factor.am  Ժնևում մեկնարկել է Իրանի ու ԱՄՆ-ի միջև միջուկային բանակցությունների երրորդ փուլը: Իրանական Mehr գործակալությունը հայտնում է, որ բանակցությունները սկսվել են տեղական ժամանակով ժամը 10:00-ին՝ Օմանի դեսպանատան շենքում:

Իրանական կողմից  մասնակցում է արտաքին գործերի նախարար Աբբաս Արաղչին, ԱՄՆ պատվիրակներն են բանագնացներ Սթիվ Ուիթկոֆն ու Ջարեդ Քուշները։ Օմանը հանդես է գալիս որպես միջնորդ։

Իրանի արտաքին գործերի նախարարության խոսնակ Էսմայիլ Բաղային ասել է, որ Թեհրանը ներկայացրել է անուղղակի բանակցությունների առաջարկ ներկայիս փուլում, որը կենտրոնացած է միջուկային իրավունքների պաշտպանության և պատժամիջոցները մեղմելու վրա։ Ըստ Բաղայիի՝ Իրանի դիրքորոշումները պատժամիջոցների վերացման և իր միջուկային իրավունքների պաշտպանության վերաբերյալ հստակ և հետևողական են։

Նա նաև հաստատել է, որ երրորդ փուլը սկսվել է չորեքշաբթի երեկոյան արտաքին գործերի նախարար Սեյեդ Աբբաս Արաղչիի և նրա օմանցի գործընկերոջ միջև հանդիպմամբ՝ հավելելով, որ Ատոմային էներգիայի միջազգային գործակալության գլխավոր տնօրենը կարող է միանալ քննարկումներին։