civilnet.am Թուրքիայի հետ հարաբերություններում ակնկալում ենք սահմանի բացում, դիվանագիտական հարաբերությունների հաստատում հենց վաղը։ Այս մասին ՍիվիլՆեթի հետ զրույցում ասաց ԱԺ փոխխոսնակ, Հայաստան-Թուրքիա հարաբերությունների կարգավորման գործընթացում Հայաստանի հատուկ ներկայացուցիչ Ռուբեն Ռուբինյանը։
«Ակնկալիք կա, որ պետք է լինեն նոր զարգացումներ և առաջընթաց Հայաստան-Թուրքիա հարաբերության կարգավորման գործընթացում և վաղուց ժամանակն է և հատկապես հիմա է ժամանակը՝ տարածաշրջանում տեղի ունեցած ահռելի փոփոխությունների պայմաններում»,- ասաց Ռուբինյանը։
Հիշատակելով Ադրբեջանի տարածքով դեպի Հայաստան բեռնափոխադրումների արգելքի վերացումը՝ Ռուբինյանը նշեց, որ հենց այս համատեքստում պետք է սպասել դրական տեղաշարժերի։
«Ադրբեջանի տարածքով դեպի Հայաստան բեռնափոխադրումների արգելքը հանելը իրականում հեղափոխություն է տարածաշրջանի կյանքում, դա երևի ամենամեծ իրադարձությունն է տնտեսական իմաստով, որ տեղի է ունեցել Հարավային Կովկասում երեք երկրների անկախացումից ի վեր։
Իմ փորձը ցույց է տալիս, որ ավելի լավ է, քանի դեռ Հայաստան-Թուրքիա կարգավորման գործընթացում բուն իրադարձությունները տեղի չեն ունեցել, դրանց մասին չխոսել, բայց մի քանի ամսից կվերադառնանք այս խոսակցությանը։ Կարող եմ ասել, որ մոտ ժամանակներս միջգերատեսչական հանդիպում է սպասվում Հայաստանի և Թուրքիայի ներկայացուցիչների միջև, որի ընթացքում կշարունակենք քննարկել Գյումրի-Կարս երկաթգծի վերագործարկման տեխնիկական մանրամասները, մյուս պայմանավորվածություններն էլ իրենց հունով ընթանում են»,- ասաց Ռուբինյանը։
Հարցին՝ արդյոք դրական ակնկալիքները վերաբերում են երրորդ երկրների քաղաքացիների համար սահմանի բացմանը, Ռուբինյանն արձագանքեց՝ «ոչ միայն»։
