ՆԱՏՕ

Հյուսիսատլանտյան դաշինքի կազմակերպությունը Հյուսիսատլանտյան պայմանագիրը ստորագրած անդամ-երկրների ստեղծած ռազմաքաղաքական կազմակերպությունն է, որը նպատակ է հետապնդում հավաքական անվտանգության և պաշտպանություն պարտականությունների իրականացումը։ Հիմնադրվել է 1949 թ․ ապրիլի 4-ին։ Հաճախ անվանում են ՆԱՏՕ՝ անգլերեն բառերի հապավումից։

ՆԱՏՕ-ին անդամակցում են 29 երկիր, որոնցից 27-ը եվրոպական են, երկուսը՝ հյուսիս-ամերիկյան: Հյուսիսատլանտյան դաշինքի որոշում կայացնող գլխավոր մարմինը Հյուսիսատլանտյան դաշինքի խորհուրդն է, իսկ միջազգային բարձրագույն պաշտոնյան՝ ՆԱՏՕ-ի գլխավոր քարտուղարը։

Թուրքիան կսկսի ՆԱՏՕ-ին անդամակցելու վերաբերյալ Ֆինլանդիայի հայտի վավերացման գործընթացը. Էրդողան |1lurer.am|

1lurer.am: Թուրքիայի նախագահ Էրդողանն Անկարայում բանակցություններ է վարել Ֆինլանդիայի նախագահ Սաուլի Նիինիստոյի հետ: Օրակարգում ՆԱՏՕ-ին Հելսինկիի և Ստոկհոլմի հնարավոր անդամակցության հարցն էր: «Մենք որոշում ենք կայացրել խորհրդարանում սկսել ՆԱՏՕ-ին անդամակցելու վերաբերյալ Ֆինլանդիայի հայտի վավերացման գործընթացը»,- հայտարարել է Էրդողանը ֆինն գործընկերոջ հետ մամուլի ասուլիսի ժամանակ: Նրա խոսքով՝ Անկարան Հելսինկիի կողմից «անկեղծ և վճռական քայլեր է տեսել դաշինքին անդամակցելու համար Թուրքիայի առաջ ստանձնած պարտավորությունների կատարման ուղղությամբ»: Անդրադառնալով Շվեդիային՝ Էրդողանը նշել է, որ ՆԱՏՕ-ին Շվեդիայի անդամակցությունը կախված կլինի Ստոկհոլմի հետագա քայլերից. Շվեդիան դեռևս Թուրքիային չի արտահանձնել ահաբեկիչներին: ՆԱՏՕ-ին Ֆինլանդիայի և Շվեդիայի անդամակցության վերաբերյալ հայտերը չեն վավերացրել անդամ պետություններից Թուրքիան և Հունգարիան:

19:53 - 17 մարտի, 2023

Քըլըչդարօղլուն հաղթանակի դեպքում Ռուսաստանի հետ իրավահավասար հարաբերություններ կպահպանի |1lurer.am|

1lurer.am: Թուրքիայում մայիսի 14-ին նախատեսված նախագահական ընտրություններում ընդդիմադիր թեկնածու Քեմալ Քըլըչդարօղլուի հաղթանակի դեպքում Անկարան կձգտի Ռուսաստանի հետ իրավահավասար հարաբերությունների, սակայն նաև կհիշեցնի Մոսկվային, որ Թուրքիան ՆԱՏՕ-ի անդամ է: Այս մասին հայտարարել է ընդդիմության միասնական թեկնածուի խորհրդական Ունալ Չևիքյոզը։ Քըլըչդարօղլուն նաև խոստանում է առնվազն 5 տարով արգելել օտարերկրացիներին երկրում գույք ձեռք բերել։ Նշվում է նաև, որ Քըլըչդարօղլուն չի խոչընդոտի ՆԱՏՕ-ին Շվեդիային և Ֆինլանդիային անդամակցության գործընթացը։

