Կարգալույծ է հռչակվել Տ․ Տարոն քահանա Հունանյանը։ Այս մասին հայտնում է Մայր Աթոռի Տեղեկատվական համակարգը։

Նոյեմբերի 6-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի Հայրապետական տնօրինությամբ ստորև ներկայացված հիմնավորումներով կարգալույծ է հռչակվել Տավուշի թեմի հոգևոր սպասավոր Տ․ Տարոն քահանա Հունանյանը:

Տնօրինության համար հիմք է ծառայել Տավուշի թեմի առաջնորդական տեղապահի զեկուցագիրը և Հայաստանյայց Առաքելական Սուրբ Եկեղեցու Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի եզրակացությունը, որով վերջինս՝

ա/ Ինքնակամ լքել է իր ծառայության վայրը 2024 թվականի մայիս ամսից,

բ/ Անտեսել է Տավուշի թեմի առաջնորդական տեղապահի հորդորներն ու հրահանգները և հարատևել կարգազանց ընթացքի մեջ,

գ/ Մասնակցել է կարգազուրկ հռչակված Ստեփան Ասատրյանի կազմակերպած հակականոնական արարողությանը՝ մեղսակից դառնալով կարգալուծվածին,

դ/ Հրապարակային ելույթներով ու հայտարարություններով վարկաբեկել է Հայաստանյայց Առաքելական Սուրբ Եկեղեցին և ծառայակից եկեղեցականներին,

ե/ Անարգալից վարքագիծ է դրսևորել եկեղեցական բարձրագույն իշխանության նկատմամբ և դրժել հնազանդության ուխտը։

Կարգալույծ եկեղեցականն այսուհետ կդասվի աշխարհականների շարքին՝ Վարդան Հունանյան ավազանի անունով:

Հիշեցնենք, որ Տեր Տարոնն իր ֆեյսբուքյան էջում հրապարակել էր Մայր աթոռի կարգապահական հանձնախմբից իրեն ուղարկված հրավերը, որում նշված էր, որ նրան հրավիրել են հանձնախմբի նիստին` պարզաբանումներ ներկայացնելու ծառայության վայրն ինքնակամ լքելու, կարգազուրկ հռչակված Ստեփան Ասատրյանի կողմից հոկտեմբերի 26-ին Հովհաննավանքում բեմականացված հակականոնական արարողությանը մասնակցելու (քահանայությունից արդեն իսկ լուծվածին մեղսակից լինելու), ինչպես նաև նույն օրը հակաեկեղեցական հայտարարություններ անելու համար։