Ֆրանսիա

Մակրոնն ի պատասխան մաքսատուրքերի կոչ է արել դադարեցնել ներդրումները ԱՄՆ-ում |armenpress.am|

armenpress.am: Ֆրանսիայի նախագահ Էմանուել Մակրոնը կոչ է արել ժամանակավորապես դադարեցնել ներդրումները Միացյալ Նահանգների տնտեսության մեջ՝ ի պատասխան Վաշինգտոնի կողմից նոր մաքսատուրքերի սահմանմանը։ Այս մասին հայտնում է Le Figaro-ն։ Ելիսեյան պալատում՝ ամերիկյան նոր քաղաքականությունից տուժած ոլորտների ներկայացուցիչների հետ հանդիպման ժամանակ, Մակրոնը հայտարարել է, որ եվրոպական խոշոր ընկերությունները պետք է դադարեցնեն միլիարդավոր եվրոների ներդրումները ԱՄՆ-ում, առնվազն այնքան ժամանակ, քանի դեռ մաքսային քաղաքականության հետ կապված իրավիճակը չի հստակեցվել։ «Ինչ իմաստ ունի, որ եվրոպական խոշոր խաղացողները միլիարդավոր եվրոներ ներդնեն ամերիկյան տնտեսության մեջ այն պարագայում, երբ ԱՄՆ-ն հարվածում է մեզ։ Անհրաժեշտ է ցուցաբերել հավաքական համերաշխություն»,-նշել է Մակրոնը։ Ֆրանսիայի նախագահը նաև հայտարարել է, որ ԱՄՆ-ի մաքսային քայլերը կարող են լուրջ ցնցումներ առաջացնել միջազգային առևտրում։ Նա ընդգծել է Եվրոպայի միասնական արձագանքի կարևորությունը՝ կոչ անելով համակարգված գործողությունների։

Այսօր 10:06

Փարիզն անընդունելի է համարել Բաքվի պահանջները խաղաղության գործընթացում, վերջինս արձագանքել է |civilnet.am|

civilnet.am: Ադրբեջանը Ֆրանսիայից պահանջել է «վերջ դնել խաղաղությանը չնպաստող և տարածաշրջանն ապակայունացնող քայլերին»։ Այսպիսի հայտարարությամբ ապրիլի 3-ին հանդես է եկել Ադրբեջանի ԱԳՆ մամուլի խոսնակ Այխան Հաջիզադեն՝ արձագանքելով Ֆրանսիայի արտգործնախարար Ժան-Նոյել Բարոյի՝ նախօրեի հայտարարություններին։ Ֆրանսիացի գլխավոր դիվանագետը Ազգային ժողովում խորհրդարանական լսումների ժամանակ անընդունելի էր համարել Հայաստանի և Ադրբեջանի միջև խաղաղության պայմանագրի կնքման համար Բաքվի առաջ քաշած պահանջները՝ նշելով որ «այդ նոր պայմանները ձգձգում են ստորագրման գործընթացը»։ Բարոն նաև շեշտել է, որ «Փարիզը ուշադիր հետևում է Բաքվում ապօրինաբար պահվող բոլոր անձանց շուրջ իրավիճակին՝ կոչ անելով ընթացիկ կարգավորման գործընթացի շրջանակում նրանց ազատ արձակել»։ Ըստ Հաջիզադեի՝ Բաքուն անընդունելի է համարում, որ Ֆրանսիան կասկածի տակ է դնում Հայաստանի Սահմանադրության փոփոխության ադրբեջանական պահանջը, որը շուրջ երկու տարի քննարկվում է։ «Եթե Ֆրանսիան, ինչպես որ հայտարարում է, իսկապես աջակցում է խաղաղության պայմանագրի կնքմանը, այդ դեպքում պետք է հորդորի Հայաստանին համապատասխան քայլերի դիմել», – ասել է ադրբեջանցի խոսնակը։ Ադրբեջանի ԱԳՆ մամուլի խոսնակը անդրադառնալով՝ հայ ռազմագերիների մասին Ֆրանսիայի արտգործնախարարի հայտարարությանը, ասել է, թե «նրանց հանցագործություններ քննելն ու դատելը Ադրբեջանի իրավունքն է»։

18:01 - 03 ապրիլի, 2025

Թուրքիայի և Ֆրանսիայի ԱԳ նախարարները քննարկել են հայ-ադրբեջանական կարգավորումը |civilnet.am|

14:40 - 03 ապրիլի, 2025

ՀՀ դեսպանն ու Էմանուել Մակրոնի խորհրդականը քննարկել են Հայաստան-Ֆրանսիա, Հայաստան-ԵՄ հարաբերություններին առնչող հարցեր

Ֆրանսիայում Հայաստանի Հանրապետության դեսպան Արման Խաչատրյանն ապրիլի 2-ին հանդիպել է Ֆրանսիայի նախագահ Էմանուել Մակրոնի դիվանագիտական խորհրդական Էմանուել Բոնի հետ։ Այս մասին համապատասխան հաղորդագրություն է տարածել Ֆրանսիայում ՀՀ դեսպանությունը։ Հաղոդագրության մեջ նշվում է, որ զրուցակիցները գոհունակությամբ ընդգծել են երկու երկրների միջև ամենաբարձր մակարդակով ակտիվ և շարունակական քաղաքական երկխոսությունը, ինչպես նաև ռազմավարական կարևորություն ունեցող ուղղություններով առկա արդյունավետ և մշտապես զարգացող համագործակցությունը։ «Անդրադառնալով Հարավային Կովկասում տեղ գտած վերջին զարգացումներին՝ Հայաստանի դեսպանը բարձր է գնահատել նախագահ Էմանուել Մակրոնի կողմից «Հայաստանի և Ադրբեջանի միջև խաղաղության ու միջպետական հարաբերությունների հաստատման մասին» համաձայնագրի տեքստի վերջնականացումը ողջունելու և տարածաշրջանում երկարատև խաղաղության հասնելու համար այն ստորագրելու կարևորությունն ընդգծելու հանգամանքը»,-ասված է դեսպանության հաղորդագրության մեջ։ ՀՀ դեսպանության փոխանցմամբ՝ դեսպան Խաչատրյանը և Էմանուել Բոնն անդրադարձել են նաև աշխարհաքաղաքական արդի այլ թեմաների, քննարկել են Հայաստան-Ֆրանսիա, Հայաստան-ԵՄ հարաբերություններին առնչող հարցերի լայն շրջանակ։

10:25 - 03 ապրիլի, 2025

Մակրոնն Իրանի հարցով կառավարության անդամների հանդիպում է հրավիրել՝ ԱՄՆ-ի հետ լարվածության աճի ֆոնին |factor.am|

factor.am: Ֆրանսիայի նախագահ Էմանուել Մակրոնը հանդիպման է հրավիրել առանցքային նախարարների և փորձագետների՝ քննարկելու Իրանի հարցը, ներառյալ նրա միջուկային ծրագիրը Թեհրանի և ԱՄՆ նախագահ Դոնալդ Թրամփի միջև աճող լարվածության պայմաններում։ Այս մասին Reuters-ին հայտնել են դիվանագիտական երեք աղբյուրներ: Լրատվամիջոցը նշում է, որ Կառավարության նման նիստ, որը նվիրված է կոնկրետ թեմայի, հազվադեպ է լինում, և ընդգծում է Վաշինգտոնի եվրոպացի դաշնակիցների աճող մտահոգությունը, որ Միացյալ Նահանգները և Իսրայելը կարող են օդային հարվածներ հասցնել Իրանի միջուկային օբյեկտներին, քանի դեռ նրա միջուկային ծրագրի վերաբերյալ արագ բանակցությունների համաձայնագիր չկա: ԱՄՆ պաշտպանության նախարար Փիթ Հեգսեթն ուժեղացրել է ԱՄՆ ռազմական կարողությունները Մերձավոր Արևելքում։ Եվրոպացի բարձրաստիճան պաշտոնյան ասել է, որ եվրոպացի ստրատեգները հետաքրքրված են՝ արդյո՞ք այդ արշավը կարող է դառնալ ԱՄՆ-ի կողմից Իրանին առաջիկա ամիսներին հարվածելու նախադրյալ:

21:43 - 02 ապրիլի, 2025

Ֆրանսիական դատարանը ևս մեկ աջ գործչի է մեղավոր ճանաչել |azatutyun.am|

azatutyun.am: Ֆրանսիայի Վերաքննիչ դատարանը մեղավոր է ճանաչել ծայրահեղ աջ «Ռեկոնկիստա» (վերանվաճում-խմբ.) կուսակցության առաջնորդ, գրող և լրագրող Էրիկ Զեմուրին 2019-ին արված մի հայտարարության համար։ Զեմուրը հայտարարել էր, որ Երկրորդ աշխարհամարտի տարիներին Գերմանիայի հետ համագործակցող Վիշիի վարչակազմի ղեկավար մարշալ Ֆիլիպ Պետենը հազարավոր հրեաների է փրկել։ Դատարանի վճռով Զեմուրը պետք է 10 հազար եվրո տուգանք վճարի։ Զեմուրը մասնակցում էր 2022 թվականի նախագահական ընտրություններին՝ ստանալով ֆրանսիացի ընտրողների 23 տոկոսի քվեն։ Քարոզարշավի ընթացքում Էրիկ Զեմուրը այցելել էր նաև Հայաստան։

