tert.am Շատ եմ մտածում՝ այս իշխանությունն էլ ինչ պետք է անի, որ Հայաստանում չմնա գոնե մեկ մարդ, որ իրենց աջակցի, ինչ վատ բան հնարավոր էր անել, արեցին, հրահրեցին պատերազմ պարտվեցին, տվեցին 5,000-ից ավել զոհ, վիրավորներ, հողեր, էլ ի՞նչ կարող են անել, երևի մնացելա մեկ բան՝ էս ժողովրդին սոված թողել, հիմա այդ ճանապարհն են բռնել, այս երկու օրը լեզվին են տալիս Ռուսաստանի հետ կապված, իրենց բոլոր մեղքերը հիմա էլ փաթաթում են Ռուսաստանի վզին, ի՞նչ ունեք, մեծ երկիրա հանգիստ թողեք, հաշվի չեն առնում՝ ինչքան է մեր տնտեսությունը կապված այդ երկրի ու ԵԱՏՄ-ի հետ։ Այս մասին Վեդիում քարոզարշավի ժամանակ ասել է «Հայաստան» դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանը։
Մեզ ասում են՝ ինչու եք պատերազմի զոհերի թիվը ավելացնում, հատկապես մի պաշտոնյա կա, Հայաստանի ամենից թքող պաշտոնյան, մարդկանց երեսին թքող։
Իմ հարցը հետևյալն է․ երբ այդ երիտասարդներին զորակոչել եք, ցուցակներ ունեցե՞լ եք, թե ոչ, մարդիկ անուն ազգանուն ունեցե՞լ են, թե ոչ, դագաղները, որ հետ են եկել, համարներով են եկել, հիմա ասում ենք՝ հրապարակեք, հարգեք այդ մարդկանց հերոսությունը, տպագրեք, մի հուշամատյան սարքեք, թող բոլորը իմանան՝ ինչ է եղել, եթե մենք սխալվում ենք քանակի մեջ ներողություն կխնդրենք։ Ժողովուրդ, որը չի հարգում իր հերոսներին, հերոսներ երբեք չի ունենում»,-ասել է նա։
Նշենք, որ մայիսի 15-ին Արմավիրում հանրահավաքի ժամանակ ԱԺ նախագահ, ՔՊ ներկայացուցիչ Ալեն Սիմոնյանը հայտարարել է, թե 44-օրյա պատերազմի հետևանքով հայկական կողմից զոհվել է 3,833 մարդ։ Նա ընդդիմությանը մեղադրել է, որ արհեստականորեն ուռճացնում են զոհվածների թիվը։
