«Ամենահավաստի աղբյուրը ժողովուրդն է». այսպես պատասխանեց Փաշինյանը հարցին, թե ինչ ինֆորմացիոն հիմք է ունեցել Հայ առաքելական եկեղեցու պաշտոնյայի և նրա քեռակնոջ վերաբերյալ հայտնի գրառումն անելիս:

«Ինֆորմացիոն հիմքերը բազմազան են: Ամենահավաստին ՀՀ այն քաղաքացիներն են, որոնք առնչվում են, գիտեն այդ թեմաների մասին, և ցավոք, որոշակի շրջանակների հետ շփվելիս ավելի շատ նման ինֆորմացիաների հետ են առնչվում, քան հոգևոր, և դա է այն պրոբլեմը, որ համարում ենք անհանդուրժելի»,- հավելել է նա:

Հարցին, թե Արշակ Սրբազանի վերաբերյա՞լ էր այդ գրառումը, Փաշինյանը պատասխանել է. «Պիտի ցավով նշեմ, որ չեմ կարող վստահ լինել, որ նման դեպքերը եզակի են»:

Հիշեցնենք, որ համացանցում հայտնվել են գաղտնի նկարահանված տեսանյութեր, որոնք առնչվում են ենթադրաբար Արշակ սրբազանին։

Արշակ սրբազանը, մեկնաբանելով իրեն վերագրվող գաղտնի նկարահանված տեսանյութերը, հայտարարել է․ «Տեղեկացա, որ համացանցով տարածվում են անպատշաճ բովանդակությամբ ինչ-որ տեսանյութեր՝ դրանք փորձելով կապել իմ և ընտանիքիս հետ։ Դրան զուգահեռ էլ, իրեն լրատվամիջոց համարող մի զրպարտչամիջոց երկնել է, իբրև թե Ամենայն Հայոց Կաթողիկոսին հրաժարական ներկայացնելու պահանջ եմ ներկայացրել։ […] Ուժերի գերլարումով իսկ, լուրջ դեմքով չեմ կարող լծվել հորինվածքների ու զրպարտությունների հերքմանը։ Խելամիտ եմ համարում արհամարհել»։