news.am ԱՄՆ նախագահ Դոնալդ Թրամփը CNN-ին հայտարարել է, որ Հորմուզի նեղուցը «շատ շուտով կբացվի», հավելելով, որ այս կարևորագույն նավագնացության երթուղին կցանկանար տեսնել ԱՄՆ-ի և Իրանի համատեղ վերահսկողության տակ։
«Նեղուցը շատ շուտով կբացվի», եթե Իրանի հետ բանակցությունները շարունակվեն սովորականի պես։ «Վերահսկողությունը կլինի համատեղ։ Եվ տեղի կունենա շատ էական ռեժիմի փոփոխություն։ Ռեժիմի փոփոխությունը տեղի է ունենում ավտոմատ կերպով»,- նշել է նա։
Փետրվարի 28-ին Իսրայելն ու ԱՄՆ-ն սկսել են հարվածներ հասցնել Իրանի Իսլամական Հանրապետության տարածքին։ Իսրայելը հայտարարել է, որ նախահարձակ է եղել՝ «Իսրայելի պետությանը սպառնացող վտանգները վերացնելու նպատակով», իսկ Դոնալդ Թրամփը հայտարարել է՝ Վաշինգտոնը լայնածավալ ռազմական գործողություն է սկսում Իրանի դեմ՝ «թույլ չտալու միջուկային ծրագրի իրագործումը»։
Իրանը պատասխան հարվածներ է հասցրել ինչպես Իսրայելին, այնպես էլ տարածաշրջանի երկրներում ԱՄՆ-ի հնարավոր ռազմական օբյեկտներին։
Իսրայելաամերիկյան հարվածների հետևանքով զոհվել են Իրանի գերագույն առաջնորդ Այաթոլլա Ալի Խամենեին, Իրանի Իսլամական հեղափոխության պահապանների կորպուսի հրամանատար Մոհամմեդ Փաքփուրը, պաշտպանության նախարար Ազիզ Նասիրզադեն և այլ բարձրաստիճան պաշտոնյաններ։
Իրանի դեմ իսրայելա-ամերիկյան ռազմական հարձակումը սկսվել է իրանա-ամերիկյան բանակցությունների ֆոնին, որոնցից ԱՄՆ նախագահը դժգոհություն էր հայտնել՝ պնդելով, որ Իրանը չի հրաժարվում միջուկային ծրագրից եւ սպառնալիք է հանդիսանում «ազգային անվտանգության կենսական շահերին»։
