|

news.am: Եվրամիության դիվանագիտության ղեկավար Ժոզեպ Բորելը Վրաստանի իշխանություններին կոչ է արել չեղարկել այն օրենքը, որը վերաբերում է ԼԳԲՏ քարոզչության եւ սեռը փոխելու արգելքին, որը, նրա հավաստիացմամբ, «էլ ավելի է երկիրը հեռացնում ԵՄ տանող ճանապարհից»։ Նա այսպիսի դիրքորոշում է հայտնել X սոցցանցի իր էջում։ «Վրաստանի խորհրդարանը ընդունել է օրենքներ «ընտանեկան արժեքների եւ անչափահասների պաշտպանության մասին», որոնք խափանում են մարդկանց հիմնական իրավունքներն ու ուժեղացնում խտրականությունը։ Ես Վրաստանին կոչ եմ անում չեղարկել այդ օրենքը, որն էլ ավելի է շեղում երկիրը ԵՄ ճանապարհից»,- գրել է Բորելը։ Հիշեցնենք, որ Վրաստանի խորհրդարանը երրորդ և վերջին ընթերցմամբ ընդունել է «ԼԳԲՏ քարոզչությունը, միասեռ ամուսնությունները և սեռը փոխելու նպատակով բժշկական միջամտությունները» արգելող օրենքի նախագիծը: Նախագիծը խորհրդարան էր բերել իշխող «Վրացական երազանք» կուսակցությունը։

13:53 - 18 սեպտեմբերի, 2024

Բորելը պնդում է՝ Կիևն իրավունք ունի թիրախավորել այն վայրերը, որտեղից հարձակվում են իր վրա |azatutyun.am|

azatutyun.am: Եվրամիության բարձրաստիճան դիվանագետ Ժոզեպ Բորելը շարունակում է ճնշում գործադրել Ուկրաինայի արևմտյան դաշնակիցների վրա՝ հանելու զենքի օգտագործման սահմանափակումները՝ պնդելով, որ Կիևն իրավունք ունի թիրախավորել այն վայրերը, որտեղից հարձակվում են իր վրա: Ելույթ ունենալով Բրյուսելում՝ Բորելը «անհեթեթ է» որակել պնդումը, թե Ռուսաստանի տարածքում թիրախավորում թույլ տալը նշանակում է ուղղակի պատերազմ վարել Մոսկվայի դեմ: «Ոչ ոք չի ուզում» պատերազմ Ռուսաստանի հետ։ Բայց ձեզ դրեք ուկրաինացիների տեղը. ռուսները ձեզ ռմբակոծում են մի տեղից, որտեղ չեք կարող հասնել: Դուք կցանկանայիք հավասար պայքարել», - ասել է Բորելը։ Ուկրաինայի պաշտոնյաները, այդ թվում՝ նախագահ Վլադիմիր Զելենսկին, բազմիցս են դիմել դաշնակիցներին «վճռական գործողություններ» ձեռնարկել և թույլ տալ Ուկրաինային Արևմուտքի տրամադրած զենքով հարվածել Ռուսաստանի խորքում գտնվող ռազմական օբյեկտներին: Այս ամսվա սկզբին Ուկրաինան ներխուժեց Ռուսաստանի տարածք, ինչից հետո Զելենսկին հայտարարեց՝ Ռուսաստանը «պետք է զգա, թե ինչ է արել»։ Ուկրաինացի պաշտոնյաների խոսքով՝ չնայած նոր զենքերի մատակարարմանը, զինված ուժերը դեռևս գտնվում են անբարենպաստ վիճակում, քանի որ Արևմուտքի սահմանափակումները թույլ չեն տալիս Ուկրաինային օգտագործել հեռահար զենքեր ռուսական տարածքի խորքերը հարվածելու համար:

17:38 - 30 օգոստոսի, 2024

Բորելը և Իրանի նոր արտգործնախարարը հեռախոսազրույց են ունեցել |armenpress.am|

armenpress.am: Իրանի արտգործնախարար Աբբաս Արաղչին և ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը հեռախոսազրույցի ընթացքում քննարկել են Թեհրանի և Եվրոպայի հարաբերությունները, Գազայի հատվածում ընթացող պատերազմը և այլ հարցեր։ Այս մասին հաղորդում է Mehr լրատվական գործակալությունը։ «Իրանի Իսլամական Հանրապետությունը ողջունում է Եվրամիության հետ հարաբերությունների զարգացումը փոխադարձ հարգանքի վրա հիմնված մթնոլորտում, և դա պահանջում է երկխոսություն՝ լուծելու նրանց միջև առկա խնդիրները և շտկելու եվրոպական երկրների սխալ քաղաքականությունը», - ասել է Իրանի բարձրաստիճան դիվանագետը։ Բորելն իր հերթին շնորհավորել է Արաղչիին արտգործնախարարի պաշտոնում նշանակվելու կապակցությամբ և հույս է հայտնել, որ նախագահ Մասուդ Փեզեշքիանի վարչակազմի օրոք Իրանի և ԵՄ-ի միջև քաղաքական երկխոսությունն ու խորհրդակցությունները կշարունակվեն և կընդլայնվեն։ Կողմերը նաև քննարկել են Իրանի նկատմամբ պատժամիջոցների վերացման շուրջ բանակցությունները, ինչպես նաև Գազայի հատվածում Իսրայելի և պաղեստինյան ՀԱՄԱՍ արմատական շարժման միջև պատերազմը։

16:38 - 23 օգոստոսի, 2024

Պուտինն այժմ ստիպված է նահանջել Ռուսաստանի տարածք․ Բորել |tert.am|

tert.am: Պուտինը չկարողացավ կոտրել ուկրաինական բանակի դիմադրությունը իր չարդարացված ներխուժման նկատմամբ, և այժմ ստիպված է նահանջել Ռուսաստանի տարածք։ Այս մասին գրել է ԵՄ արտաքին գործերի և անվտանգության քաղաքականության հարցերով գերագույն հանձնակատար Ժոզեպ Բորելը «Ես վերահաստատեցի ԵՄ-ի լիակատար աջակցությունը Ուկրաինայի ժողովրդի պայքարին»,- գրել է նա։

22:59 - 13 օգոստոսի, 2024