arm.sputniknews.ru Իրանի փոխարտգործնախարար Սաիդ Խատիբզադեն հայտարարել է, որ երկրի նոր գերագույն առաջնորդ Մոջթաբա Խամենեին հանրությանը կներկայանա, երբ անհրաժեշտ համարի։ Այս հայտարարությունը նա արել է Sky News-ին տված հարցազրույցում։ Խատիբզադեի խոսքով՝ Մոջթաբա Խամենեին առողջական լավ վիճակում է և շարունակում է կատարել իր պարտականությունները։
«Նա առողջ է, և պատասխանատու է», – նշել է փոխարտգործնախարարը։
Հարցին, թե ինչու նոր առաջնորդը դեռևս հրապարակայնորեն չի ներկայացել, Խատիբզադեն ընդգծել է, որ որոշումը կկայացնի Խամենեին ինքը կամ նրա գրասենյակը։
«Երբ նա կամ իր գրասենյակը որոշեն դա անել, նրանք կանեն դա», – հավելել է նա՝ ընդգծելով, որ Իրանի ղեկավարությունը «չի թաքնվում»։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
