Նուբարաշենի աղբավայրում բռնկված հրդեհը մարվել է: Ծխացող վերջին հատվածների չեզոքացման ուղղությամբ աշխատանքները շարունակվում են մինչև հիմա: Փրկարար ծառայությունը, Երևանի քաղաքապետարանի և վարչական շրջանների աշխատակիցներն ամբողջ գիշեր աշխատել են տեղում: Այդ մասին Երևանի քաղաքապետարանի տարածած տեսաուղերձում ասում է քաղաքապետ Տիգրան Ավինյանը՝ շնորհակալություն հայտնելով հրդեհաշիջման աշխատանքների համար:
«Ուզում եմ շատ հստակ արձանագրել՝ այս դեպքը պատահական չէր, այլ դիտավորություն էր: Արդեն խոսել եմ ԱԱԾ տնօրենի հետ և ՆԳ նախարարի հետ: Հրդեհի հետ որևէ կապ ունեցած անձ կենթարկվի պատասխանատվության օրենքի ամբողջ խստությամբ: Ես երաշխավորում եմ՝ այս դեպքը չի կարող մնալ անպատասխան: Միաժամանակ խստացվել են աղբավայրի տարածք մուտքի և ելքի ռեժիմները:
Սիրելի՛ երևանցիներ, մենք արդեն մշակել ենք կենցաղային թափոնների վերամշակման գործարանի մրցույթի փաթեթը, և այս տարի հայտարարվելու է մրցույթի առաջին փուլը: Սա է համակարգային այն լուծումը, որը մեկընդմիշտ փակելու է Նուբարաշենի աղբավայրի էջը: Քաղաքի համար սա և՛ բնապահպանական, և՛ անվտանգային հարց է: Մենք վերջ ենք տալու այս պրակտիկային, որը շուրջ 75 տարի վտանգել է բոլորիս առողջությունը և քաղաքի բնականոն միջավայրը:
Երևանն ունենալու է մաքուր, անվտանգ և վերահսկվող թափոնների կառավարում»,- ասաց նա:
Ավելի վաղ տեղեկացրել էինք, որ Նուբարաշենի կենցաղային աղբավայրում հրդեհ է բռնկվել, ներգրավվել է 6 մարտական հաշվարկ, 27 փրկարար:
