shantnews.am Անիմաստ է խոսել ԱՄՆ-ի և Իսրայելի հետ հակամարտության դադարեցման մասին, քանի դեռ չկան երաշխիքներ, որ այն չի կրկնվի, հայտարարել է Իրանի նախագահ Մասուդ Փեզեշքիանը։
«Պատերազմի ավարտի մասին խոսելն անիմաստ է, քանի դեռ վստահ չենք, որ ապագայում մեր հողերի վրա այլևս հարձակումներ չեն լինի», – գրել է Փեզեշքիանը X սոցիալական ցանցում։
Նա ասել է, որ այս մասին ասել է Ֆրանսիայի նախագահ Էմանուել Մակրոնին մարտի 15-ին հեռախոսազրույցի ժամանակ։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
