Կարեն Գիլոյան

ՀՀ կրթության, գիտության, մշակույթի և սպորտի նախարարի տեղակալ։

Ծնվել է 1970 թ. ապրիլի 26, ք. Ախալքալաքում (Վրաստան)։

1996-2000 թթ. սովորել է ԵՊՀ ժուռնալիստիկայի ֆակուլտետում (ավարտել է գերազանցությամբ), 1987-1993 թթ.՝ ԵրՊԻ մեքենաշինական արդյունաբերության էկոնոմիկա-կառավարում ֆակուլտետում (ավարտել է գերազանցությամբ)։

2020 թ.-ից ՀՖԿՍՊԻ դասախոս է, 2018 թ. եղել է բասկետբոլի Եվրասիական լիգայի հիմնադիր խորհրդի նախաձեռնող խմբի անդամ և ընտրվել է լիգայի նախագահ։ 2016-2020 թթ.՝ Հանրային հեռուստաընկերության սպորտի բաժնի ղեկավար, 1996-2016 թթ.՝ Հանրային հեռուստաընկերության «Սպորտ» ստուդիայի ավագ լրագրող, հաղորդավար, մեկնաբան, 2007-2014 թթ.՝ «Ուլիս» ֆուտբոլային ակումբի մամուլի քարտուղար։

2005 թ.-ից՝ ԵՊՀ ժուռնալիստիկայի ֆակուլտետի դասախոս, 2002-2019 թթ.՝ Հայաստանի ձիասպորտի ֆեդերացիայի գլխավոր քարտուղար, 2019-2021 թթ.- նախագահի տեղակալ, 2000 թ.-ից՝ Հայաստանի դարթսի ֆեդերացիայի հիմնադիր նախագահ, 1995թ.՝ «Նորք» հեռուստատեսության «Լուրեր» բաժնի լրագրող։

1998 թ.-ին լուսաբանել է Մոսկվայում կայացած աշխարհի պատանեկան խաղերը։ Մեկնաբանել է 2004 թ.-ին՝ Աթենքում, 2008 թվականին՝ Պեկինում, 2012 թվականին՝ Լոնդոնում և 2016 թվականին Ռիո դե Ժանեյրոյում կայացած ամառային օլիմպիական խաղերը։ Մեկնաբանել է նաև 2006 թ.-ին՝ Թուրինում, 2010 թվականին՝ Վանկուվերում և 2014 թ.-ին Սոչիում կայացած ձմեռային օլիմպիական խաղերը։ Մրցավայրից լուսաբանել է ավելի քան աշխարհի 22 և Եվրոպայի 31 առաջնություն: 2014 թ.-ին ղեկավարել է Էջմիածնում կայացած նետաձգության Եվրոպայի առաջնության մամուլի կենտրոնը։ 2015 թ.-ին եղել է Բաքվում կայացած Եվրոպական առաջին ամառային խաղերի հայաստանյան պատվիրակության մամուլի ղեկավարը:

1988-1989 թթ. ծառայել է բանակում, ԽՍՀՄ ՀՕՊ, ավագ, մարտական հաշվարկի հրամանատար։

Տիրապետում է ռուսերենին, անգլերենին, վրացերենին և գերմաներենին:

2020 թ. դեկտեմբերի 29-ին նշանակվել է ՀՀ ԿԳՄՍ նախարարի տեղակալ։

Պայքարելու ենք մինչև վերջ. Գիլոյանը՝ Արթուր Ալեքսանյանի եզրափակիչ գոտեմարտի բողոքարկման ընթացքի մասին

