factor.am Ամերիկան Իրանում հաղթում է վճռականորեն, ջախջախիչ և անողորմ։ Այս մասին Պենտագոնում ճեպազրույցի ժամանակ հայտարարել է ԱՄՆ պաշտպանության նախարար Փիթ Հեգսեթը, գրում է BBC-ն։
Ըստ նրա՝ Իրանի դեմ ԱՄՆ-ի արշավը «յոթ անգամ ավելի ինտենսիվ է, քան Իսրայելի [12-օրյա ռազմական արշավը] Իրանի դեմ»։
«Ընդամենը չորս օր է անցել, բայց ինչպես նախագահ Թրամփն ասաց՝ ԱՄՆ-ը կպահանջի այնքան ժամանակ, որքան անհրաժեշտ է գործողության հաջողության համար»,- ասել է Պենտագոնի ղեկավարը։
Ըստ Հեգսեթի՝ վերջին չորս օրերի արդյունքներն «անհավանական, իսկապես պատմական» են եղել․ «Նրանց վերջը եկել է, և նրանք դա գիտեն»։
Ամերիկացի պաշտոնյան նաև հայտարարել է, թե «Իրանի առաջնորդները կնայեն վերև և կտեսնեն միայն ԱՄՆ-ի և Իսրայելի օդուժը», մինչև ԱՄՆ-ն և Իսրայելը որոշեն, որ պատերազմն ավարտվել է։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
Շարունակությունը՝ սկզբնաղբյուր կայքում
