armenpress.am Իրանի դեմ Միացյալ Նահանգների և Իսրայելի սկսած պատերազմից ի վեր ռմբակոծությունների հետևանքով իրանական կողմում ոչնչացվել է ավելի քան 54500 բնակարան։ Ինչպես տեղեկանում ենք իրանական լրատվամիջոցներից, տվյալները հրապարակել է Իրանի Կարմիր մահիկի ընկերությունը։
Ըստ ընկերության տվյալների՝ երկրի տարբեր շրջանների ռմբակոծությունների հետևանքով Իրանում ամբողջությամբ կամ մասնակիորեն ավերվել է 54 550 միավոր բնակարան:
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
