ԻՀՊԿ ցամաքային զորքերի հրամանատար Մուհամմադ Քարամին այց է կատարել Իրանի արևմտյան և հյուսիսարևմտյան սահմաններ։ Այս մասին հայտնում է Մեհր լրատվական գործակալությունը։
Մուհամմադ Քարամին այց ընթացում հայտարարել է, որ ցամաքային զորքերի ստորաբաժանումները գտնվում են հոգեբանական և օպերատիվ պատրաստվածության գագաթնակետին՝ երկրի սահմանների նկատմամբ ոտնձգություն իրականացնողներին վճռական հակահարված տալու համար։
Նա նշել է, որ ցանկացած մակարդակի ագրեսորի հետ հաշվեհարդարը կլինի չափազանց արագ և կործանարար։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
