Հանրապետության հրապարակում գտնվող ՀՀ արտաքին գործերի նախարարության նախկին շենքի հետ կապված ծրագրեր են քննարկել փոխվարչապետ Մհեր Գրիգորյանն ու «Կորպորասիոն Ամերիկա օդանավակայաններ» ընկերության գործադիր տնօրեն Մարտին Էռնեկյանը: Այս մասին հայտնում են կառավարության մամուլի ծառայությունից։

Փոխվարչապետը կարևորել է ընկերության ներդրումային ծրագրերի իրականացումը Հայաստանում առանցքային կարևորություն ունեցող ոլորտներում։ Զրուցակիցները երկուստեք ընդգծել են օդանավակայանի կոնսեցիոն պայմանագրի լավարկման շուրջ բանակցությունների նշանակությունը։

2013-ին ՀՀ պետական գույքի կառավարման վարչությունը «Տանգո» ՓԲԸ-ին է վաճառել Երևանի Կառավարական 2-րդ մասնաշենքը՝ 14,241.9 քմ շենք-շինություններով և հողամասով (ՀՀ արտաքին գործերի նախարարության նախկին շենք): Վաճառքի գինը կազմեց 51 մլն դոլարից ավելի: «Տանգո» ընկերությունը պատկանում է արգենտինահայ գործարար Էդուարդո Էռնեկյանին:

2023-ին ՍիվիլՆեթը դիմել էր պետական համապատասխան կառույցների՝ պարզելու, թե ինչ գործունեություն է ի վերջո ընկերությունը պատրաստվում ծավալել ԱԳՆ շենքում, քանի որ մինչ այս խոսվել է ինչպես հյուրանոց, այնպես էլ թանգարան հիմնելու մասին։ Սակայն բոլոր կառույցները հրաժարվել են պատասխանել հարցերին՝ հիմք ընդունելով «Տեղեկատվության ազատության մասին» օրենքն ու վաճառքի պայմանագրի «Գաղտնիություն» վերտառությամբ դրույթի պահանջները»։