12:44 - 17 մարտի, 2023

Մեզ անհրաժեշտ է միջազգային խաղաղապահների մեխանիզմ, որը կերաշխավորի ԼՂ ժողովրդի իրավունքներն ու անվտանգությունը․ ՆԱՏՕ-ի նախկին գլխավոր քարտուղար |tert.am|

tert.am: Մեզ անհրաժեշտ է միջազգային խաղաղապահների մեխանիզմ, որը կերաշխավորի ԼՂ ժողովրդի իրավունքներն ու անվտանգությունը։ Առաջին ալիքի՝ Պետրոս Ղազարյանի հետ հարցազրույցի ժամանակ ասել է «Ռասմուսեն Գլոբալ» կազմակերպության նախագահ, ՆԱՏՕ-ի նախկին գլխավոր քարտուղար Անդերս ֆոգ Ռասմուսենը․ «Ես այստեղ եմ ՀՀ կառավարության հրավերով՝ օգնելու Հայաստանին ավելի ամուր կապեր ունենալ հատկապես ԵՄ և Արևմուտքի հետ։ Հայաստանը վստահելի ընկերների կարիք ունի և ես կփորձեմ օգնել ձեզ ստանալ այդ ընկերներին։ Լաչինի միջանցքի շրջափակումն անմարդկային է և անօրինական։ Հնարավորություն ունեցա խոսել մարդկանց հետ, ովքեր բնակվել են Լեռնային Ղարաբաղում։ Նրանցից մեկը բուժքույր Անուշն էր, ով ինձ պատմեց պարենի ու դեղորայքի պակասի մասին։ Շաբաթներ առաջ Արդարադատության միջազգային դատարանը որոշում կայացրեց, սա պարտադիր կատարման որոշում է։ Այս շրջափակումը միջազգային իրավունքի խախտում է։ Ուղերձ եմ հղում Իլհամի Ալիևին՝ անհապաղ դադարեցնել շրջափակումը։ Ես հավատում եմ, որ նախագահ Ալիևը չի ցանկանում դառնալ միջազգային ագրեսոր, ինչպես նախագահ Պուտինը։ Կխրախուսեի ԵՄ-ին առավելագույնի հասցնել իր ճնշումը Ալիևի վրա։ Քանի որ, ինչպես մենք գիտենք, ԵՄ-ն արդեն Ադրբեջանի էներգետիկ համագործակցություն ունի, դա կարող է գերազանց հարթակ լինել, որտեղ Ալիևին ասեն, որ դուք չեք կարող խախտել միջազգային իրավունքը և մնալ անպատիժ։ Նաև խրախուսում եմ ԵՄ-ին ավելացնել դիտորդական առաքելությունը Հայաստանում, համոզվելու համար, որ Ադրբեջանը կխուսափի Հայաստանի դեմ հետագա ագրեսիայից և համոզվել, որ խաղաղության պայմանագիրը արդար կլինի այն առումով, որ կերաշխավորի ԼՂ ժողովրդի իրավունքներն ու անվտանգությունը։ Մեզ անհրաժեշտ է միջազգային խաղաղապահների մեխանիզմ, որը կերաշխավորի ԼՂ ժողովրդի իրավունքներն ու անվտանգությունը»,-նշել է Ռասմուսենը։

22:34 - 15 մարտի, 2023

Լաչինի միջանցքի շրջափակումն անօրինական է. ՆԱՏՕ-ի նախկին գլխավոր քարտուղար |1lurer.am|

