13:28 - 01 ապրիլի, 2023
Իրանը կրկին բացատրություն է պահանջել Բաքվից «Իսրայելի հետ Թեհրանի դեմ միասնական ճակատ ստեղծելու» հայտարարության առնչությամբ |tert.am|
tert.am: Իրանի արտաքին գործերի նախարարության խոսնակ Նասեր Քանաանին բացատրություն է պահանջել Բաքվից Իսրայելի և Ադրբեջանի ԱԳ նախարարների հանդիպումից հետո կայացած մամուլի ասուլիսի ժամանակ հնչած հայտարարությունների համար։
Ինչպես գրել է Քանաանին իր թվիթերյան միկրոբլոգում, Իսրայելն այլ նպատակ չունի, քան իսլամական աշխարհում տարաձայնություններ ու պառակտում ստեղծելն է, ուստի Իրանն Ադրբեջանին կոչ է անում տեղյակ լինել «հանցավոր Սիոնիստական ռեժիմի» իրական մտադրություններին։
Նրա խոսքով՝ իրականակ կողմն Ադրբեջանի կառավարությանը խնդրել է մեկնաբանել Իսրայելի ԱԳ նախարարի՝ Ադրբեջանի հետ «Իրանի դեմ միասնական ճակատ ստեղծելու» համաձայնագրի վերաբերյալ հայտարարությունները, սակայն Ադրբեջանի ԱԳՆ խոսնակը խուսափել է պատասխանից և Իրանի հասցեին նոր մեղադրանքներ է հնչեցրել։
Նա նաև հավելել է, որ այս պարագայում Ադրբեջանի շարունակական լռությունը փաստում է, որ Բաքուն անուղղակիորեն հավանություն է տվել իր ռազմավարական գործընկերոջ հայտարարություններին։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)