pastinfo.am Նուբարաշենի աղբավայրի հրդեհի հիմնական մասը մարված է, այս պահին միայն ծուխն է երևում։ Այս մասին «Փաստինֆոյին» հայտնեցին Երևանի քաղաքապետարանից
«Կեսգիշերից «Երևանի աղբահանություն և սանիտարական մաքրում» հիմնարկի ջրցաններ, բեռնատարներով հող են տեղափոխել, որպեսզի ծածկեն տարածը: Նաև փրկարար ծառայությունն է միացել: Հրդեհի հիմնական մասը մարված է, այս պահին միայն ծուխն է երևում», – հայտնեցին քաղաքապետարանից։
Ավելի վաղ հայտնել էինք, որ Նուբարաշենի աղբավայրում կրկին հրդեհ է։ ՆԳՆ-ից տեղեկացրել էին, որ հոկտեմբերի 9-ին, ժամը 23։53-ին Ճգնաժամային կառավարման ազգային կենտրոն ահազանգ է ստացվել, որ Երևան քաղաքի Նուբարաշենի կենցաղային աղբավայրում հրդեհ է բռնկվել:
Դեպքի վայր է մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից վեց մարտական հաշվարկ, տեղում աշխատում է 27 փրկարար։
Լուսանկարը՝ Ալեքսանդր Պատրինի
