Գլխավոր դատախազի տեղակալ Լիլիթ Գրիգորյանն այսօր ընդունել է «Հայ իրավաբանական միություն» կազմակերպության նախագահ Լյուսի Վարպետյանի գլխավորած պատվիրակությանը: Այս մասին հայտնում են ՀՀ Գլխավոր դատախազությունից:
Հանդիպումը կայացել է Գլխավոր դատախազության շենքում բացված՝ ԵՊՀ իրավաբանական լաբորատորիայում:
Լիլիթ Գրիգորյանը ողջունել է Հայ իրավաբանական միության գործընկերներին Գլխավոր դատախազությունում և ներկայացրել Լաբորատորիայի գործունեության թեմատիկ ուղղությունները:
Լյուսի Վարպետյանը ներկայացրել է Կազմակերպության ընթացիկ ծրագրերն ու գործունեության հիմնական ուղղությունները, ընդգծել է Իրավաբանական լաբորատորիայի հետ ինչպես տեսական, այնպես էլ գործնական թեմաներով փոխգործակցության կարևորությունը:
Հանդիպման ընթացքում քննարկվել են նաև սփյուռքում գործունեություն ծավալող հայազգի իրավաբանների հետ լաբորատորիայի շրջանակներում փորձի փոխանակում կազմակերպելու հնարավորությունները և ձևաչափը, ինչը, քննարկման մասնակիցների կարծիքով, էապես կնպաստի պրակտիկայի արդիականացմանը:
Հանդիպման ավատին կողմերը վերահաստատել են իրենց հանձնառությունը՝ պահպանելու հարաբերությունների զարգացման ներկայիս դինամիկան և ակտիվացնելու աշխատանքները համագործակցության օրակարգի ընդլայնման ուղղությամբ:
