11:51 - 08 նոյեմբերի, 2024
Դատախազությունը հերքում է գլխավոր դատախազի տեղակալի թեկնածուի վերաբերյալ լուրը
Հայաստանի գլխավոր դատախազությունը հերքում է մամուլում տարածված լուրը, թե գլխավոր դատախազի նախկին օգնական Արևիկ Ավոյանը նշանակվելու է գլխավոր դատախազի տեղակալի պաշտոնում և համակարգելու է ապօրինի գույքի բռնագանձման ոլորտը։
ՀՀ գլխավոր դատախազի խորհրդական Լուսինե Մարտիրոսյանը, անդրադառնալով թեմային, «Ֆեյսբուք»-ի իր էջում գրել է․
«Հերքում եմ։ Գլխավոր դատախազի տեղակալի թեկնածուի վերաբերյալ տեղեկությունն իրականությանը չի համապատասխանում»:
ՀՀ գլխավոր դատախազի նախկին տեղակալ Սրբուհի Գալյանը, որը դատախազությունում համակարգում էր ապօրինի գույքի բռնագանձման ոլորտը, նոյեմբերի 5-ին նշանակվել է ՀՀ արդարադատության նախարարի պաշտոնում։ «Ժողովուրդ» օրաթերթը գրել է, որ Գալյանի հեռանալուց հետո պաշտոնից ազատվել է ՀՀ գլխավոր դատախազի օգնական Արևիկ Ավոյանը՝ շեշտելով, որ նրա ազատումը պատահական չի եղել։ Ըստ օրաթերթի տեղեկությունների՝ հենց նա է նշանակվելու գլխավոր դատախազի տեղակալի պաշտոնում և համակարգելու է ապօրինի գույքի բռնագանձման ոլորտը։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)