«Համո Բեկնազարյանի անվան «Հայֆիլմ» կինոստուդիա» ՓԲԸ պետական սեփականություն հանդիսացող բաժնետոմսերի կառավարման լիազորությունները վերապահվեցին ՀՀ ԿԳՄՍ նախարարությանը:
Համապատասխան որոշումն ընդունվեց ՀՀ կառավարության մարտի 26-ի նիստին:
Մինչ այս ընկերությունը Պետական գույքի կառավարման կոմիտեի ենթակայության ներքո էր և չի գործում գրեթե մեկ տասնամյակ:
Ըստ հիմնավորման՝ ՀՀ ԿԳՄՍՆ-ին վերապահելը պայմանավորված է ներկայում կինոոլորտի զարգացման և բարեփոխման ծրագրերի իրականացման, ինչպես նաև վերջին տարիներին կինոոլորտում միջազգային համագործակցության ակնհայտ աճողականությամբ:
Նշվում է՝ ժամանակակից աշխարհում ֆիլմարտադրությունն այլևս ոչ միայն մշակութային արտադրանք է, այլև դիտարկվում է որպես ռազմավարական ոլորտ, և մի շարք երկրներ զարգացրել են ֆիլմարտադրության արժեշղթայի հստակ փուլեր՝ բարձրացնելով արտահանվող ծառայությունների տեսակարար կշիռը, ամրապնդելով տեղական կրթական համակարգը և ստեղծելով հազարավոր բարձր վարձատրվող աշխատատեղեր։
«Նման մոտեցումները ցույց են տալիս, որ ֆիլմարտադրությունը ոչ միայն մշակույթի տարածման միջոց է, այլ նաև տնտեսական աճի և ազգային բրենդի ձևավորման գործիք։ Այն ունի բազմաստիճան ազդեցություն՝ ուղղակիորեն և անուղղակիորեն ազդելով մի շարք ոլորտների վրա»,- ասվում է հիմնավորման մեջ:
Հայաստանը ևս անհրաժեշտ է համարում ոլորտային նման քաղաքականության որդեգրումը՝ համալիր կինոարդյունաբերական համակարգ ձևավորելու համար:
«Վերոնշյալի իրագործման նպատակով նախատեսվում է կյանքի կոչել «Հայֆիլմ»-ի վերագործարկման ծրագիրը, որը գործելու է որպես ռազմավարության և քաղաքականության իրականացման հիմնական գործիք՝ միտված կենտրոնացված կինոարդյունաբերական քաղաքի ձևավորմանը: Համալիրը կներառի ֆիլմարտադրության, հետարտադրության, մասնագիտական կրթության և կինոժառանգության պահպանության ծառայություններ՝ միավորելով ստեղծարար ներուժի զարգացումն ու ենթակառուցվածքային հզորացումը»,- ասվում է հիմնավորման մեջ:
