Ինչպես հայտնել էինք ավելի վաղ՝ այսօր ՀՀ 16 համայնքներում տեղական ինքնակառավարման մարմինների ընտրություններ են։

Ստորև ներկայացնում ենք ընտրությունների մեկնարկի և ընթացքի վերաբերյալ «Անկախ դիտորդ» դաշինքի կողմից ներկայացված նախնական տեղեկատվությունը։

ՏԵՂԱՄԱՍԱՅԻՆ ԿԵՆՏՐՈՆՆԵՐԻ ՄԱՏՉԵԼԻՈՒԹՅՈՒՆԸ,
ԿԱՀԱՎՈՐԱՆՔԸ ԵՎ ՀԱՆՁՆԱԺՈՂՈՎԻ ՆԻՍՏԸ

• Դիտարկված բոլոր տեղամասերում քվեարկության սենյակները գտնվել են առաջին հարկում։
• Տեղամասերից 11-ը գնահատվել են որպես անմատչելի, 5-ը ունեցել է թեքահարթակ կամ հարթ մուտք է ունեցել,ևս 3-ը գնահատվել են մասամբ մատչելի։
• 3 տեղամասում նախատեսված չի եղել որևէ հատուկ միջոց տեսողության խնդիրներ ունեցող անձանց ինքնուրույն քվեարկության կազմակերպման համար: Մյուս տեղամասերը ապահովված էին միայն խոշորացույցներով։
• 1 քվեասենյակում լուսամուտների դասավորվածության պատճառով կարող էր խախտվել քվեարկության գաղտնիությունը, սակայն տարածքային ընտրական հանձնաժողովի միջամտությամբ միջոցներ են ձեռնարկվել:
• Դիտորդներն անբավարար են գնահատել քվեասենյակներից 2-ի քվեախցիկների լուսավորությունը։
• 1 քվեասենյակում փակցված չի եղել քվեարկության մասին իրազեկող որևէ տեղեկատվություն։
• Տեղամասերից 10-ում նիստը սկսվել է ուշացումով՝ հանձնաժողովի տարբեր անդամների ուշացման պատճառով:
  
• Որևէ տեղամասում հանձնաժողովի անդամների գործառույթների վիճակահանության կարգը չի խախտվել, սակայն 2 տեղամասում նիստի ընթացակարգերը խախտվել են։
• 3 տեղամասում հանձնաժողովի նիստին փորձել են ներկա գտնվել 2 համայնքի ղեկավարի և մեկ ավագանու անդամի թեկնածու, որոնք դուրս են հրավիրվել հանձնաժողովների նախագահների կողմից։
• Տեխնիկական սարքից 0-ական տեղեկանքի տպման հետ խնդիրներ են եղել 2 տեղամասում։