1lurer.am: Վերջին անգամ Հայաստան այցելել եմ 2012 թվականին որպես ՆԱՏՕ-ի գլխավոր քարտուղար: Այդ ժամանակից ի վեր շատ բան է տեղի ունեցել: Երեկ հանդիպել եմ վարչապետի, ԱԳ նախարարի, պաշտպանության նախարարի հետ և գոհունակություն եմ հայտնել առ այն, թե ինչ ջանքեր են իրենք ներդրել, որպեսզի ապահովեն Հայաստանում ժողովրդավարությունը: Այդ մասին Ջերմուկում լրագրողների հետ ճեպազրույցում ասաց ՆԱՏՕ-ի նախկին գլխավոր քարտուղար, «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ Անդերս Ֆոգ Ռասմուսենը: Նրա խոսքով՝ ինքը ժամանել է պաշտոնական Երևանի հրավերով, որպեսզի օգնի ՀՀ կառավարությանը՝ ամրապնդելու կապերը Արևմուտքի և ԵՄ-ի հետ: «Երեկ հանդիպումներ եմ ունեցել Երևանում, իսկ այսօր այցելել եմ Հայաստանի հարավային մարզերը, որպեսզի իմ աչքերով տեսնեմ ադրբեջանական ագրեսիայի հետևանքները: Հենց նոր այցելեցի հրաշալի Ջերմուկ, և քաղաքապետն ինձ ասաց, թե ինչ բացասական ազդեցություն են ունեցել ադրբեջանական հարձակումները քաղաքի տուրիզմի վրա»,- ասաց Անդերս Ֆոգ Ռասմուսենը: Նշենք՝ ավելի վաղ Ռասմուսենն այցելել էր Լաչինի միջանցքի սկզբնամաս: «Ինչպես գիտեք, Լաչինի միջանքը միակ կապն է ՀՀ և ԼՂ միջև: Անցած տարվա դեկտեմբերից ՀՀ և ԼՂ միջև ճանապարհը շրջափակման մեջ է: Այս շրջափակումը ո՛չ մարդկային է, ո՛չ էլ օրինական: Ես հանդիպեցի մարդկանց հետ, որոնք ապրել են ԼՂ-ում, և նրանք պատմեցին այն ճգնաժամային վիճակի մասին, որ տիրում է Ղարաբաղում: Շրջափակում նշանակում է, որ պարեն կամ դեղորայք միայն շատ փոքր քանակով կարելի է հասցնել ԼՂ, ինչը նշանակում է պարենի կամ կյանքի համար անհրաժեշտ դեղորայքի պակաս ԼՂ-ում: Դա մարդասիական ճգնաժամ է, որը կարող է վերածվել հումանիտար աղետի: Այս շրջափակումն անօրինական է»,- հայտեց Ռասմուսենը: Նա հիշեցրեց, որ մի քանի շաբաթ առաջ Արդարադատության միջազգային դատարանը որոշում է կայացրել, որով պարտադրում է Ադրբեջանին ապահովել Լաչինի միջանցքով անխոչընդոտ տեղաշարժը Լաչինի միջանցքով և հասանելությունը ԼՂ: «Որոշումը պարտադիր է, ինչը նշանակում է, որ Ադրբեջանը պարտավոր է բացել միջանցքը ազատ հասանելիության, ազատ տեղաշարժի համար: Ուստի այսօր ես հստակ ուղերձ եմ ուղարկում Ադրբեջանի նախագահ Ալիևին և ասում եմ՝ վերացրու շրջափակումն անհապաղ»,- ասաց ՆԱՏՕ-ի նախկին գլխավոր քարտուղարը:

17:35 - 14 մարտի, 2023

ՆԱՏՕ-ի նախկին գլխավոր քարտուղարն այցելել է Լաչինի միջանցքի սկզբնամաս |armenpress.am|

armenpress.am: Ադրբեջանի կողմից Լաչինի միջանցքի ապօրինի շրջափակման պայմաններում «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենն այցելել է միջանցքի սկզբնամաս, ծանոթացել տիրող իրավիճակին: ՆԱՏՕ-ի նախկին գլխավոր քարտուղարն այս օրերին հանդիպումներ է ունեցել Հայաստանի բարձրաստիճան պաշտոնյաների հետ, իսկ մարտի 14-ին նա Ջերմուկ է այցելել, որտեղ հանդես կգա ճեպազրույցով:

14:46 - 14 մարտի, 2023

Վարչապետն ընդունել է ՆԱՏՕ-ի նախկին գլխավոր քարտուղարին

Վարչապետ Նիկոլ Փաշինյանն ընդունել է «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենին և նրա գլխավորած պատվիրակությանը: Այս մասին հայտնեցին ՀՀ վարչապետի աշխատակազմից: Նիկոլ Փաշինյանը և Անդերս Ֆոգ Ռասմուսենը ջերմությամբ են հիշել ս.թ. փետրվարի 18-ին Մյունխենի անվտանգության համաժողովի շրջանակում ունեցած հանդիպումը: Զրուցակիցները մտքեր են փոխանակել տարածաշրջանային զարգացումների և անվտանգային մարտահրավերների շուրջ: Քննարկվել են Հարավային Կովկասում անվտանգությանն ու կայունությանը վերաբերող հարցեր, երկուստեք կարևորվել են այդ ուղղությամբ շարունակական ջանքերը:

17:43 - 13 մարտի, 2023

Սուրեն Պապիկյանը ՆԱՏՕ-ի նախկին գլխավոր քարտուղարին է ներկայացրել տարածաշրջանի վերջին զարգացումները

