civilnet.am։ Հայաստանը չի մասնակցի Ղրղզստանում կայանալիք ՀԱՊԿ գագաթնաժողովին, սակայն Երևանը տեղեկացրել է, որ դեմ չէ հանդիպման ժամանակ համաձայնեցված փաստաթղթերի ընդունմանը։ Ըստ «ՌԻԱ Նովոստի»-ի՝ այդ մասին հայտնել է ՌԴ նախագահի օգնական Յուրի Ուշակովը։
«Ինչ վերաբերում է Հայաստանին, ապա նա չի մասնակցի, սակայն նրա ներկայացուցիչները կազմակերպիչներին հայտնել են, որ դեմ չեն հանդիպմանը համաձայնեցված փաստաթղթերի ընդունմանը»,- ասել է Ուշակովը լրագրողներին։
***
Հունիսի 26-ին կառավարությունում ճեպազրույցի ընթացքում Հայաստանի արտաքին գործերի նախարարի տեղակալ Վահան Կոստանյանը, անդրադառնալով երկրի դիրքորոշմանը Հավաքական անվտանգության պայմանագրի կազմակերպության (ՀԱՊԿ) հանդեպ, ասել էր․ «ՀԱՊԿ-ի մասին մենք ոչ միայն ակնարկում ենք, այլ ուղիղ տեքստով ասում ենք, որ այսպես երկար չի կարող մնալ»:
Նրա խոսքով՝ «ի վերջո, եթե ՀԱՊԿ գործընկերները, այդ թվում նաև Ռուսաստանի Դաշնությունը, հանդես չգան քաղաքական հայտարարություններով, որոնց մասին խոսվել է դեռևս տարիներ առաջ՝ Հայաստանի Հանրապետության սուվերեն տարածքի նկատմամբ հարձակումից հետո, ապա Հայաստանը կկայացնի վերջնական որոշումներ»։
Այս տարվա մարտին էլ Հայաստանի ԱԳՆ-ից հայտնել էին, որ երկիրը ձեռնպահ կմնա ՀԱՊԿ-ի ֆինանսավորմանը մասնակցելուց։
Հայաստանը ՀԱՊԿ-ին իր մասնակցությունը սառեցրել է 2024-ի փետրվարին։ Վարչապետ Նիկոլ Փաշինյանը հայտարարել է, որ ՀԱՊԿ-ը սպառնալիքներ է ստեղծում Հայաստանի անվտանգության, հետագա գոյության, ինքնիշխանության և պետականության համար։
ՀԱՊԿ-ի հետ հարաբերությունները սրվեցին 2022-ի սեպտեմբերին՝ Հայաստանի ինքնիշխան տարածք Ադրբեջանի զինուժի ապօրինի ներխուժումից հետո, երբ կազմակերպությունը ռազմական և քաղաքական աջակցություն չհայտնեց իր անդամ երկրին։
Չնայած Երևանի պահանջներին՝ ՀԱՊԿ-ը մինչև օրս չի դատապարտել դաշինքի անդամ Հայաստանի դեմ այդ հարձակումը և չի արձանագրել, որ Ադրբեջանը Հայաստանից տարածքներ է օկուպացրել։ Հայաստանը դադարել է անդամավճարներ փոխանցել կազմակերպությանը և ներկայացուցիչներ ուղարկել նրա միջոցառումներին ու զորավարժություններին։