21:26 - 02 ապրիլի, 2025

ՀՀ-ում Ֆրանսիայի դեսպան Օլիվիե Դըկոտինյին այցելել է Երևանի «Զվարթնոց» միջազգային օդանավակայան

Հայաստանի Հանրապետությունում Ֆրանսիայի արտակարգ և լիազոր դեսպան Օլիվիե Դըկոտինյին այցելել է Երևանի «Զվարթնոց» միջազգային օդանավակայան։ Այս մասին ՀՀ-ում Ֆրանսիայի դեսպանը գրառում է կատարել X-ի իր միկրոբլոգում։ «Այց Երևանի Զվարթնոց միջազգային օդանավակայան գործադիր տնօրեն պարոն Վենդեի ուղեկցությամբՉվերթներ (Air France, Transavia), e-gate-եր (Idemia), վերգետնյա սպասարկման սարքավորումներ (TLD), ֆրանչայզերներ (Paul). ֆրանսիական ձեռնարկությունները աջակցում են Զվարթնոցի՝ դեպի Հայաստան դարպասի աճին», - գրել է դեսպանը։

21:36 - 31 մարտի, 2025

ՀՀ դեսպան Արման Խաչատրյանը հանդիպում է ունեցել Ֆրանսիայի նախկին նախագահ Նիկոլա Սարկոզիի հետ

Մարտի 31-ին Ֆրանսիայում ՀՀ դեսպան Արման Խաչատրյանը հանդիպում է ունեցել Ֆրանսիայի նախկին նախագահ Նիկոլա Սարկոզիի հետ։ Այս մասին տեղեկանում ենք Ֆրանսիայում ՀՀ դեսպանության ֆեյսբուքյան էջից։ Դեսպան Խաչատրյանը շնորհակալություն է հայտնել նախագահ Սարկոզիին Հայաստանի և Ֆրանսիայի միջև հարաբերությունների խորացման և երկու ժողովուրդների միջև բարեկամության ամրապնդման հարցում վերջինիս ունեցած ավանդի և շարունակական հանձնառության համար։ Հանդիպման ընթացքում զրուցակիցները հանգամանալից անդրադարձել են միջազգային աշխարհաքաղաքական ներկայիս իրավիճակին, և հատկապես՝ Հարավային Կովկասում տեղ գտած վերջին զարգացումներին։

19:53 - 31 մարտի, 2025

Մարին Լե Պենը 5 տարով զրկվել է ընտրովի պաշտոն զբաղեցնելու հնարավորությունից |azatutyun.am|

azatutyun.am: Փարիզի դատարանն այսօր չորս տարվա ազատազրկման է դատապարտել ֆրանսիացի ազգայնականների առաջնորդ Մարին Լե Պենին՝ ԵՄ կողմից տրամադրած միջոցները ոչ նպատակային ծախսելու համար։ Ֆրանսիական դատարանի որոշման համաձայն՝ պատժաչափի կեսը պայմանական բնույթ է կրելու, մյուս կեսը նա անցկացնելու է տնային կալանքի պայմաններում։ Դատարանը նաև զրկել է Լե Պենին առաջիկա հինգ տարիներին որևէ ընտրովի պաշտոն զբաղեցնելու հնարավորությունից։ Դա նշանակում է, որ «Ազգային միավորում» կուսակցության առաջնորդը չի կարող մասնակցել 2027 թվականի նախագահական ընտրություններին։

