ՀՀ վարչապետ Նիկոլ Փաշինյանը ՀՀ կառավարության նիստի սկզբում անդրադարձավ անցյալ շաբաթվա ընթացքում Լաչինի միջանցքի շուրջ տեղի ունեցած իրադարձությունները։ Նրա խոսքով Ադրբեջանը հերթական ներխուժումն է իրականացրել ԼՂ-ում ՌԴ խաղաղապահ զորախմբի պատասխանատվության գոտի։ Փաշինյանն ընթերցեց ՌԴ ՊՆ-ի տեղեկագիրը դեպքի վերաբերյալ։

Նա հիշեցրեց, որ Ադրբեջանը չի կատարում Հաագայի դատարանի պահանջը բացելու Լաչինի միջանցքը․ «Ադրբեջանն ավելի է սրում իրավիճակը՝ Լեռնային Ղարաբաղի նաև ներքին տրանսպորտային հաղորդակցությունը արգելափակելուն ուղղված քայլեր ձեռնարկելով։ 2054 բարձունքից [գրավված բարձունքը՝ խմբ․] Ադրբեջանը ուղիղ դիտարկման տակ է վերցրել Ստեփանակերտը Հին Շեն, Մեծ Շեն ու մի քանի այլ գյուղերի հետ կապող գրունտային ճանապարհը։ Ադրբեջանը սա բացատրում է իբր թե ՀՀ-ից ԼՂ ռազմական բեռների և անձնակազմի տեղափոխումներով։ Սա իրականությանը չհամապատասխանող տեղեկատվություն է․․․»։

Փաշինյանը ընդգծեց, որ Հայաստանը դեպի ԼՂ ռազմական փոխադրումներ չի իրականացնում, ԼՂ-ում բանակ չունի՝ հիշեցնելով, որ Ադրբեջանն ինքն է մերժել այս փաստը ստուգելու համար ԼՂ միջազգային փաստահավաք խումբ գործուղելու առաջարկը և հաստատելով, որ այն ուժի մեջ է։