«Բոլորին դեմ եմ» կուսակցության լիազոր ներկայացուցիչ Արամայիս Պետրոսյանին ԿԸՀ-ն կես ժամ ուշացումով է թույլատրել մասնակցել այն նիստին, որտեղ վիճակահանությամբ որոշվելու է, թե քաղաքական ուժերն ինչ հերթական համարներով են հանդես գալու ընտրություններին։
Բանն այն է, որ կուսակցության լիազոր ներկայացուցիչը Spider Man-ի հագուստով է ներկայացել նիստին, կուսակիցներն էլ՝ Marvel-ի այլ հերոսների։
Տարբեր քաղաքական ուժերի «ուժեղության մրցապայքարում» Բոլորին դեմ եմ կուսակցությունն այսպես ուզում է ցույց տալ, որ իրենց թիկունքին էլ կանգնած են «գլոբալ ուժեր»։
Կուսակցության անդամ Միքայել Նահապետյանը մեզ հետ զրույցում նշեց, որ Spider Man-ի անձը հնարավոր է եղել նույնականացնել, առկա են եղել բոլոր անհրաժեշտ փաստաթղթերը եւ տվյալները, մինչդեռ ԿԸԸ-ն տեւական ժամանակ չի թույլատրել նրա մասնակցությունը՝ պատճառաբանելով հագուստը։ Նիստին կուսակցության մասնակցությունը թույլատրվել է միայն դեմքը բաց լինելու պայմանով։
ԿԸՀ-ից այս պահին չի հաջողվել մեկնաբանություն ստանալ, այն ունենալուն պես կտեղեկացնենք։
