Վլադիմիր Վարդանյանն ընտրվել է Սահմանադրական դատարանի դատավոր՝ 67 կողմ, 0 դեմ ձայներով:
ՀՀ ագզային ժողովում երեկ կայացած գաղտնի քվեարկությանը 107 պատգամավորից մասնակցել է 67-ը:
Հիշեցնենք, որ Վարդանյանի թեկնածությունն առաջադրել էր ՀՀ նախագահ Վահագն Խաչատուրյանը, ինչից հետո Վարդանյանը դադարեցրել է անդամակցությունը «Քաղաքացիական պայմանագիր» կուսակցությանը և հայտնել, որ ՍԴ դատավորի պաշտոնում ընտրվելու դեպքում դադարեցնելու է նաև խորհրդարանական գործունեությունը:
Նշենք, որ մի խումբ ՀԿ-ներ ԱԺ-ին կոչ են արել ձեռնպահ մնալ Վլադիմիր Վարդանյանին ՍԴ դատավոր ընտրելուց. «Թեև Վլադիմիր Վարդանյանը վայր է դրել մանդատն ու դադարեցրել իր անդամակցությունը խորհրդարանական մեծամասնություն կազմող քաղաքական ուժին, այնուամենայնիվ նրա՝ ավելի քան յոթ տարի քաղաքական գործունեությամբ զբաղվելու և կուսակցական լինելու հանգամանքը, առերևույթ կասկած է հարուցում նրա, որպես Սահմանադրական դատարանի դատավոր, անաչառ պաշտոնավարման հնարավորության վերաբերյալ։ Ավելին՝ անաչառ դիտորդի տեսանկյունից նման քաղաքական փոխկապակցվածության հանգամանքն ինքնին բացառում է նշված ռիսկերի կառավարման հնարավորությունը»:
Վարդանյանը երեկ իր ելույթում անդրադարձել էր անաչառության մասին հարցադրմանը՝ ընդգծելով, որ առաջնորդվելու է իր տված երդումով: Վարդանյանի երդման արարողությունը տեղի կունենա հինգշաբթի օրը ԱԺ նիստի ընթացքում:
