Տ․ Արամ քհն․ Ասատրյանը ի պատասխան Մայր Աթոռ Սուրբ Էջմիածնի հայտարարության, ֆեյսբուքյան գրառմամբ նշել է, որ Պարգևների շնորհման և կարգապահական հարցերի հանձնախմբի ժողովը «մի քանի օր է փակ դռների ետևում իրականացնում են` պատրաստելով փաթեթներ իմ և քահանա եղբայրներիս դեմ»:

«Հանձնախմբի քարտուղարի կողմից բանավոր, ապա իմ պահանջով նաև գրավոր հրավեր եմ ստացել, որին պատասխանել եմ գրավոր` խնդրելով ներկայացնել ժողովին հրավիրելու նպատակը։ Երեք անգամ գրավոր կերպով խնդրել և ակնկալել եմ պատասխան, սակայն և ոչ մի արձագանք, որովհետև արդարության և ճշմարտության կշեռքը գտնվում է ոչ ճիշտ ձեռքերում, իսկ «խարդախ կշեռքը պիղծ է Տիրոջ առաջ» (Առակաց գիրք)», – գրել է Տ․ Արամ քհն․ Ասատրյանը, նշելով, որ ժողովին հրավիրելու նպատակի պարզաբանման նրա պահանջներին արձագանքը «կուլիսային է, ֆեյքերով և ծպտված»։

Քահանան գրառմանը կցել է նաև Հանձնախմբի և իր նամակագրության էկրանակադրերը և հավելել, որ պատրաստ է ներկայանալ ժողովի՝ «բաց և թափանցիկության ապահովման պայմաններում»։

Հիշեցնենք, որ Մայր Աթոռը ավելի վաղ հայտարարել էր, որ Տ․ Արամ քհն․ Ասատրյանը և Տ․ Տարոն քհն․ Հունանյանը չեն ներկայացել Մայր Աթոռի Պարգևների շնորհման և կարգապահական հարցերի հանձնախմբի նիստին, որին նախատեսված է եղել քննել նաև եկեղեցականներին առնչված կարգապահական հարցեր։Նշենք նաև, որ Տեր Արամ քահանան ու Տեր Տարոն քահանա Հունանյանը վերջին շրջանում հրապարակային բարձրաձայնում են Հայ առաքելական եկեղեցու ներքին կյանքին վերաբերող հարցեր։