armenpress.am Ազգային ժողովի «Հայաստան» խմբակցության պատգամավոր Գառնիկ Դանիելյանը չի ժխտում, որ Հայ Առաքելական եկեղեցում խնդիրներ կան, սակայն դրանք համարում է եկեղեցու ներքին գործը:
Այս մասին խորհրդարանական ճեպազրույցների ընթացքում նշեց Ազգային ժողովի «Հայաստան» խմբակցության պատգամավոր Գառնիկ Դանիելյանը:
«Չեմ կարող ժխտել, որ կան խնդիրներ, բայց դա չի նշանակում, որ, եթե եկեղեցու ներսում կան որոշ հոգևորականների հետ կապված խնդիրներ, պետք է իշխանությունները ներգործություն թույլ տան: Դա եկեղեցու ներքին գործն է»,- ասաց Դանիելյանը:
ՀՀ վարչապետ Նիկոլ Փաշինյանը 2025թ․ հունիսի 10-ին առաջարկել է ստեղծել համակարգող խորհուրդ, որը գործուն քայլեր կձեռնարկի կաթողիկոսական նոր ընտրություններ կազմակերպելու ուղղությամբ։ Բացի այդ, Նիկոլ Փաշինյանը բարձրաձայնել է եկեղեցիներն ու վանքերը եկեղեցուց վերցնելու հնարավորության մասին։
Մինչ այդ, ՀՀ վարչապետը Ն.Ս.Օ.Օ.Տ. Գարեգին Բ. Ամենայն Հայոց կաթողիկոսին և մի խումբ բարձրաստիճան հոգևորականների մեղադրել էր կուսակրոնության ուխտը խախտելու մեջ՝ հայտարարելով՝ եթե պարզվի, որ Գարեգին Բ-ն իսկապես խախտել է իր կուսակրոնության ուխտը և երեխա է ունեցել, նա չի կարողանա լինել Ամենայն Հայոց կաթողիկոս։
Մայր աթոռն էլ իր հերթին ՀՀ վարչապետին մեղադրում են հակաեկեղեցական արշավ սկսելու մեջ:
Օրերս Նիկոլ Փաշինյանը մասնակցեց եկեղեցու կողմից կարգալույծ հռչակված քահանայի մատուցած պատարագին, մինչդեռ Մայր աթոռը հայտարարում է, որ վերջինիս կողմից որևէ հոգևոր արարողություն կատարելը անվավեր է։
