azatutyun.am Իսրայելի բանակը հայտարարել է, որ Թեհրանի «Մեհրաբադ» օդանավակայանում գիշերը ոչնչացրել են Իրանի հանգուցյալ գերագույն առաջնորդ Ալի Խամենեիի կողմից օգտագործված ինքնաթիռը։
Նշվում է, որ ինքնաթիռն օգտագործվել է Իրանի բարձրաստիճան պաշտոնյաների և ռազմական գործիչների կողմից՝ երկրի ներսում և միջազգային շրջագայությունների համար:
Մեհրաբադը Թեհրանի ամենահին օդանավակայաններից մեկն է, որն այժմ սպասարկում է ներքին և տարածաշրջանային չվերթներ: Բացի այն, որ այն ամենածանրաբեռնված քաղաքացիական օդանավակայանն է, այնտեղ տեղակայված են նաև ռազմաօդային ուժերի ակտիվները:
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