16:24 - 31 մարտի, 2025

Ֆրանսիան Ուկրաինային երկու մլրդ եվրոյի ռազմական օգնություն կտրամադրի |azatutyun.am|

azatutyun.am: Ֆրանսիան երկու միլիարդ եվրոյի ռազմական օգնության նոր փաթեթ կտրամադրի Ուկրաինային, հայտարարել է Ֆրանսիայի նախագահ Էմանյուել Մակրոնը՝ չորեքշաբթի Ելիսեյան պալատում ընդունելով Ուկրաինայի նախագահ Վլադիմիր Զելենսկուն։ Ուկրաինան կստանա հակատանկային հրթիռներ, Mirage կործանիչների համար նախատեսված հրթիռներ, ՀՕՊ միջոցներ, զրահատեխնիկա։ Մակրոնը նաև հայտարարել է, որ Ֆրանսիան օգնում է զարգացնել զենքի արտադրությունը հենց Ուկրաինայում։ Ասուլիսի ժամանակ ընդգծելով, որ ողջունում է Ուկրաինայում պատերազմի դադարեցման բոլոր նախաձեռնությունները՝ Ֆրանսիայի նախագահը միևնույն ժամանակ շեշտել է՝ հրադադարը չի նշանակի Ռուսաստանի դեմ պատժամիջոցների չեղարկում։ Մակրոնի կարծիքով՝ Ռուսաստանի դեմ պատժամիջոցները կարող են չեղարկվել, եթե Ռուսաստանը վերադառնա Ուկրաինայի միջազգայնորեն ճանաչված սահմաններ և հրաժարվի օկուպացված տարածքներից։ Մակրոն-Զելենսկի հանդիպումը կայացել է Ուկրաինայի դաշնակից եվրոպական երկրների՝ Փարիզում մարտի 27-ին նախատեսված գագաթնաժողովից առաջ։ Ակնկալվում է, որ գագաթնաժողովին կքննարկվի դաշնակիցների նոր կոալիցիայի աշխատանքը ԱՄՆ նախագահ Դոնալդ Թրամփի հայտարարությունից հետո, թե Եվրոպան պետք է առաջինը լուծի Ռուսաստան-Ուկրաինա հակամարտությունը։ Եվրոպական երկրների ներկայացուցիչները կքննարկեն նաև Կիևին աջակցելու հետագա միջոցառումները, հրադադարի շուտափույթ դադարեցման հեռանկարները և Ուկրաինա խաղաղապահ ուժեր ուղարկելու հնարավորությունը։

10:39 - 27 մարտի, 2025

Ֆրանսիայի և Հայաստանի միջև ապակենտրոնացված համագործակցությունը տարածվում է ողջ երկրով մեկ․ դեսպան Դըկոտինյի

Մեղրի քաղաքը՝ Արաքսի ափին, գտնվում է Իրանի հետ սահմանին․ այն մի քանի ամիս առաջ քույր քաղաք է դարձել Ֆրանսիայի Բրոն քաղաքի հետ։ X-ի իր միկրոբլոգում նման գրառում է արել ՀՀ-ում Ֆրանսիայի արտակարգ և լիազոր դեսպան Օլիվիե Դըկոտինյին։ «Ֆրանսիայի և Հայաստանի միջև ապակենտրոնացված համագործակցությունը տարածվում է ողջ երկրով մեկ»,- գրել է նա։

22:29 - 24 մարտի, 2025

Մակրոնը հայտնել է մարտի 27-ին Փարիզում Ուկրաինայի հարցով կոալիցիայի գագաթնաժողով անցկացնելու մասին |factor.am|

