Ավելի հարմար փորձառության համար կարող եք տեղադրել մեր հավելվածը անմիջապես ձեր բրաուզերից։
2025 թվականի մարտի 4, 5, 6, 7, 10, 11․ այս օրերին առնվազն 23 բժշկական կենտրոնի տնօրեն ընդհանուր ավելի քան 5․7 մլն դրամի նվիրատվություն է կատարել «Քաղաքացիական պայմանագիր» կուսակցությանը։ «Ինֆոքոմը» կուսակցության տարեկան հաշվետվությունն ուսումնասիրելիս նկատել է բժշկական կենտրոնների տնօրենների կատարած նվիրատվությունների ժամանակագրական համընկնումներ։
Նախորդ տարվա ընթացքում առնվազն 31 բժշկական կենտրոնի ղեկավար կուսակցությանը նվիրաբերել է գրեթե 8 մլն դրամ։ Կենտրոններից 19-ը նախարարության ենթակայությամբ գործող 60 կառույցներից են, իսկ մնացած 12-ը գործում են մարզային ենթակայությամբ։
Առաջին նվիրատվությունը կատարել է Մարտունու բժշկական կենտրոնի ղեկավար Անդրանիկ Հարությունյանը՝ հունվարի 13-ին փոխանցելով 25 հազար դրամ։ Երկու ամիս անց սկսվել է համաժամանակյա նվիրատվությունների շրջանը։ Այսպես, մարտի 4-ին և 5-ին կուսակցությանը նվիրատվություն են կատարել Շիրակի մարզի 5 բժշկական կառույցների` Արթիկի բժշկական կենտրոնի, Գյումրու թիվ 1 պոլիկլինիկայի, Գյումրու բժշկական կենտրոնի, Գյումրու «Բեռլին» պոլիկլինիկայի և Մարալիկի առողջության կենտրոնի տնօրենները։
Հաջորդ օրը՝ մարտի 6-ին, 500-հազարական դրամ են փոխանցել Հիվանդությունների վերահսկման և կանխարգելման ազգային կենտրոնի և Քրեակատարողական բժշկության կենտրոնի տնօրենները։ Նույն օրը 40-300 հազար դրամի նվիրատվություններ են կատարել Ռադիոիզոտոպների արտադրության կենտրոնի, Ամասիայի առողջության կենտրոնի, Ախուրիկի բժշկական ամբուլատորիայի, Հրազդանի, Աբովյանի և Վանաձորի բժշկական կենտրոնների ղեկավարները։
Հետաքրքիր զուգադիպությամբ Գյումրու «Բեռլին» պոլիկլինկայի տնօրեն Դավիթ Դավոյանը և Թիվ 1 պոլիկլինիկայի տնօրեն Խաչիկ Գալստյանն իրենց երկրորդ նվիրատվությունը նույնպես կատարել են նույն օրը՝ այս անգամ՝ մարտի 7-ին։ Նույն օրն ընդհանուր ավելի քան 1․5 մլն դրամի նվիրատվություն է կատարել ևս 7 բժշկական կառույցի՝ Վանաձորի թիվ 5 պոլիկլինիկայի (այժմ նախկին), «Նաիրի» բժշկական կենտրոնի, Փանիկի առողջության կենտրոնի, Չարենցավանի բժշկական կենտրոնի (այժմ նախկին), Գյումրու Վ. Աբաջյանի անվան ընտանեկան բժշկության կենտրոնի, «Ավան» հոգեկան առողջության կենտրոնի, Սևանի հոգեկան առողջության կենտրոնի տնօրենները։
Նույն օրը նվիրատվություն է կատարել նաև Վահե Կորյունի Հակոբյան անունով մի քաղաքացի։ Այս անուն-ազգանուն-հայրանունն ունեցող երեք անձ կա Հայաստանում, նրանցից մեկը Թոքաբանության ազգային կլինիկայի տնօրենն է։ Կլինիկայի տնօրեն Վահե Հակոբյանը, ի պատասխան մեր ճշտող հարցին՝ ի՞նքն է արդյոք նվիրատուն, թե՞ ոչ, հայտնեց․ «Նախորդ տարվա բան եք հարցնում․ կդժվարանամ հիշել»։
Մարտի 7-ի նվիրատվութունների ցանկում հանդիպում է նաև Սիմոն Վոլոդյայի Մանուկյան անունով նվիրատու։ Հայաստանում երկու մարդ է հաշվառված այս տվյալով։ Նրանցից մեկը Արթիկի մոր և մանկան հիվանդանոցի տնօրենն է, որը մեր հարցին արձագանքեց այսպես․ «Կոռեկտ հարց չեք ուղղում․ նպատակահարմար չեմ գտնում պատասխանել»։
