iravaban.net: Հակակոռուպցիոն քրեական դատարանում այսօր՝ դեկտեմբերի 10-ին, դատավոր Տիգրան Դավթյանի նախագահությամբ հրապարակվեց Հայաստանի ազգային հերոս, Արտակարգ իրավիճակների նախկին նախարար Անդրանիկ Փիլոյանի գործով դատավճիռը։

Դատարանը վճռել է․

Անդրանիկ Փիլոյանին մեղավոր ճանաչել պաշտոնական լիազորությունների չարաշահման, խոշոր չափերով կաշառք ստանալու, խոշոր չափերով խարդախության համար, որը կատարվել է մի խումբ անձանց կողմից նախնական համաձայնությամբ։

• Նրա նկատմամբ վերջնական պատիժ նշանակվեց 4 տարի 5 ամիս 23 օրը՝ 5 տարվա ազատազրկմանը հաշվակցելով կալանքի ժամկետը,
• 3 տարի ժամկետով զրկել որոշակի հանրային ծառայության պաշտոններ զբաղեցնելու իրավունքից,
• նշանակել տուգանք՝ 1 միլիոն 300 հազար դրամ,
• ընտրված բացակայելու արգելք խափանման միջոցը դատավճռի օրինական ուժի մեջ մտնելուց հետո վերացնել։

Արտակ Բեյբությանը մեղավոր ճանաչվեց պաշտոնատար անձի կողմից կաշառք ստանալու փորձի համար, նրա նկատմամբ պատիժ նշանակվեց ազատազրկում 4 տարի 6 ամիս ժամկետով։

Պատիժը պայմանականորեն չկիրառվեց, սահմանվեց փորձաշրջան՝ 4 տարի ժամկետով։ Նրա նկատմամբ ընտրված ստորագրություն չհեռանալու մասին  խափանման միջոցը մնաց անփոփոխ՝ մինչև դատավճռի օրինական ուժի մեջ մտնելը։

Վիգեն Գրիգորյանը մեղավոր ճանաչվեց իրական կամ ենթադրյալ ազդեցությունը շահադիտական նպատակով օգտագործելու համար, որը կատարվել է ակնհայտ ապօրինի գործողության կամ անգործության նպատակով։

• 8 տարի ազատազրկումից հանվեց կալանքի ժամանակը՝ 2 տարի 15 օրը՝ թողնելով կրել 5 տարի 11 ամիս 15 օր ժամկետով ազատազրկումը։

Դատավճռի օրինական ուժի մեջ մտնելուց հետո բացակայելու արգելքը և վարչական հսկողությունը կվերացվի։ Գրավի գումար 5 միլիոն դրամը կվերադարձվի։

Արթուր Օհանյանը մեղավոր ճանաչվեց կաշառք տալու համար։ Պատիժը պայմանականորեն չկիրառվեց և սահմանվեց 1 տարի ժամկետով փորձաշրջան։ Բացակայելու արգելքը և պաշտոնավարման կասեցումը դատավճռի օրինական ուժի մեջ մտնելուց հետո կվերացվի։

Վիգեն Մկրտչյանը մեղավոր ճանաչվեց իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կաշառքի միջնորդության և առանձնապես խոշոր չափերով վստահված գույքը հափշտակելու համար։

• Վերջնական պատիժ նշանակվեց 3 տարի  6 ամիս 28 օր ժամկետով ազատազրկումը, պատիժը պայմանականորեն չկիրառվեց, սահմանվեց 2 տարի փորձաշրջան։ Բացակայելու արգելքը դատավճռի օրինական ուժի մեջ մտնելուց հետո կվերացվի։

Հրաչյա Երեմյանը մեղավոր ճանաչվեց պաշտոնական լիազորությունների չարաշահման, իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կաշառքի միջնորդության համար։

• Որպես պատիժ նշանակվեց տուգանք՝ 500 հազար դրամի չափով։ Հաշվի առնվեց անազատության մեջ գտնվելու ժամանակահատվածը, վերջինս ազատվեց պատժի կրումից։ Պաշտոնավարման կասեցումը դատավճռի օրինական ուժի մեջ մտնելուց հետո կվերացվի, իսկ 3 միլիոն դրամ գրավի գումարը կվերադարձվի վճարողին։

Արա Յաղջյանը արդարացվեց, ճանաչվեց և հռչակվեց նրա անմեղությունը։ Գրավի գումար 2 միլիոն դրամը կվերադարձվի նրան։

Աշոտ Հակոբյանը ևս արդարացվեց, սահմանվեց տուգանք՝ 500 հազար դրամի չափով, գրավի գումար 10 միլիոն դրամը կվերադարձվի այն վճարողին։

Դատարանը նաև վճռեց հօգուտ ՀՀ-ի բռնագրավել՝

• Անդրանիկ Փիլոյանից 860 հազար դրամ,
• Վիգեն Գրիգորյանից 4 միլիոն 510 հազար դրամ,
• իրեղեն ապացույց ճանաչված 1 միլիոն դրամը վերադարձնել «Հիբրիդ Փրոդաքշն» ՍՊԸ-ին,
• 10 գրամանոց ոսկե ձուլակտորը,
• որպես վարույթային ծախս՝ Անդրանիկ Փիլոյանից, Վիգեն Մկրտչյանից և Արթուր Օհանյանից բռնագրավել 36 հազար դրամ,
• Անդրանիկ Փիլոյանից, Վիգեն Մկրտչյանից և Հրաչյա Երեմյանից 1 միլիոն 341 հազար դրամ՝ փորձագիտական եզրակացությունների համար վճարված գումարի ծախս,
• հայտնի ջեռուցման կաթսան և դետալները թողնել Անդրանիկ Փիլոյանի որդու՝ Տիգրան Փիլոյանի տնօրինմանը,
• Աշոտ Հակոբյանի գույքի վրա դրված արգելանքը վերացնել։