civilnet.am ԱՄՆ պետքարտուղարությունը հրատապ հայտարարությամբ Ամերիկայի Միացյալ Նահանգների քաղաքացիներին կոչ է արել ԱՆՀԱՊԱՂ ՀԵՌԱՆԱԼ Մերձավոր Արևելքի նշված երկրներից (ցանկը ստորև)՝ անվտանգության լուրջ ռիսկերի պատճառով։ Այս մասին ասված է ԱՄՆ պետքարտուղարի տեղակալ Մորա Նամդարի X-ի միկրոբլոգում։
Ցանկի երկրներն են՝ Բահրեյնը, Եգիպտոսը, Իրանը, Իրաքը, Իսրայելը, Հորդանան գետի Արևմտյան ափը և Գազայի հատվածը, Հորդանանը, Քուվեյթը, Լիբանանը, Օմանը, Կատարը, Սաուդյան Արաբիան, Սիրիան, Արաբական Միացյալ Էմիրությունները և Եմենը։
Պաշտոնական հաղորդագրության մեջ նշվում է, որ քաղաքացիները պետք է օգտվեն դեռևս հասանելի առևտրային փոխադրամիջոցներից (ավիաուղիներից), քանի դեռ դրանք գործում են։
ԱՄՆ նախագահ Դոնալդ Թրամփը մարտի 2-ին հայտարարել է, որ Իրանի դեմ իրականցվող հարվածների առավել ինտենսիվ փուլը դեռևս չի մեկնարկել, այն շուտով է լինելու։
Թրամփը հայտարարել է, որ Միացյալ Նահանգներն արդեն «զգալիորեն առաջ է» անցել սահմանված ժամանակացույցից։
Նա նշել է, որ ի սկզբանե կանխատեսել էին 4-5 շաբաթ, սակայն իրենք «ունակ են շարունակել շատ ավելի երկար»։
Փետրվարի 28-ին Իսրայելն ու ԱՄՆ-ն լայնածավալ ռազմական հարձակում են սկսել Իրանի դեմ։ Հարձակման առաջին օրը սպանվել է Իրանի հոգևոր առաջնորդ Այաթոլլա Ալի Խամենեին։ Ռազմական գործողություններն ընդգրկում են Մերձավոր Արևելքի երկրները։ Իրանն՝ ի պատասխան, հարվածներ է հասցնում տարածաշրջանի երկրների տարածքում տեղակայված ԱՄՆ բազաներին և Իսրայելին։ Իսրայելը հարվածում է նաև Լիբանանին։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
