Հորմուզի նեղուցը փակելու խոստում տված ԻՀՊԿ-ն հայտարարում է, որ լիովին վերահսկում է ջրային ուղին։
Ավելի վաղ ԱՄՆ նախագահ Դոնալդ Թրամփը ասել էր, թե պատրաստ է նավատորմ տեղակայել նեղուցում տանկերներն ուղեկցելու համար։
«Ներկայումս Հորմուզի նեղուցը Իսլամական Հանրապետության նավատորմի լիակատար վերահսկողության տակ է»,- Իրանի «Ֆարս» լրատվականի տարածած հայտարարության մեջ ասել է Հորմուզի նեղուցի ռազմածովային ուժերի պաշտոնյա Մոհամմադ Ակբարզադեն։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
Լուսանկարում՝ Հորմուզի նեղուցում նավերի շարժը այս պահին
