Շատերն էին սպասում, որ Իրանում անկայունություն ստեղծվի, և անջատողական որոշ ուժեր ակտիվանան, և Իրանը մասնատեն: Սա այն գործընթացն է, որ ի սկզբանե պլանավորվել է:
Այս մասին ասուլիսի ժամանակ հայտարարեց Հայաստանում Իրանի դեսպան Խալիլ Շիրղոլամին՝ անդրադառնալով Իրանում 2025-ի տարեվերջին մեկնարկած ցույցերին, որոնց ընթացքում, ըստ տարբեր աղբյուրների, մոտ 3000 մարդ է զոհվել:
Ըստ դեսպանի՝ Իրանը մասնատել, իհարկե, չի հաջողվի, սակայն, ըստ նրա, եթե այդ ուժերը հաջողության հասնեն, «Հայաստանը ևս պարտվողների թվում է լինելու»:
Ինչպես հայտնել էինք, Իրանում ՀՀ դեսպանության առջև ևս ակցիաներ են տեղի ունեցել, որի ընթացքում ցուցարարներն իրենց աջակցությունն են հայտնել Իրանում անկացվող բազմամարդ ակցիաների մասնակիցներին:
Հայաստանում Իրանի դեսպանը անուղղակիորեն մեղադրեց հայկական կողմին այդ ակցիաները թույլատրելու համար:
Նրա խոսքով՝ «Իրանի պաշտոնյաներն անհանգստացած են, որ մի խումբ մարդկանց կանաչ լույս է տրվում գալ Իրանի դեսպանատան դիմաց և շատ անհարգալից ու վիրավորական արտահայատություններ հնչեցնել»:
«Արդեն 6 օր է՝ երեկոյան 6-9-ը ականատես ենք լինում, որ մի խումբ հավաքվում է Իրանի դեսպանատան դիմաց, հանդես գալիս շատ անհարգալից, վիրավորական արտահայտություններով: Ի հեճուկս այն բանի, որ մենք հնչեցնում ենք մեր բողոքը, այս գործընթացը շարունակվում է»,- ասաց նա:
Դեսպանն ընդծեց, որ ՀՀ համապատասխան պատկան մարմիններին բազմիցս տեղեկացրել են ակցիաների վերաբերյալ իրենց մտահոգությունների մասին:
«Օրինակները շատ են, որ մենք կանգնել ենք Հայաստանի ժողովրդի և կառավարության կողքին ամենադժվար պահերին: Հիմա մենք դժվար իրավիճակում ենք: Իրադարձությունը, որ տեղի է ունենում Իրանի դեսպանատան դիմաց, կմնա Իրանի ժողովրդի պատմական հիշողության մեջ»,- ասաց նա:
Պատասխանելով ճշտող հարցին, թե սա ինչ ազդեցություն կարող է ունենալ Հայաստան-Իրան հարաբերությունների համատեքստում, դեսպանն ասաց. «Թեհրանում ձևավորվում է նմանօրինակ մի պատկերացում, որ Հայաստանը դադռնում է մի կենտրոն Իրանի դեմ թշնամաբար տրամադրված ուժերի համար»:
Հիշեցնենք, որ Իրանում հակակառավարական զանգվածային ցույցերը սկսվել են դեկտեմբերի 28-ից ազգային արժույթի աննախադեպ անկման և մեծ գնաճի պատճառով։
«Մարդու իրավունքների ակտիվիստների լրատվական գործակալությունը» հայտնել է, որ երկրում ցույցերի ընթացքում զոհերի թիվը հասել է 2571-ի։ Նշվում է, որ նրանցից 2403-ը ցուցարարներ են, 147-ը՝ անվտանգության ուժերի անդամներ։ Հաղորդվում է նաև 18 100 մարդու ձերբակալության մասին։
ԱՄՆ նախագահ Դոնալդ Թրամփը պարբերաբար կոչ է անում ցուցարարներին չդադարեցնել բողոքի ակցիաները՝ միաժամանակ հայտարարելով, որ ԱՄՆ-ն անհրաժեշտության դեպքում կդիտարկի Իրանին «պատժելու» տարբերակներ։ ԱՄՆ նախագահը նախ հայտարարել էր Իրանի իշխանությունների հետ բանակցությունների մտադրության մասին, սակայն հետո չեղարկել էր դրանք։
Լուսանկարը՝ ՀՀ-ում Իրանի դեսպանատան դիմաց անցվացված բողոքի ակցիայից/ Հետք, Նարեկ Ալեքսանյան