ՀՀ պաշտպանության նախարար Սուրեն Պապիկյանն այսօր ընդունել է «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր նախագահ և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենին ու կազմակերպության ներկայացուցիչներին: Հյուրի խնդրանքով պաշտպանության նախարարը ներկայացրել է տարածաշրջանի վերջին զարգացումները և դրանց հետևանքով ստեղծված իրադրությունը: Հանդիպմանը քննարկվել են տարածաշրջանային անվտանգությանն առնչվող մի շարք հարցեր:

11:50 - 13 մարտի, 2023

Թուրքիան, Շվեդիան և Ֆինլանդիան այսօր Բրյուսելում կքննարկեն ՆԱՏՕ-ին Սկանդինավյան երկրների անդամակցության հարցը |factor.am|

factor.am: Բրյուսելում այսօր տեղի կունենա ՆԱՏՕ-ին Ստոկոլմի և Հելսինկիի անդամակցության վերաբերյալ Թուրքիայի, Շվեդիայի և Ֆինլանդիայի պատվիրակությունների եռակողմ հանդիպումը, գրում է almayadeen-ը։ Թուրքիան և Հունգարիան մնում են ՆԱՏՕ-ի միակ անդամները, որոնք դեռևս չեն վավերացրել Սկանդինավյան երկրների հայտերը։ Ստոկհոլմում թուրքական ղեկավարության դեմ ցույցերը և Ղուրանի այրումը յուղ լցրեցին կրակի վրա՝ է՛լ ավելի խորացնելով խզումն ու լարվածությունը Թուրքիայի և Շվեդիայի միջև: Անկարան դատապարտեց միջադեպը և հայտարարեց, որ չի աջակցի Շվեդիային ՆԱՏՕ-ին անդամակցելու հարցում՝ դադարեցնելով բանակցությունները, մինչդեռ Ֆինլանդիայի նկատմամբ Անկարայի դիրքորոշումը կարող է տարբեր լինել, եթե այդ երկիրը միայնակ դիմի դաշինքին անդամակցության հարցով։ Բացի այդ, Անկարան երկու երկրներից պահանջում է արտահանձնել «քուրդ ահաբեկիչներին»։ Թուրքիայի կոշտ դիրքորոշումը փոքր-ինչ մեղմացավ փետրվարի 6-ի ավերիչ երկրաշարժերից հետո։ Փետրվարի վերջին ՆԱՏՕ-ի գլխավոր քարտուղար Յենս Ստոլտենբերգը հայտարարեց, որ Թուրքիայի նախագահ Ռեջեփ Էրդողանի հետ պայմանավորվել են վերսկսել բանակցությունները։

17:09 - 09 մարտի, 2023

Զաքիր Հասանովը հանդիպել է ՆԱՏՕ-ի ցամաքային զորքերի հրամանատարության շտաբի պետ, թուրք գեներալ-լեյտենանտ Մուստաֆա Օղուզին

Մարտի 9-ին Ադրբեջանի պաշտպանության նախարար Զաքիր Հասանովը հանդիպել է պաշտոնական այցով Ադրբեջանում գտնվող ՆԱՏՕ-ի ցամաքային զորքերի հրամանատարության շտաբի պետ, թուրք գեներալ-լեյտենանտ Մուստաֆա Օղուզին։ ՊՆ-ում տեղի է ունեցել խորհրդակցություն։ Հասանովը հյուրին տեղեկացրել է ադրբեջանական բանակում իրականացվող բարեփոխումների մասին․ «Ներկայացվել է ազատագրված տարածքներում, ինչպես նաև Ադրբեջան-Հայաստան պայմանական պետական սահմանում և Ղարաբաղի տնտեսական տարածաշրջանում առկա իրավիճակը», - նշված է երկրի ՊՆ տարածած հաղորդագրության մեջ։ Խոսելով ՆԱՏՕ-ի հետ համագործակցության ընթացքում ձեռք բերված հաջողությունների մասին՝ պաշտպանության նախարարը կարևորել է փոխադարձ հարաբերությունների հետագա զարգացումը։ Ըստ գերատեսչության հաղորդագրության՝ ՆԱՏՕ-ի բարձրաստիճան թուրք պաշտոնյան հանգստություն է մաղթել մարտի 5-ի առավոտյան «ապօրինի հայկական ստորաբաժանումների սադրանքի հետևանքով նահատակված ադրբեջանական բանակի զինծառայողների հոգիներին» և խորին ցավակցություն հայտնել նրանց ընտանիքներին։ Վերջում հանգամանալից մտքեր են փոխանակվել երկկողմ հարաբերությունների զարգացման հեռանկարների, ինչպես նաև փոխադարձ հետաքրքրություն ներկայացնող այլ հարցերի շուրջ։

