Պետք չէ քաղաքականացնել գործընթացը. ՔԿ-ն՝ Ռուբեն Մխիթարյանին հարցաքննության հրավիրելու մասին

Քննչական կոմիտեն պարզաբանել է Գյումրիի քաղաքապետի թեկնածու Ռուբեն Մխիթարյանին հարցաքննության հրավիրելու հանգամանքները։

«Ոստիկանության պարեկային ծառայությունից 2024 թվականի մայիսի 31-ին հաղորդում է ստացվել, որ Ռուբեն Մխիթարյանը 6 ամիս ժամկետով տրանսպորտային միջոցներ վարելու իրավունքը կասեցված վիճակում՝ 2024 թվականի մայիսի 3-ին վարել է ավտոմեքենան»,- ասել են ՔԿ-ից:

1Lurer.am-ին ՔԿ-ից հայտնել են, որ հաղորդման հիման վրա 2024 թվականի մայիսի 31-ին նախաձեռնվել է քրեական վարույթ՝ Քրեական օրենսգրքի 344-րդ հոդվածի 1-ին մասի (տրանսպորտային միջոցներ վարելու իրավունքից զրկված կամ այդ իրավունքը կասեցված կամ այդ իրավունքը չունեցող անձի կողմից տրանսպորտային միջոցներ վարելը) հատկանիշներով:

«Տեսանյութից պարզ երևում է, որ քննիչը չգիտի, թե ում հետ է խոսում: Քննիչը, իրացնելով իր լիազորությունները, նախաձեռնված քրեական վարույթի շրջանակներում Ռուբեն Մխիթարյանին հրավիրել է հարցաքննության: Պետք չէ քաղաքականացնել գործընթացը»,- նշել են ՔԿ-ից:

Ավելի վաղ հայտնել էինք, որ Գյումրու քաղաքապետի թեկնածու Ռուբեն Մխիթարյանին կանչել են Ոստիկանության Կենտրոնի քննչական բաժին։

Հեռախոսազրույցի ընթացքում քննիչը հայտնում է, որ 2024թ.-ի մայիսին պարեկներն ակտ են կայացել, համաձայն որի՝ Մխիթարյանն առանց վարորդական իրավունքի վկայականի մեքենա է վարել: