Մայիսի 17-ի վաղ առավոտյան Ռուսաստանի կողմից իրականացված անօդաչու թռչող սարքի հարձակման հետևանքով Սումիի մարզում զոհվել է ինը քաղաքացի, ևս չորսը՝ վիրավորվել։ Ինչպես հայտնում է The Kyiv Independent լրատվական գործակալությունը, այս մասին տեղեկացրել է Սումիի մարզային ռազմական վարչակազմը՝ Telegram-յան գրառմամբ։

Հարձակման թիրախում է եղել քաղաքացիական ուղևորափոխադրող մի միկրոավտոբուս, որը տեղաշարժվում էր Բիլոպիլյա քաղաքի մոտակայքում՝ տեղական ժամանակով ժամը 06:17-ին։

Սումիի մարզը գտնվում է Ուկրաինայի հյուսիսարևելքում՝ սահմանակից Ռուսաստանի Կուրսկի, Բելգորոդի և Բրյանսկի շրջաններին։

Բիլոպիլյայի համայնքապետ Յուրի Զարկոն դեպքը անվանել է «քաղաքի պատմության սև շաբաթ օրը» և մայիսի 17-ից 19-ը հայտարարել է եռօրյա սուգ։

«Այս ավտոբուսը տարհանման նպատակով մարդկանց էր դուրս բերում քաղաքից։ Վիրավորներին առաջին բուժօգնություն ցուցաբերվել է դեպքի վայրում, այնուհետև տեղափոխվել են Սումիի հիվանդանոց։ Այժմ շարունակվում է զոհվածների մարմինների դուրսբերումը։ Որոշ զոհեր դեռ նույնականացված չեն։ Նրանց մեծ մասը տարեց կանայք են, ինչպես նաև երկու կամ երեք տղամարդիկ», – ասել է Բիլոպիլյայի համայնքապետը։

Տեղում աշխատում են փրկարարական ծառայություններն ու ոստիկանությունը

Լուսանկարում ռուսական անօդաչու թռչող սարքի հարվածի հետևանքով վնասված քաղաքացիական միկրոավտոբուսն է։