Փարիզի «Ստադ դե Ֆրանս» մարզադաշտում կայացած ամառային 33-րդ Օլիմպիական խաղերի փակման հանդիսավոր արարողության ընթացքում Հայաստանի դրոշակակիրը եղել է հունահռոմեական ոճի ըմբիշ, Օլիմպիական խաղերի ոսկե, արծաթե և բրոնզե մեդալակիր, աշխարհի քառակի և Եվրոպայի յոթակի չեմպիոն Արթուր Ալեքսանյանը: ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանն ամփոփել է հայ մարզիկների մրցելույթները, խոսել Փարիզ-2024-ի կազմակերպչական հարցերի, օգոստոսի 28-ից մեկնարկելիք Պարալիմպիկ խաղերին Հայաստանի մասնակցության, ինչպես նաև Փարիզում գործող «Հայաստանի օլիմպիական տան» մասին: Արդյունքները՝ բավարար «Օլիմպիական խաղերը մարզական ամենադժվար իրադարձությունն են, որը կազմակերպիչների համար դառնում է լուրջ փորձություն. հեշտ չէ ընդունել շուրջ 11 հազար մարզիկի, մեծ թվով պատվիրակությունների, բազմամիլիոնանոց երկրպագուների: Կարծիքներն ու նախասիրությունները կարող են տարբեր լինել, բայց սա Օլիմպիական խաղեր են, այստեղ պետք է խաղաղություն տիրի, քանի որ ի սկզբանե Օլիմպիական խաղերը ստեղծվել են պատերազմները դադարեցնելու գաղափարի շուրջ: Կազմակերպչական առումով Փարիզի խաղերը, իմ կարծիքով, լավագույններից էին: Փարիզը կարողացավ սիրով ընդունել օլիմպիականներին, և վստահ եմ՝ շատերի համար այս խաղերը կմնան որպես լավագույն հիշողություն»,- ասում է Կարեն Գիլոյանը: Անդրադառնալով Հայաստանի մարզիկների գրանցած արդյունքներին՝ ԿԳՄՍ նախարարի տեղակալը նշում է, որ մեր 15 մարզիկներից 3-ը այսպես կոչված «սպիտակ քարտով» էին մասնակցում Օլիմպիական խաղերին և նրանցից մեդալների ակնկալիք չկար, իսկ ընդհանուր արդյունքները գնահատում է բավարար: «ՀՀ կառավարության որդեգրած քաղաքականությունն ու մշակած ռազմավարությունը չեն կարող արագ արդյունք տալ: Սպորտում այսօրվա ներդրումը վաղը մեդալի չի վերածվում. դրա համար ժամանակ է պահանջվում: ՀՀ կառավարության կողմից սպորտի ոլորտում վարվող քաղաքականության արդյունքն այս պահին ավելի տեսանելի է պատանեկան և երիտասարդական առաջնություններում՝ դատելով մեդալներից: Վստահ եմ, որ մենք ճիշտ ուղու վրա ենք և Լոս Անջելեսի Օլիմպիական խաղերում կունենանք հստակ առաջընթաց: Առաջիկա մեկ ամսվա ընթացքում կունենանք մասնագիտական վերլուծություններ, քննարկումներ, իսկ հետո կաշխատենք ֆեդերացիաների հետ՝ նախապատրաստվելով հաջորդ խաղերին»,- վստահեցնում է փոխնախարար Գիլոյանը: Հայաստան՝ Փարիզի սրտում Օլիմպիական խաղերի ողջ ընթացքում Փարիզի 17-րդ թաղամասում՝ Հայկական բարեգործական ընդհանուր միության շենքում, գործել է «Հայաստանի օլիմպիական տունը»: Նախաձեռնությունն իրականություն է դարձել «Fastex», «Յունիբանկ» և «Յուքոմ» ընկերությունների աջակցությամբ: «Երկրպագուներն առաջին անգամ հնարավորություն են ունեցել մրցման հենց հաջորդ օրը հանդիպել մարզիկների հետ, շփվել նրանց հետ: Կազմակերպել ենք մրցումների համատեղ դիտումներ, որոնց մեծ թվով մարդիկ են ներկա եղել: Կարծում եմ՝ սա շատ հաջողված նախաձեռնությունն էր: Մեկ պատառ շատ ջերմ ու խանդավառ Հայաստան կարողացանք ունենալ Փարիզի սրտում»,- ասում է Կարեն Գիլոյանը: Պարալիմպիկ խաղերի մասնակցության մասին ԿԳՄՍ նախարարի տեղակալը նաև տեղեկացրել է՝ օգոստոսի 28-ից սեպտեմբերի 8-ը Փարիզում մեկնարկելիք Պարալիմպիկ խաղերին Հայաստանն առաջին անգամ վարկանիշ նվաճած ներկայացուցիչներ կունենա: Խաղերին կմասնակցեն Հայաստանի ազգային Պարալիմպիկ հավաքականի մարզիկներ Գրետա Վարդանյանը (պարածանրամարտ), Սմբատ Կարապետյանը (սայլակավազք) և Սարգիս Ստեփանյանը (գնդի հրում): Արթուր Ալեքսանյանի եզրափակիչ գոտեմարտի բողոքարկման ընթացքի մասին ԿԳՄՍ նախարարի տեղակալն անդրադարձել է նաև հունահռոմեական ոճի ըմբիշ Արթուր Ալեքսանյանի՝ իրանցի ըմբիշի հետ եզրափակիչ գոտեմարտի բողոքարկման ընթացքին: «Ըմբշամարտի միջազգային ֆեդերացիան գրավոր պատասխանել է՝ նշելով, որ մրցավարները ճիշտ են դատել: Հայաստանի ազգային օլիմպիական կոմիտեն, կցելով ֆեդերացիայի բողոքարկումը և Ըմբշամարտի միջազգային ֆեդերացիայի պատասխանը, դիմել է Միջազգային օլիմպիական կոմիտեի բողոքարկման հանձնաժողովին: Առաջին արձագանքը հետևյալն էր՝ «Ի լրումն ուղարկեք, թե որ դրվագում կոնկրետ ինչն է բողոքարկվում»: Առաջիկա մեկ-երկու օրերին հավելյալ փաստեր կուղարկվեն բողոքարկման հանձնաժողով: Մենք ունենք տեսագրություններ, որտեղ նույն դրվագի համար՝ այլ գոտեմարտում, գորգից դուրս եկողին զգուշացրել են, իսկ հակառակորդին տվել են միավոր: Այսինքն՝ ունենք փաստ, որ Արթուր Ալեքսանյանի դեպքում եղել է ճիշտ հակառակ վերաբերմունք: Առավել քան վստահ ենք՝ Արթուր Ալեքսանյանն այդ գոտեմարտում չէր պարտվի, հատկապես որ դրանից հետո որևէ միավոր չի եղել, որևէ գործողություն չի եղել: Պայքարելու ենք մինչև վերջ, հույսեր ունեմ, որ ազնիվ կգտնվեն և արդարությունը կվերականգնվի»,- ասել է Կարեն Գիլոյանը: Հայաստանի Օլիմպիական հավաքականը մեդալներ նվաճած 91 հավաքականների շարքում 66-րդն է` 3 արծաթե և 1 բրոնզե մեդալով։ Հայաստանի ներկայացուցիչներից ՕԽ փոխչեմպիոնի կոչմանն արժանացել են հունահռոմեական ոճի ըմբիշ Արթուր Ալեքսանյանը, մարմնամարզիկ Վահագն Դավթյանն ու ծանրորդ Վարազդատ Լալայանը, իսկ հունահռոմեական ոճի ըմբիշ Մալխաս Ամոյանը կանգնել է պատվո հարթակի երրորդ աստիճանին: Հատկանշական է՝ հունահռոմեական ոճի ըմբշամարտի հավաքականն Օլիմպիական խաղերի թիմային հաշվարկում 5-րդն է:

20:37 - 12 օգոստոսի, 2024

Մշակույթի և սպորտի ոլորտների հատկացումներն էականորեն ավելացել են

ԿԳՄՍ նախարարությունում կայացել են մշակույթի և սպորտի ոլորտների 2024-2026 թթ. բյուջետային հայտի և միջնաժամկետ ծախսային ծրագրի հանրային քննարկումներ, որոնք անցկացրել են նախարարի տեղակալներ Արա Խզմալյանը և Կարեն Գիլոյանը: Ինչպես տեղեկացնում են նախարարությունից, քննարկմանը մասնակցել են ոլորտային գործունեություն իրականացնող հասարակական կազմակերպությունների ներկայացուցիչները։ ԿԳՄՍ նախարարի տեղակալ Արա Խզմալյանը ներկայացրել է 2024-2026 թթ. բյուջետային հայտի և միջնաժամկետ ծախսային ծրագիրը՝ ընդգծելով, որ այն արտացոլում է ՀՀ մշակույթի պետական ռազմավարության առաջնահերթությունները: Ըստ փոխնախարարի՝ էապես ընդլայնվել են հատկացումները մշակույթի ոլորտում: 2024-2026 թթ. բյուջետային հայտում և միջնաժամկետ ծախսային ծրագրում նա առանձնացրել է 2 հիմնական բաղադրիչ՝ միջազգային համագործակցության ընդլայնման և մարզերում մշակութային կյանքի ակտիվացման ուղղություններով: «21-րդ դարում խոսել մշակութային կյանքի ակտիվացման և մշակութային քաղաքականության մասին, առանց միջազգային կառույցների հետ սերտ համագործակցության և ճանաչելի դարձնելու, անհնար է պատկերացնել: Շատ կարևոր է նաև մշակութային գործունեությունը չկենտրոնացնել մայրաքաղաքում, այլ տարածել և հասանելի դարձնել նաև մարզերում՝ տարբեր ծրագրերի ու հստակ քաղաքականության միջոցով»,- ասել է Արա Խզմալյանը: Այս առումով առաջիկա անելիքներից նա ընդգծել է, որ Արամ Խաչատրյանի 120-ամյակի առթիվ նախատեսվում է հրատարակել անգլերեն պատկերագիրք՝ նվիրված կոմպոզիտորի գործունեությանը: Մարզերում մշակութային կյանքի գործունեությունն ապահովելու տեսանկյունից պետական քաղաքականությամբ նախանշված է մշակութային տները հանրային կյանք վերադարձնելն ու դրանք կենսունակ դարձնելը՝ նաև մայրաքաղաքի գեղարվեստական մշակույթի արդյունքը մշակույթի տներում ներկայացնելով: Նախարարի տեղակալը ներկայացրել է կրթամշակութային գործունեության՝ նախորդ տարվա արդյունքները. 2022 թ. շուրջ 20.000 աշակերտներ մասնակցել են տարբեր նախագծերի՝«Դասարվեստ», Դասարան+դասական», «Քո արվեստը դպրոցում», «Զարդագիր» և այլն: Այս տարվա համար հատկացումներն ավելացել են: Քննարկման մասնակիցները վերահաստատել են մարզերում մշակութային կյանքի աշխուժացմանն ուղղված քաղաքականության առաջնահերթությունը՝ շեշտադրելով ուշադրության կենտրոնացումը երաժշտական և արվեստի դպրոցներին: Նախատեսվում է համերգաշարերի կազմակերպում՝ նախանշելու տաղանդավոր երեխաների կարիերայի ճանապարհը՝ պետական ուշադրության տակ պահելով նրանց զարգացման ընթացքը: Արա Խզմալյանն ընդգծել է, որ սահմանված կարգով կարիքների գնահատումից հետո ընդլայնվել է նաև երաժշտական գործիքների ձեռքբերման բյուջեն: Կարևորվել է գործիքների նկատմամբ հատուկ վերաբերմունքի ձևավորման մշակույթը: Տեղեկացվել է, որ Չայկովսկու անվան երաժշտական դպրոցը պետական աջակցությամբ շուտով կունենա երգեհոն, ինչն աննախադեպ ձեռքբերում է երաժշտական միջավայրի համար: Քննարկմանն անդրադարձ է եղել 2024 թ. նախատեսվող 2 մեծ միջոցառման՝ նվիրված Շառլ Ազնավուրի և Սերգեյ Փարաջանովի 100-ամյակներին: «Հայ-ֆրանսիական և հայ-վրացական համատեղ հայտ ենք ներկայացրել 2 մեծանուն հայերին ընդգրկելու ՅՈՒՆԵՍԿՕ-ի հռչակավոր մարդկանց և կարևոր իրադարձությունների