Իրանի նախագահ Մասուդ Փեզեշքիանը հաստատել է հետախուզության նախարար Էսմայիլ Խատիբի մահը։
«Իմ սիրելի գործընկերներ Էսմայիլ Խատիբի, Ալի Լարիջա նիի և Ազիզ Նասիրզադեի, ինչպես նաև նրանց ընտանիքների անդամներից ոմանց և նրանց ուղեկցողների վախկոտ սպանությունը մեզ վշտի մեջ է գցել»,- գրել է Փեզեքշիանը X սոցիալական ցանցում։
«Ցավակցում եմ Իրանի մեծ ժողովրդին կաբինետի երկու անդամների, Ժողովրդա-ազատագրական բանակի քարտուղարի, զինվորականների և Բասիջի հրամանատարների նահատակության համար»,- ասված է հաղորդագրությունում։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