Այսպիսով, մենք չունենք ո՛չ հերքում, ո՛չ էլ հաստատում՝ ևս երկու ԲԿ-ի տնօրեն մասնակցե՞լ են համաժամանակյա նվիրատվությանը, թե՞ պարզապես համընկնում է տեղի ունեցել։ Այնուամենայնիվ, այս անունները կրող երկու անձինք էլ նվիրաբերել են 100-հազարական դրամ։
Նվիրատվությունների շղթան ընդհատվել է հանգստյան օրերին և շարունակվել մարտի 10-ին․ Մարտունու բժշկական կենտրոնի և Դատաբժշկական գիտագործնական կենտրոնի տնօրենները փոխանցել են 500-հազարական դրամ։ Սա 2025 թվականին Մարտունու բժշկական կենտրոնի տնօրեն Անդրանիկ Հարությունյանի երկրորդ փոխանցումն է։ Շղթան եզրափակել է Գյումրու հոգեկան առողջության կենտրոնի տնօրենը՝ 120 հազար դրամի նվիրատվությամբ։
Այսպիսով, մեկ շաբաթում «Քաղաքացիական պայմանագիր» կուսակցությունը ստացել է բժշկական կենտրոնների տնօրենների նվիրատվությունների մեծ մասը՝ շուրջ 5․7 մլն դրամ։
Արդեն մարտի 21-ին Այրվածքաբանության և մաշկաբանության ազգային կենտրոնի տնօրենը փոխանցել է 500 հազար դրամ։ Ապրիլին՝ չորս օրվա տարբերությամբ, իրենց երկրորդ նվիրատվությունն են կատարել Վանաձորի թիվ 5 պոլիկլինիկայի այժմ նախկին տնօրեն Վանիկ Օհանյանը և նույն համայնքի բժշկական կենտրոնի տնօրեն Մեսրոպ Հազրոյանը։ Երկուսն էլ փոխանցել են 25 հազար դրամ։
Նոյեմբեր ամսվա նվիրատուների ցանկում «Ինֆոքոմը» նույնականացրել է ևս 3 բժշկական հաստատությունների տնօրենների։ Նոյեմբերի 17-ին Գավառի և Սևանի բժշկական կենտրոնների (այժմ նախկին) ղեկավարները կուսակցությանը փոխանցել են 200-հազարական դրամ։ Նոյեմբերի 13-ին էլ Մարտունու բժշկական կենտրոնի տնօրեն Անդրանիկ Հարությանը իրականացրել է իր 3-րդ նվիրատվությունը՝ փոխանցելով 400 հազար դրամ։ Սա Հարությունյանի երրորդ, բայց ոչ վերջին փոխանցումն է․ ևս 1 փոխանցում Հարությունյանն իրականացրել է արդեն դեկտեմբերի 23-ին։ Նշենք, որ Հարությունյանը «Քաղաքացիական պայմանագիր» կուսակցության անդամ է։
Դեկտեմբերի փոխանցումներն այս մեկով չեն սահմանափակվում։ Տարվա վերջին ամսին, ոչ մարտ ամսվա խտությամբ, սակայն կրկին նկատվում է նվիրատվությունների ժամանակագրական կուտակում։
Դեկտեմբերի 11-ին, 16-18-ը, 23-ին և 25-ին կուսակցությանը նվիրատվություններ են կատարել նաև Քաջարանի, Վանաձորի, Արթիկի, բժշկական կենտրոնների ղեկավարները և «Սուրբ Գրիգոր Լուսավորիչ» բժշկական կենտրոնի ու Վանաձորի թիվ 5 պոլիկիլինակայի (այժմ նախկին) տնօրենները։
Առողջապահության նախարարությունից այս համաժամանակյա նվիրատվություններն «Ինֆոքոմի» հետ զրույցում մեկնաբանեցին այսպես՝ «Որևէ արտառոց բան չկա, ուղղորդում չի եղել․ ովքեր ցանկացել են, մասնակցել են»։
Առողջապահության նախարար Անահիտ Ավանեսյանը կուսակցությանը կատարել է 720 հազար դրամի նվիրատվություն՝ երեք առանձին փոխանցումներով։ Նրա առաջին և վերջին նվիրատվությունների ամսաթվերը համընկնում են ԲԿ տնօրենների համաժամանակյա փոխանցումների ժամանակահատվածների հետ՝ մարտի 10 և դեկտեմբերի 24։
Անահիտ Ավանեսյանի կուսակցական է, «Քաղաքացիական պայմանագիր» կուսակցության ցուցակում երրորդն է և առաջինը՝ կանանց ցուցակում։
«Ինֆոքոմը» շարունակում է ուսումնասիրել կուսակցությունների հաշվետվությունները, որոնց մասին առաջիկայում հանդես կգա նոր հրապարակումներով։ Իսկ մինչ այդ առաջարկում ենք կարդալ՝
«Ուժեղ Հայաստան» կուսակցության անդամ Ռոբերտ Կադարյանը՝ ՔՊ նվիրատուների ցանկում