factor.am: Ֆրանսիայի նախագահ Էմանուել Մակրոնը հայտնել է, որ Ուկրաինային աջակցող կոալիցիայի առաջնորդները կրկին կհանդիպեն հաջորդ հինգշաբթի՝ հույս ունենալով վերջնական տեսքի բերել Ռուսաստանի հետ պատերազմում հնարավոր զինադադար ապահովելու ծրագրերը, գրում է France 24-ը։ «Մենք կանցկացնենք «կամավորների կոալիցիայի» հերթական հանդիպումը հաջորդ հինգշաբթի Փարիզում՝ Ուկրաինայի նախագահ Վլադիմիր Զելենսկիի մասնակցությամբ»,- ասել է նա լրագրողներին։ Մակրոնի հայտարարությունը հնչում է այն բանից հետո, երբ Լոնդոնում տեղի են ունեցել Ուկրաինայի հարցով, այսպես կոչված, «կամավորների կոալիցիայի» բարձրագույն ռազմական ղեկավարության վերջնական քննարկումները։ Մեծ Բրիտանիայի վարչապետ Քիր Սթարմերը հայտարարել է, որ հնարավոր հրադադարի ապահովման ծրագրերը «միավորվում են», քանի որ ԱՄՆ նախագահ Դոնալդ Թրամփը փորձում է Ռուսաստանի հետ դադարեցնել Ուկրաինայի հետ պատերազմը: Մակրոնը, որը Սթարմերի հետ միասին Ուկրաինայում զորքեր տեղակայելու պատրաստակամություն է հայտնել, նշել է, որ հաջորդ հինգշաբթի նախանշված հանդիպմանը հնարավորություն կլինի «լավ կարգավորել» աշխատանքը՝ ապահովելու ցանկացած տևական զինադադար: Միևնույն ժամանակ, Վլադիմիր Զելենսկին ԵՄ գագաթնաժողովում ասել է, որ «ոչինչ չի փոխվել», քանի որ Մոսկվան շարունակում է ռմբակոծությունները՝ չնայած Թրամփի հետ Ուկրաինայի էներգետիկ համակարգի վրա հարձակումները դադարեցնելու պայմանավորվածությանը։ Նա նշել է, որ Ռուսաստանի նախագահ Վլադիմիր Պուտինը պետք է «դադարի անհարկի պահանջներ ներկայացնել, որոնք միայն երկարացնում են պատերազմը»՝ կոչ անելով ԵՄ-ին մեծացնել զենքի մատակարարումները և պահպանել պատժամիջոցները: ԵՄ առաջնորդները համատեղ հռչակագրում, համաձայնության գալով առանց Ռուսաստանի բարեկամ Հունգարիայի աջակցության, խոստացել են ուժեղացնել ռազմական օգնությունը։ Նրանք, սակայն, չեն բավարարել Զելենսկիի խնդրանքը հրետանային արկերի համար Կիևին հինգ միլիարդ եվրո (5,4 միլիարդ դոլար) տրամադրելու մասին՝ Ֆրանսիայի և Իտալիայի առարկության պատճառով։

14:23 - 21 մարտի, 2025

Քննարկվել են Հայաստանի և Ֆրանսիայի միջև մշակութային ոլորտում համագործակցության խորացման հեռանկարները

Մարտի 19-ին Ֆրանսիայում ՀՀ դեսպան Արման Խաչատրյանը հանդիպել է Փարիզի Օրսե և Օրանժերի թանգարանների նախագահ Սիլվեն Ամիկին։ Այս մասին տեղեկացնում են Ֆրանսիայում ՀՀ դեսպանությունից: Հանդիպման ընթացքում դեսպան Խաչատրյանը և նախագահ Ամիկը քննարկել են Հայաստանի և Ֆրանսիայի միջև մշակութային ոլորտում համագործակցության խորացման հեռանկարները՝ շեշտադրելով հատկապես հայկական և ֆրանսիական իմպրեսիոնիստական հարուստ ժառանգության համատեղ ցուցադրման հնարավորությունները։

20:50 - 20 մարտի, 2025

ԱՍՀ նախարարը և Ֆրանսիայի աշխատանքի և զբաղվածության նախարարը քննարկել են համագործակցության ընդլայնման հարցեր

Աշխատանքի և սոցիալական հարցերի նախարար Նարեկ Մկրտչյանը Նյու Յորքում հանդիպում է ունեցել Ֆրանսիայի աշխատանքի և զբաղվածության նախարար Աստրիդ Փանոսյան-Բուվեի հետ։ Այս մասին տեղեկացնում են ՀՀ աշխատանքի և սոցիալական հարցերի նախարարությունից: Հանդիպման ընթացքում քննարկվել են սոցիալական պաշտպանության, մասնավորապես աշխատանքի, զբաղվածության և կանանց հիմնահարցերի ոլորտներում համագործակցության ընդլայնմանն առնչվող մի շարք հարցեր։ Նախարար Մկրտչյանը ներկայացրել է ոլորտային առաջնահերթություններն ու այդ ուղղությամբ նախատեսվող բարեփոխումները․ այս համատեքստում նախարարը խոսել է ՀՀ զբաղվածության 2025-2031 թթ. ռազմավարական ծրագրի մշակման կարևորության, թիրախային ուղղությունների և առաջիկա միջոցառումների մասին։ Զրույցի ընթացքում կողմերն ընդգծել են Միասնական սոցիալական ծառայության ու Ֆրանսիայի սոցիալական ծառայություններ մատուցող կառույցի միջև համատեղ աշխատանքներ իրականացնելու կարևորությունը․ դիտարկվել է աշխատանքի և սոցիալական պաշտպանության ոլորտում համատեղ հուշագիր ստորագրելու հնարավորությունը։

18:53 - 17 մարտի, 2025

Տեղի է ունեցել վարչապետ Նիկոլ Փաշինյանի հեռախոսազրույցը Ֆրանսիայի նախագահ Էմանուել Մակրոնի հետ

