arm.sputniknews.ru «Քաղաքացիական պայմանագիր» կուսակցությունը վարչական ռեսուրս է կիրառում։ Հանրային հեռուստաընկերության եթերում այս մասին հայտարարեց «Միասնության թևեր» կուսակցության վարչապետի թեկնածու Արման Թաթոյանը` հրապարակելով ձայնագրություն։
Ըստ ձայնագրության՝ Մարտունի համայնքի կրթության բաժնից զանգահարում են մանկապարտեզների տնօրեններին ու պարտադրում, որ գնան ՔՊ կենտրոնական գրասենյակի բացմանը։
«Բարև ձեզ, հարգելի՛ տնօրեններ, այսօր ժամը 7-ին Մարտունի քաղաքում բացվելու է ՔՊ կենտրոնական գրասենյակը, ուստի խնդրում եմ ձեր տղամարդ աշխատակիցներին տեղյակ պահեք, որ անպայման ներկա լինեն»,- լսվում է ձայնագրության մեջ։
Թաթոյանի տեղեկություններով՝ դրանից հետո Մարտունիում նաև ցուցակագրել են այն մարդկանց, ովքեր գործող իշխանությանը չեն աջակցում, նրանց անուն-ազգանունները փոխանցվել են համայնքապետարան։
«Սա է այսօրվա վիճակը, որ ի սկզբանե անարդար են անցկացվում ընտրությունները»,- ասաց Թաթոյանը։
Նա հավելեց՝ սա ևս ուղարկվելու է իրավապահ մարմիններին քննության համար։