16:38 - 09 մարտի, 2023

ՆԱՏՕ-ն մտահոգություն է հայտնել Արցախում տեղի ունեցած միջադեպի առթիվ |armenpress.am|

armenpress.am: Կովկասում ու Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան անդրադարձել է ադրբեջանական զինուժի կողմից Արցախում ոստիկանական մեքենայի գնդակոծման և մարդկանց մահվան փաստին: Նա «Թվիթեր»-ի իր պաշտոնական էջում գրել է. «Շատ մտահոգված եմ Ստեփանակերտի շրջակայքում մահացու միջադեպի մասին հաղորդումներով: Այս դեպքը ցույց է տալիս բանակցությունների սեղանի շուրջ չլուծված հարցերի համար լուծումներ գտնելու հրատապությունը։ ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանը»:

20:50 - 06 մարտի, 2023

Ֆինլանդիայի և Շվեդիայի՝ ՆԱՏՕ-ին անդամակցության շուրջ եռակողմ հանդիպումը կկայանա մարտի 9-ին. Չավուշօղլու |armenpress.am|

armenpress.am: Թուրքիայի արտգործնախարար Մևլութ Չավուշօղլուն հայտնել է, որ Թուրքիայի, Ֆինլանդիայի և Շվեդիայի պատվիրակությունների միջև ՆԱՏՕ-ին անդամակցելու շուրջ եռակողմ հանդիպումը կկայանա մարտի 9-ին Բրյուսելում։ Այս մասին Թուրքիայի արտգործնախարար Մևլութ Չավուշօղլուն հայտարարել է Հունգարիայի ԱԳ նախարար Պետեր Սիյարտոյի հետ Անկարայում կայացած համատեղ մամուլի ասուլիսում։ Միևնույն ժամանակ նա նշել է, որ Շվեդիան ՆԱՏՕ-ին անդամակցելու համար համոզիչ քայլեր չի ձեռնարկել ահաբեկչության դեմ պայքարում։ Չավուշօղլուն նշել է նաև, որ վստահ չէ, որ Ստոկհոլմը մինչև մարտի 9-ը կկատարի Անկարայի հանդեպ ունեցած բոլոր պարտավորությունները։

13:16 - 27 փետրվարի, 2023

ՆԱՏՕ-ի գլխավոր քարտուղարը ՌԴ-ին կոչ է արել վերանայել ՌՀՍ-ին մասնակցությունը կասեցնելու որոշումը |armenpress.am|

armenpress.am: ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ ափսոսում է Ռազմավարական հարձակողական սպառազինությունների պայմանագրին (ՌՀՍ) մասնակցությունը դադարեցնելու Ռուսաստանի Դաշնության որոշման համար և Մոսկվային կոչ է անում վերանայել այդ քայլը: Այդ մասին հաղորդում է Reuters գործակալությունը: «Ես ափսոսում եմ Ռազմավարական հարձակողական սպառազինությունների պայմանագրին մասնակցությունը դադարեցնելու Ռուսաստանի որոշման համար... Կոչ եմ անում Ռուսաստանին վերանայել այս որոշումը և վերադառնալ գործող համաձայնագրի պահպանմանը», - ասել է նա երեքշաբթի օրը Բրյուսելում Ուկրաինայի արտգործնախարար Դմիտրի Կուլեբայի և ԵՄ դիվանագիտության ղեկավար Ժոզեպ Բորելի հետ համատեղ մամուլի ասուլիսում։ Ստոլտենբերգի խոսքով՝ ՌՀՍ-ի վերաբերյալ այս որոշմամբ «վերացվել է սպառազինությունների նկատմամբ վերահսկողության ողջ ճարտարապետությունը»։ Հիշեցնենք, որ Ռուսաստանը միակողմանիորեն դադարեցրել է մասնակցությունը ռազմավարական հարձակողական սպառազինությունների մասին պայմանագրին (ՌՀՍ-3)։ Այս մասին ՌԴ Դաշնային ժողովին ուղղված ուղերձում հայտարարել է ՌԴ նախագահ Վլադիմիր Պուտինը: Նա ընդգծել է, որ խոսքը ոչ թե պայմանագրից դուրս գալու, այլ միայն դրան մասնակցությունը կասեցնելու մասին է։