Տեղի է ունեցել վարչապետ Նիկոլ Փաշինյանի հեռախոսազրույցը Ֆրանսիայի նախագահ Էմանուել Մակրոնի հետ։ Այս մասին հայտնում են ՀՀ կառավարությունից։ Վարչապետը Ֆրանսիայի նախագահին տեղեկացրել է «Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի» նախագծի տեքստի համաձայնեցման և նախագծի տեքստի համաձայնեցման շուրջ բանակցությունների ավարտի մասին։ Զրուցակիցները քննարկել են նաև Հայաստան–Ֆրանսիա, Հայաստան–ԵՄ հարաբերություններին, ինչպես նաև հարավկովկասյան տարածաշրջանին վերաբերող այլ հարցեր։

21:53 - 16 մարտի, 2025

Գերմանիան եւ Ֆրանսիան ողջունել են Հայաստանի ու Ադրբեջանի միջեւ խաղաղության պայմանագրի շուրջ ձեռք բերված համաձայնությանը |1lurer.am|

1lurer.am:Գերմանիան եւ Ֆրանսիան ողջունել են Հայաստանի ու Ադրբեջանի միջեւ խաղաղության պայմանագրի շուրջ ձեռք բերված համաձայնությանը։ Գերմանիայի ԱԳ նախարարության հայտարարության մեջ նշված է. «Տեղեկությունը, որ Հայաստանն ու Ադրբեջանը պայմանավորվածություն են ձեռք բերել խաղաղության պայմանագրի մասին, հույս է ներշնչում։ Տասնամյակների թշնամանքից ու պատերազմից հետո այն փաստը, որ կայուն խաղաղությունն արդեն հասանելի է, կարևոր է թե տարածաշրջանի համար, թե նրա սահմաններից դուրս»,- գրել է նա։ «Երկար բանակցություններից հետո Հայաստանի խիզախ ընդառաջ քայլերով արվում է այս վերջին քայլը այն ճանապարհին, որով մենք ուղեկցել ենք երկու երկրներին։ Ես կոչ եմ անում կողմերին ստորագրել խաղաղության պայմանագիրը»,- նշված է նախարար Անալենա Բերբոքի անունից Գերմանիայի ԱԳ նախարարության X-ի միկրոբլոգում տարածված հայտարարության մեջ։ Ֆրանսիան նույնպես ողջունել է Հայաստանի և Ադրբեջանի միջև խաղաղության պայմանագրի շուրջ բանակցությունների ավարտի մասին հայտարարությունը։ Այդ մասին ասված է հանրապետության ԱԳ նախարարության տարածած հաղորդագրության մեջ: «Ֆրանսիան հույս է հայտնում, որ դրա ստորագրումը հնարավորինս շուտ կկայանա։ Հայաստանի և Ադրբեջանի հարաբերությունների կարգավորումը՝ երկու պետությունների տարածքային ամբողջականության և ինքնիշխանության հարգման պայմաններում, պետք է հնարավորություն տա Հարավային Կովկասին դառնալու խաղաղության, ինտեգրման և համագործակցության վայր՝ բաց սահմաններով՝ հանուն տարածաշրջանի ժողովուրդների շահերի»,- նշված է գերատեսչության հայտարարության մեջ։ Հիշեցնենք, որ մարտի 13-ին նախ Ադրբեջանի ԱԳ նախարար Ջեյհուն Բայրամովը, իսկ ավելի ուշ ՀՀ ԱԳՆ-ն հայտարարեցին, որ խաղաղության համաձայնագիրը պատրաստ է ստորագրման։ ԱԳՆ-ից նշեցին՝ ՀՀ-ն պատրաստ է Ադրբեջանի հետ սկսել խորհրդակցություններ Համաձայնագրի ստորագրման ժամկետների և տեղի շուրջ։ Հիշեցնենք, որ խաղաղության պայմանագրի շրջանականերում կողմերը չէին համաձայնեցրել երկու կետ. միմյանց նկատմամբ միջազգային հայցերը հետ կանչելու և սահմանին երրորդ երկրների ներկայացուցիչներ չտեղակայելու կետերը։ Բացի այդ, Ադրբեջանը պահանջում է փոխել Հայաստանի Մայր օրենքը՝ խնդրահարույց համարելով նախաբանում հղումը Անկախության հռչակագրին, որում Արցախի ու Հայաստանի միավորման մասին հիշատակում կա։

09:30 - 14 մարտի, 2025