օրացույցում»,- իրազեկել է ԿԳՄՍ նախարարի տեղակալը՝ այս համատեքստում ևս ընդգծելով միջազգային համագործակցության կարևորությունը ճանաչելիության բարձրացման տեսանկյունից: Այս առումով հիշատակվել է նաև հայ մշակույթը օտարալեզու գրականությամբ հանրահռչակելու քաղաքականությունը, որը պարբերական բնույթ է կրելու: Ներկայացվել է նաև մշակութային ենթակառուցվածքների՝ համերգային և թատերական հաստատությունների բարելավմանն ուղղված գործունեությունը, ընդգծվել դրա կարևորությունը՝ հանդիսատեսին նորովի ներկայանալու և ավելի գրավիչ պայմաններ ունենալու տեսանկյունից: «Ապահովելով ստեղծագործելու բարենպաստ պայմաններ՝ մեծացրել ենք մշակութային հաստատությունների տնօրեններին ուղղված պահանջները»,- ասել է Արա Խզմալյանը: Նա տեղեկացրել է, որ Կառավարությունը ներդրել է ֆինանսավորման նոր մոդել, համաձայն որի՝ տվյալ մշակութային կառույցը, սեփական ջանքերով մեծացնելով եկամուտները, հնարավորություն է ունենում պետությունից ստանալու նույնչափ հատկացում: Կողմերն ընդգծել են նաև մշակութային օջախներում ներառականության ապահովման կարևորությունը ոչ միայն ֆիզիկական, այլև բովանդակային հասանելիության առումով: Կառավարության ոլորտային քաղաքականությունն ուղղված է բնակչության շրջանում առողջ ապրելակերպի և ակտիվ հանգստի արմատավորմանը Տեղի է ունեցել քննարկում նաև սպորտի ոլորտի 2024-2026 թթ. բյուջետային հայտի և միջնաժամկետ ծախսային ծրագրի վերաբերյալ: Հանդիպմանը ԿԳՄՍ նախարարի տեղակալ Կարեն Գիլոյանը նշել է՝ ծրագիրը ներառում է մասսայական սպորտի և մեծ նվաճումների սպորտի ենթաոլորտները, իսկ Կառավարության ոլորտային քաղաքականությունն ուղղված է բնակչության շրջանում առողջ ապրելակերպի և ակտիվ հանգստի արմատավորմանը, ֆիզիկական կուլտուրայի և սպորտի միջոցով բնակչության առողջության ամրապնդմանը։ Նախարարի տեղակալի խոսքով՝ Կառավարությունը խրախուսում է նաև մարզական բարձր արդյունքները միջազգային մրցասպարեզներում, աջակցում է մարզական ֆեդերացիաների գործունեությանը: Մեծ նվաճումների սպորտի ոլորտում, մասնավորապես, աջակցություն է տրամադրվում հայ մարզիկներին՝ պատշաճ պատրաստվելու և մասնակցելու հեղինակավոր մրցաշարերին, այդ թվում՝ պարալիմպիկ, առանձին մարզաձևերի զարգացմանը, խրախուսվում են նվաճումներ արձանագրած մարզիկները և ոլորտի աշխատակիցները։ Հայաստանի դահուկային սպորտի և սնոուբորդի ֆեդերացիայի նախագահ Գագիկ Սարգսյանն առաջարկել է քննարկել ձմեռային Օլիմպիական խաղերի նախապատրաստության համար ֆինանսական աջակցության տրամադրումը բյուջետային հայտում ներառելու հարցը, ինչպես նաև որոշ հարցեր քննարկել մարզագույքի և մարզահագուստի հատկացումների վերաբերյալ: 2022 թվականին ամբողջովին վերանայվել են մասսայական սպորտի միջոցառումները և հաստատվել են «Վարչապետի գավաթ» անվանակարգի տակ սիրողական խճուղավազքի(կրոսավազքի), սեղանի թենիսի, խճուղային հեծանվավազքի, լողի մրցաշարեր, այլ մասսայական միջոցառումներ, աջակցություն համայնքներին մարզական հաստատությունների շենքային պայմանների բարելավման համար, Համաշխարհային ունիվերսիադային Հայաստանի ուսանողական մարզական պատվիրակության մասնակցության ապահովման միջոցառումներ: 2023-2025 թվականներին ծրագրում ընդգրկված միջոցառումները փոփոխվում են՝ կախված միջազգային մրցաշարերի ժամանակացույցից: Հավելյալ միջոցներ են նախատեսվել ադապտիվ սպորտին:

17:57 - 30 մարտի, 2023