17:21 - 21 փետրվարի, 2023

Բլինքենը վստահություն է հայտնել, որ Շվեդիան և Ֆինլանդիան շուտով կանդամակցեն ՆԱՏՕ-ին |armenpress.am|

armenpress.am: Վաշինգտոնը վստահ է, որ Շվեդիան և Ֆինլանդիան շուտով կանդամակցեն ՆԱՏՕ-ին: Անկարայում նման հայտարարություն է արել ԱՄՆ-ի պետքարտուղար Էնթոնի Բլինքենը։ Այդ մասին տեղեկանում ենք «РИА Новости» գործակալությունից: «Շվեդիայի և Ֆինլանդիայի՝ ՆԱՏՕ-ին անդամակցելու հարցը երկկողմ հարաբերությունների խնդիր չէ: Մենք աջակցում ենք նրանց հնարավորինս շուտ անդամակցությանը դաշինքին… Նրանց զինված ուժերն առանց ձգձգումների փոխգործակցում են դաշինքի ուժերի հետ: Մենք վստահ ենք, որ շուտով կողջունենք այս երկու երկրներին դաշինքում: Երբ դա տեղի ունենա, ՆԱՏՕ-ի յուրաքանչյուր անդամի անվտանգությունը կամրապնդվի, այդ թվում՝ ԱՄՆ-ի և Թուրքիայի», - հայտարարել է Բլինքենն իր թուրք գործընկեր Մևլութ Չավուշօղլուի հետ անցկացված մամուլի ասուլիսում։ Պետքարտուղարի խոսքով՝ Վաշինգտոնը հասկանում Է Թուրքիայում ահաբեկչական ճանաչված «Քրդստանի աշխատավորական կուսակցության» ակտիվության հետ կապված Անկարայի անհանգստությունը և աշխատելու է այդ ուղղությամբ։ Բլինքենը նաև նշել է, որ ԱՄՆ-ը մտադիր է աջակցություն ցուցաբերել Թուրքիային երկրաշարժերի հետևանքները վերացնելու գործում այնքան ժամանակ, որքան պահանջվի։ Իր հերթին Թուրքիայի արտգործնախարար Մևլութ Չավուշօղլուն հիշեցրել է, որ Թուրքիայի նախագահ Ռեջեփ Թայիփ Էրդողանը ՆԱՏՕ-ի գլխավոր քարտուղար Յենս Ստոլտենբերգին տեղեկացրել էր Հյուսիսատլանտյան դաշինքին Ֆինլանդիայի անդամակցության հնարավորությունն առանձին քննարկելու պատրաստակամության մասին: «Նախագահ Էրդողանն անցյալ շաբաթ Ստոլտենբերգին հայտնել Է, որ մենք կարող Էինք այլ դիրքորոշում ունենալ ՆԱՏՕ-ին Ֆինլանդիայի անդամակցության նկատմամբ», - ասել է թուրք դիվանագետը։ Ուկրաինայում ռազմական գործողությունների ֆոնին Ֆինլանդիան և Շվեդիան անցած մայիսին ՆԱՏՕ-ի գլխավոր քարտուղարին հայտ են ներկայացրել դաշինքին միանալու վերաբերյալ։ Սկզբում Թուրքիան արգելափակել Է այս հայտերի քննարկման գործընթացը, սակայն արդեն հունիսի 29-ին Թուրքիան, Շվեդիան և Ֆինլանդիան անվտանգության հուշագիր են ստորագրել, որը նկատի է առնում Անկարայի բոլոր մտահոգությունները։ Ներկա դրությամբ ՆԱՏՕ-ին Շվեդիայի և Ֆինլանդիայի անդամակցության հայտերը չեն վավերացրել 30 երկրներից միայն երկուսը` Հունգարիան և Թուրքիան:

17:17 - 20 փետրվարի, 2023

ՀՀ վարչապետն ու ՆԱՏՕ-ի նախկին գլխավոր քարտուղարը քննարկել են Հարավային Կովկասի տարածաշրջանում տեղի ունեցող զարգացումները

Հայաստանի Հանրապետության վարչապետ Նիկոլ Փաշինյանը Մյունխենում հանդիպում է ունեցել ՆԱՏՕ-ի նախկին գլխավոր քարտուղար Անդերս Ֆոգ Ռասմուսենի հետ: Ինչպես հայտնում են ՀՀ կառավարությունից, զրուցակիցները քննարկել են Հարավային Կովկասի տարածաշրջանում տեղի ունեցող զարգացումներն ու կարևորել կայունության ու խաղաղության ամրապնդման ուղղությամբ հետևողական քայլերի իրականացումը:

