civilnet.am:  Իրանը չի փակել բոլորը ճանապարհները, պատրաստ է ԱՄՆ-ի հետ անուղղակի բանակցությունների՝ դիմացի կողմին գնահատելու, իր պայմանները հայտարարելու և համապատասխան որոշում կայացնելու համար, հայտարարել է Իրանի արտաքին հարաբերությունների ռազմավարական խորհրդի նախագահ Քամալ Խարազին (IRNA)։

Խարազին, որը 1997-2005 թթ. եղել է Իրանի արտգործնախարարը, Իրանի նկատմամբ ԱՄՆ վարչակազմի քաղաքականությունը համեմատել է հոգեբանական պատերազմի հետ՝ նշելով, որ այն Վաշինգտոնի կողմից ուղեկցվում է «կամ պատերազմ, կամ բանակցություն» կարգախոսով։

«Ամերիկյան ռազմավարությունը ենթադրում է երկխոսության հրավիրել տնտեսական պատժամիջոցների և ռազմական սպառնալիքների ուժեղացման ներքո, որի նպատակը Իրանի վրա ճնշում գործադրելու միջոցով նրան երկխոսության մեջ ներգրավելն է։ Սակայն ո՛չ այդ սկզբունքներն են պարզ, ո՛չ էլ Իրանը, ելնելով նախկին փորձից, կարող է վստահել հակառակ կողմի խոստումներին և ստորագրությանը»,- ընդգծել է Խարազին՝ հավելելով, որ նման կերպ ամերիկյան կողմը փորձում է պարտադրել իր կամքը։

Ըստ ամերիկյան լրատվամիջոցների՝ ԱՄՆ նախագահ Դոնալդ Թրամփը մարտի սկզբին նամակ է հղել Իրանի հեղափոխության առաջնորդ Ալի Խամենիին Իրանի միջուկային ծրագրի հարցում նոր գործարքի վերաբերյալ առաջարկով։ Նամակի առկայությունը հաստատել է պաշտոնական Թեհրանը։ Այդ մասին նաև խոսել է Իրանի արտգործնախարար Աբբաս Արաղչին Երևան կատարած այցելության ժամանակ։

Նա իր գործընկեր Արարատ Միրզոյանի հետ հանդիպմանը մասնավորապես նշել էր, որ Իրանը աշխատում է պատասխան նամակի շուրջ։ Ըստ Արաղչիի՝ Իրանի տեսակետը հստակ է՝ Իրանը ուղիղ չի բանակցի Վաշինգտոնի հետ առավելագույն ճնշման, տնտեսական պատժամիջոցների ավելացման պայմաններում։