13:58 - 18 հունիսի, 2021
Հասարակությանը կարողացան երկու բևեռի շուրջ տրամադրել, որը սխալ եմ համարում․ Սամվել Բաբայանը ամփոփեց քարոզարշավը
Քարոզարշավը հետաքրքիր էր, ուղղակի բևեռացումն էր շատ։ Հասարակությանը կարողացան երկու բևեռի շուրջ տրամադրել, որը ես սխալ եմ համարում։ Այս մասին այսօր՝ ամփոփիչ ասուլիսի ընթացքում հայտարարեց «Ազատական» կուսակցութան ղեկավար Սամվել Բաբայանը։
«Դա նրանից է գալիս, որ լրատվական ամբողջ դաշտը այդ մարդկանց ձեռքին է, ովքեր երկրորդ բևեռ են ձևավորել, դրա համար բոլորի համար դժվար էր պատնեշը բացել»։
Բաբայանը նաև նշեց, որ դժվար է 12 օրում ամբողջ հանրապետությունում քարոզարշավ իրականացնել։ «Մի շարք դժվարություններ կան, բայց արդեն հաղթահարել ենք, թողել ժողովրդին, ժողովուրդը կորոշի»։
Սամվել Բաբայանի խոսքով՝ նախկին իշխանությունները տարիներ շարունակ հակաքարոզչություն են իրականացրել իր դեմ, և այդ ամենը կոտրելը դժվար է եղել։ «Ոչ մեկը Հայաստանում չգիտեր, որ 1992 թ․-ի պարտությունից հետո դու ես վերցրել պատերազմը ու բերել ժողովրդին հաղթանակի։ Ո՞վ գիտեր Հայաստանում, քո անունը չկար, բացի քեզնից բոլորը կային, բայց դուք գիտեք, որ բանակը ղեկավարվում է վերտիկալ, վերևից նստած է եղել պարոն Բաբայանը, ամբողջ օպերացիաները մշակել, իրագործել և արել է ինքը։ Ո՞վ է Հայաստանում իմացել դրա մասին, ո՞վ գիտեր։ Ոչ մեկը, որովհետև ոչ մեկին ձեռնտու չէր, և նմանատիպ մի շարք հարցեր»։
Նա նաև նշեց, որ քարոզարշավի ընթացքում փորձել են հանրությանը ճշմարտությունը ներկայացնել։ «Այն, ինչ ես խոսել եմ, այն, ինչ ես արտահայտել եմ, ամեն մի ստորակետի համար պատասխանատու եմ, և, ինչպես դուք տեսնում եք, որևիցե մեկը բերան չի բացել, ասել՝ էդ ձև չի։ Ժողովուրդը ինչ որոշում կկայացնի, ամեն դեպքում ես ասել եմ՝ շնորհակալ ենք, կվստահեն, կվերցնենք բանակը, հզոր բանակ կկառուցենք, չեն վստահի, էլի շնորհակալ ենք»։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)