19:00 - 18 փետրվարի, 2023

Հելսինկին հույս ունի, որ արդեն Վիլնյուսի գագաթնաժողովին Ֆինլանդիան և Շվեդիան կմիանան ՆԱՏՕ-ին |azatutyun.am|

azatutyun.am: Ֆինլանդիայի արտաքին գործերի նախարար Պեկկա Հաավիստոն կարծում է, որ Ֆինլանդիան և Շվեդիան կարող են դառնալ ՆԱՏՕ-ի անդամ մինչև Վիլնյուսում այս հուլիսին կայանալիք դաշինքի գագաթնաժողովը։ Այդ մասին նա հայտարարել է երկուշաբթի օրը Հելսինկիում Գերմանիայի արտգործնախարար Աննալենա Բերբոկի հետ համատեղ մամուլի ասուլիսում։ Նրա խոսքով՝ Հելսինկին և Ստոկհոլմը կատարել են դաշինքին միանալու բոլոր պահանջները, որոնք առաջ է քաշել Թուրքիան, որն արգելափակել է հյուսիսային երկու երկրների մուտքը ՆԱՏՕ և դեռ չի վավերացրել նրանց հայտերը։ «Այժմ մենք սպասում ենք արագ վավերացման գործընթացին, որը Ֆինլանդիային և Շվեդիային թույլ կտա դառնալ ՆԱՏՕ-ի անդամ Վիլնյուսի գագաթնաժողովում», - ասել է նա։ Ֆինլանդիան և Շվեդիան դիմել են Հյուսիսատլանտյան դաշինքին միանալու 2022 թվականի մայիսին, սակայն Անկարան արգելափակել է անդամակցության գործընթացը՝ պահանջելով այս երկու երկրներից ահաբեկչական ճանաչել քրդական կազմակերպությունները և արտահանձնել ահաբեկչության կամ 2016 թվականին Թուրքիայում հեղաշրջման փորձին մասնակցելու մեջ մեղադրվող անձանց։ Թուրքիայի և Շվեդիայի հարաբերությունները սրվել են հունվարի 21-ին Ստոկհոլմում Թուրքիայի դեսպանատան մոտ Ղուրանի այրումից հետո։ Թուրքիայի նախագահ Ռեջեփ Թայիփ Էրդողանը հայտարարել է, որ Ստոկհոլմում հակաթուրքական գործողություններից հետո Շվեդիան չպետք է ակնկալի, որ Անկարան կաջակցի ՆԱՏՕ-ին անդամակցելու իր դիմումին։ Այս պահին շվեդական հայտի վավերացման հետ կապված գործընթացը կասեցված է։

10:20 - 14 փետրվարի, 2023

ՆԱՏՕ-ն պատրաստ է Ուկրաինայի վերաբերյալ բանակցային որոշումների մաս կազմել. Ստոլտենբերգ |1lurer.am|

1lurer.am: ՆԱՏՕ-ն կարող է Ուկրաինայի համար անվտանգության երաշխիքների քննարկմանն ուղղված ցանկացած միջազգային ջանքերի մաս կազմել, հայտարարել է դաշինքի գլխավոր քարտուղար Ենս Ստոլտենբերգը ՆԱՏՕ-ի երկրների պաշտպանության նախարարների նիստի նախօրեին կայացած մամուլի ասուլիսում: «Մենք կարող ենք լինել միջազգային բանակցային լուծումների մի մասը։ Ես չեմ անդրադառնա այն բանին, թե ինչ շրջանակում դա կլինի, բայց միանգամայն հնարավոր է, որ ՆԱՏՕ-ի դաշնակիցները երաշխիքներ տան ցանկացած միջազգային պայմանավորվածության ժամանակ»,- ասել է գլխավոր քարտուղարը։ Ստոլտենբերգը նաև որոշել է՝ ներկա հակամարտության ցանկացած ավարտից հետո Ուկրաինան կունենա էլ ավելի ուժեղ բանակ՝ ՆԱՏՕ-ի չափանիշներին համապատասխան։ Ըստ դաշինքի գլխավոր քարտուղարի՝ դա կօգնի արդյունավետ պաշտպանություն իրականացնել:

20:06 - 13 փետրվարի, 2023