shantnews.am Պեկինը ցնցված է Իսրայելի ղեկավարների այն հայտարարություններից, որ Իսրայելի բանակը այլևս կարիք չունի համաձայնեցնելու իրանցի պաշտոնյաների սպանությունները, հինգշաբթի օրը ճեպազրույցի ժամանակ հայտարարել է Չինաստանի արտաքին գործերի նախարարության խոսնակ Լին Ցզյանը։
Իսրայելի պաշտպանության ուժերը (IDF) թույլտվություն են ստացել սպանել ցանկացած բարձրաստիճան իրանցի պաշտոնյայի՝ առանց Իսրայելի քաղաքական ղեկավարության հետագա համաձայնության, հայտարարել է Իսրայելի պաշտպանության նախարար Իսրայել Կացը, հաղորդում է պաշտպանության նախարարության մամուլի ծառայությունը։
«Չինաստանը ցնցված է այդ հայտարարությունից», – ասել է Լին Ցզյանը, երբ նրան խնդրել են մեկնաբանել տեղեկատվությունը։
Դիվանագետը շեշտել է, որ Պեկինը հետևողականորեն դեմ է միջազգային հարաբերություններում ուժի կիրառմանը, և որ Իրանի կառավարության պաշտոնյաների սպանությունը և քաղաքացիական թիրախների վրա հարձակումներն անընդունելի են։
Լին Ցզյանը նշել է, որ Չինաստանը կոչ է անում ներգրավված կողմերին անհապաղ դադարեցնել ռազմական գործողությունները՝ տարածաշրջանում իրավիճակի հետագա վատթարացումը կանխելու համար։
Ավելի վաղ Իսրայելի պաշտպանության նախարարը հայտարարել էր, որ Իրանի ղեկավարության կողմից նշանակված ցանկացած առաջնորդ կլինի Իսրայելի համար անվերապահ թիրախ։ Երեքշաբթի օրը Իսրայելը հայտնեց, որ Թեհրանում Իսրայելի կողմից հասցված հարվածի հետևանքով զոհվել են Իրանի Գերագույն ազգային անվտանգության խորհրդի քարտուղար Ալի Լարիջանին և «Բասիջ» կամավորական ուժերի հրամանատար Ղուլամրեզ Սոլեյմանին։ Իրանի իշխանությունները պաշտոնապես հաստատել են նրանց մահը։
