news.am Ռուսաստանի նախագահ Վլադիմիր Պուտինը հայտարարել է, որ երկրի հարաբերությունները եվրոպական երկրների հետ դեռևս հեռու են բավարար լինելուց, սակայն ռուսական կողմը պատրաստ է վերականգնել այդ հարաբերությունները, հաղորդում է «Коммерсантъ»-ը։
Ըստ նախագահի՝ Ռուսաստանն աջակցում է երկխոսության շարունակմանը, որը եվրոպացիները նվազագույնի են հասցրել։
«Այստեղ ներկայացված յուրաքանչյուր եվրոպական պետության՝ Ֆրանսիայի, Չեխիայի, Պորտուգալիայի, Նորվեգիայի, Շվեդիայի, Ավստրիայի, Շվեյցարիայի և Իտալիայի հետ մեր հարաբերությունները խոր պատմական արմատներ ունեն, լի են փոխշահավետ գործընկերության և միմյանց հարստացնող մշակութային համագործակցության օրինակներով»,- օտարերկրյա դեսպանների հավատարմագրերի հանձնման արարողության ժամանակ ընդգծել է Պուտինը։
«Միջազգային և տարածաշրջանային կարևորագույն հարցերի շուրջ համագործակցությունը սառեցվել է։ Ես կցանկանայի հավատալ, որ ժամանակի ընթացքում իրավիճակը կշտկվի, և մեր երկրները կվերադառնան բնականոն, կառուցողական շփման՝ հիմնված ազգային շահերի հարգանքի և անվտանգության օրինական մտահոգությունների հաշվառման սկզբունքների վրա»,- շեշտել է Ռուսաստանի նախագահը։
