ՀՀ կառավարությունը հաստատեց «Երևանի քաղաքապետին լիազորություն վերապահելու մասին» որոշման նախագիծը:
Ըստ Երևանի ավագանու 2024թ. սեպտեմբերի 10-ի թիվ 204-Ն որոշման՝ Երևան քաղաքի գլխավոր հատակագծով Երևանի Կենտրոնի հարավարևմտյան տարածքում (մոտ 81 հա)` Հրազդան կիրճի եզրով և Ծովակալ Իսակովի պողոտայով՝ Երևանյան լճից դեպի Հաղթանակի կամուրջ` «Պասկևիչի բլուր»-ի և դրա հարակից մասում նախատեսվում է բազմաֆունկցիոնալ կենտրոնի հիմնում:
Նշված տարածքների նկատմամբ հանրության գերակա շահ ճանաչելու համար անհրաժեշտ է ձեռքբերող ընկերության հետ կնքել պայմանագիր, որը կսահմանի սեփականության օտարման գործընթացի ընթացքում պետության և ձեռքբերողի իրավունքները, պարտականություններն ու պատասխանատվությունը:
Հաշվի առնելով, որ կենտրոնի հիմնումն իրականացվելու է մասնավոր ներդրումների հաշվին՝ ՀՀ կառավարությունն այս որոշմամբ լիազորում է Երևանի քաղաքապետին ձեռքբերող ընկերության հետ կնքել սահմանված պայմանագիրը:
Քաղաքաշիանական ծրագիրը իրականացնելու առաջարկ են ներկայացրել «ԴԻԹԻ ՔՈՆՍԹՐԱՔՇՆ» և «ԴԻԹԻ ԴԵՎԵԼՈՓՄԵՆԹ» ՓԲ ընկերությունները՝ ներկայացնելով աշխատանքյաին էսքիզը և քաղաքաշինական ծրագրի ամփոփ հայեցակարգը:
Ըստ հիմնավորման՝ Երևանի կենտրոնական մասը սպառել է մայրաքաղաքային գործառույթների իրականացման համար նախատեսված գրեթե բոլոր անհրաժեշտ տարածքային ռեզերվները: Նորագյուղ թաղամասի զարգացման քաղաքաշինական ծրագիրը կնպաստի տարածքների արդյունավետ կառավարման ու արդիական էկոհամակարգի ձևավորման միջոցով մայրաքաղաքի տարածական կենսունակության պոտենցիալի աճին, կենտրոնական հատվածի ֆունկցիոնալ ապակենտրոնացմանը և տրանսպորտային հոսքերի բեռնաթափմանը:
Ծրագրի շրջանակներում ստեղծվելու են նոր ճանապարհային ցանց, ստորգետնյա ավտոկայանատեղիներ, կանաչապատ տարածքներ, հիմնովին նորացվելու են ինժեներատեխնիկական ենթակառուցվածքները:
Նշվում է, որ «ներկայում տարածքի զգալի մասը հիմնականում օգտագործվում է գյուղատնտեսական, մասնավորապես՝ այգեգործության նպատակներով, և մնացած մասը զբաղեցնում են անհատական բնակելի տները (մի մասը ապօրինի և/կամ ինքնակամ), դրանց տնամերձ հողամասերը և փողոցները»:
Ծրագիրը կարող է իրականացվել փուլային եղանակով կամ ամբողջությամբ:
Նախագծով նախատեսվող հիմնական հատակագծային և գործառական լուծումներն են՝
- Երևան-Դաունթաուն՝ միջազգային գործարար բազմաֆունկցիոնալ կենտրոնի ստեղծում (բանկեր, օֆիսային կառույցներ, հյուրանոցներ և այլն),
- Միջազգային մշակութային կենտրոնի ստեղծում,
- Միջազգային ներկայացուցչությունների և կազմակերպությունների գրասենյակային տարածքների կազմակերպում,
- Համաքաղաքային նշանակության հանգստի գոտի՝ կանաչ տարածքների և բնական լանդշաֆտի պահպանմամբ, ընդլայնմամբ և լրացուցիչ ջրային մակերեսների ստեղծմամբ,
- Բնակելի տներ, դպրոցներ, մանկապարտեզներ, մարզահրապարակներ, մարզադահլիճներ և սոցիալական այլ ենթակառուցվածքներ,
- Առանձին բնակելի թաղամասեր՝ դիվանագետների համար:
