Հարցին, թե ինչու անվանական չի քննադատում Նիկոլ Փաշինյանին մետրոյում տեղի ունեցած միջադեպի կապակցությամբ՝ ՀՀ մարդու իրավունքների պաշտպան Անահիտ Մանասյանը ասաց, որ դեպքի առնչությամբ ինքը շատ արագ հրապարակային հայտարարություն է տարածել։
Հարցին, թե կաշկանդվա՞ծ է Փաշինյանի անունը հնչեցնելու հարցում, Մանասյանը պատասխանեց.
«Ինձ թվում է՝ բոլորի համար է հասկանալի եղել հայտարարության հետ կապված ցանկացած հանգամանք։ Եթե հասկանալի չի եղել, որպեսզի մենք խուսափենք բոլոր հնարավոր մանիպուլատիվ մեկնաբանություններից, բոլոր հնարավոր ոչ պարզ մեկնաբանություններից, ասեմ, որ այո, շատ պարզ է եղել, որ ես դեպքը և դեպքի հետ կապված ցանկացած հանգամանք դատապարտում եմ: Անկախ նրանից՝ դա վերաբերեր վարչապետին կամ վերաբերեր ցանկացած այլ քաղաքական ուժի, դատապարտում եմ, հիմա էլ կարող եմ հրապարակային ասել, որ այո, ես դատապարտում եմ հենց այդ դեպքը»:
Մանասյանը նաև կարևորեց, որ դրանից հետո վարչապետը ներողությամբ է հանդես եկավ:
«Բայց կարևորում եմ այն հանգամանքը, որ ոչ թե այլ քաղաքական ուժերի և առանձին մասնագիտական համայնքների պես վարչապետը հարձակվեց, օրինակ, Մարդու իրավունքների պաշտպանի կամ պաշտպանի հաստատության վրա, այլ դրանից հետո որոշակի գործողություններ հետևեց»,- ասաց նա:
Հիշեցնենք՝ մարտի 22-ին Նիկոլ Փաշինյանը մետրոյի գնացքով երթեւեկող կնոջ երեխային ցանկացավ Հայաստանի փոքրիկ քարտեզ նվիրել, սակայն մայրը հրաժարվեց և խնդրեց չխանգարել իրենց՝ նշելով նաեւ, որ իրենք իրենց քարտերզն ունեն, որտեղ նաեւ Արցախը կա։ Այնուամենայնիվ, Նիկոլ Փաշինյանը շարունակեց խոսակցությունը՝ պնդելով՝ «Ձեր տղան այս քարտեզում է ապրելու»։
«[․․․] Բա մենք Հայաստանի քաղաքացիների աշխատած միլիարդներն ենք ծախսել, որ դուք այնտեղ մնաք, բա ինչի՞ չեք մնացել։ Մյուս անգամ փախածներով չփորձեք ասել, որ ես Ղարաբաղ եմ տվել»,- ասաց Փաշինյանը։ Վիճաբանության ընթացքում Փաշինյանը «մատ էր թափ տալիս» քաղաքացու վրա և բարձր տոնով խոսում, ու չնայած քաղաքացու հորդորին, որ իր հետ այդկերպ եւ այդ տոնով չխոսի, Փաշինյանն ասաց՝ «ես տենց կխոսամ Ձեզ հետ»։
