armenpress.am Շվեյցարիան դադարեցրել է սպառազինությունների արտահանումն ԱՄՆ՝ Իրանի դեմ հակամարտության պատճառով:
Այս մասին ասվում է մամուլի տեղեկագրում, որը հրապարակվել է կառավարության կայքում։
Այս որոշումը Շվեյցարիայի Դաշնային խորհուրդը (կառավարություն) բացատրել է երկրի չեզոքության սկզբունքի կիրառմամբ։
«Ռազմական տեխնիկայի արտահանումն այն երկրներ, որոնք մասնակցում են Իրանի հետ միջազգային զինված հակամարտությանը, չի կարող թույլատրվել հակամարտության ժամանակ», – ասվում է մամուլի տեղեկագրում։
Փաստաթղթում նշվում է, որ «ռազմական տեխնիկայի արտահանումն ԱՄՆ ներկայում չի կարող թույլատրվել»։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
Շարունակությունը՝ սկզբնաղբյուր կայքում
