Ավարտվել է 2021 թվականի Ազգային ժողովի արտահերթ ընտրություններից առաջ ընտրական իրավունքի իրականացմանը խոչընդոտելու և հավաքներին մասնակցելուն հարկադրելու վերաբերյալ նախաձեռնված քրեական վարույթի նախաքննությունը։ Այս մասին հայտնել է ՀՀ քննչական կոմիտեն։
Նշվում է, որ Քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում քննվող վարույթի շրջանակում ձեռք բերված փաստական տվյալների համաձայն՝ Մկրտիչ եպիսկոպոս Պռոշյանը, հանդիսանալով Արագածոտնի թեմի առաջնորդ, իր ծառայողական լիազորություններից բխող ազդեցությունն օգտագործել է 2021 թվականին կայացած ՀՀ Ազգային ժողովի 8-րդ գումարման արտահերթ ընտրություններից առաջ։
Քննության տվյալներով՝ թեմի առաջնորդարանում անցկացված ժողովի ընթացքում նա երկու և ավելի անձանց՝ Արագածոտնի թեմում հոգևոր ծառայություն իրականացնող հոգևորականներին, հրահանգել է մասնակցել ընտրություններին և չքվեարկել կոնկրետ կուսակցության օգտին։
Բացի այդ, ըստ նախաքննության, Մկրտիչ եպիսկոպոս Պռոշյանը Արագածոտնի թեմի դիվանապետ Ա.Ա.-ի օժանդակությամբ, վերջինիս կողմից տրամադրված տեղեկատվության միջոցով, Արագածոտնի թեմի հոգևորականների համար ստեղծված «WhatsApp» խմբային նամակագրությունում, շանտաժի միջոցով հարկադրել է հոգևորականներին եկեղեցական զգեստով մասնակցել հավաքներին՝ պահանջելով հավաքներին մասնակցությունը հաստատող լուսանկարներ և դրանց ուղարկումը նշված հավելվածով։
Նախաքննության ընթացքում Մկրտիչ եպիսկոպոս Պռոշյանի նկատմամբ հարուցվել է հանրային քրեական հետապնդում՝ քրեական օրենսգրքի 210-րդ հոդվածի 3-րդ մասի 2-րդ կետով՝ ընտրական կամ հանրաքվեին մասնակցելու իրավունքի իրականացումը խոչընդոտելու համար, և 236-րդ հոդվածի 3-րդ մասով՝ հավաքներին մասնակցելուն խոչընդոտելու կամ հարկադրելու համար։
Արագածոտնի թեմի դիվանապետ Ա.Ա.-ի նկատմամբ հանրային քրեական հետապնդում է հարուցվել Քրեական օրենսգրքի 46-236-րդ հոդվածի 3-րդ մասով՝ նշված գործողություններին օժանդակելու համար։
Մկրտիչ եպիսկոպոս Պռոշյանի նկատմամբ որպես խափանման միջոց կիրառվել է կալանքը, իսկ Ա.Ա.-ի նկատմամբ՝ տնային կալանքը։ Նրանց վերաբերյալ քրեական վարույթը մեղադրական եզրակացությամբ ուղարկվել է հսկող դատախազին։
