armenpress.am Առողջապահության համաշխարհային կազմակերպությունը կոչ է արել զերծ մնալ Մերձավոր Արևելքում քաղաքացիական անձանց և առողջապահական հաստատություններին հասցվող հարվածներից։
ԱՀԿ ներկայացուցիչ Հանան Բալխին X-ում արած գրառման մեջ նշել է․«Քաղաքացիական անձանց և առողջապահության պաշտպանությունը պետք է լինի բացարձակ։ Բոլոր կողմերը պետք է… ապահովեն բժշկական հաստատությունների պաշտպանությունը»։
Ավելի վաղ հայտարարություն էր արել նաև ԱՀԿ ղեկավար Թեդրոս Ադհանոմ Գեբրեյեսուսը՝ անդրադառնալով իրանական ԶԼՄ-ների տեղեկությանն այն մասին, որ թիրախավորվել է Թեհրանի Գանդի հիվանդանոցը։ «Խիստ մտահոգիչ են տեղեկություններն այն մասին, որ Իրանի մայրաքաղաքի այսօրվա ռմբակոծության ժամանակ վնասվել է Թեհրանի Գանդիի հիվանդանոցը։
ԱՀԿ-ն աշխատում է ճշտել կատարվածը։ Սակայն սա հիշեցում է, որ պետք է ձեռնարկվեն բոլոր ջանքերը՝ կանխելու առողջապահական հաստատությունների ներքաշումը ընթացող հակամարտության մեջ։ Առողջապահական հաստատությունները պաշտպանված են միջազգային մարդասիրական իրավունքով։ Առողջապահությունը թիրախ չէ»,- գրել է նա X-ում։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
